1 Mwanagu, ung'atoghola ghonilonga, na ung'agheka ghamalaghitso ghangu, 2 ghamaghutwi ghako ghang'ategheletsa ihekima, na ghumoyo ghwako ghutonge ukumanya. 3 Ung'alilila ghendo wing'ighwe ukukengela ung'akemelela wing'ighwe ukutanga, 4 na ung'aibama ihekima ka fetsa yaghile, ung'aibama ka hatsina ipfisike. 5 Baho kutsotanga ukumpfuka IMNDEWA choni, na choni ukummanya Imulungu. 6 Kwa apfila IMNDEWA kolapfa ihekima, mna ghumlomo ghwake mwolawa ukumanya na ukutanga. 7 Kowekila iwanu wanoghile ukumota, yeye kowakinga iwanu awala iwokala kwa kutogholighwa. 8 Aku kokalitsa tsinzila tsawobita iwanu iwotenda ihaki, na kotsikinga tsinzila tsa awala iwomtoghola. 9 Apfo kutsotanga choni ichinoghile na choni chili cha haki, na chila nzila inoghile. 10 Kwa apfila hekima itsakwingila mna ghumoyo ghwako, na ukumanya kutsokudeng'elesa mghati mwako. 11 Tsimbutsi tsitsokukinga, na ukumanya kutsokwika, 12 pfitsokukombola kulawa mna inzila ya iwehile, awala iwolonga ghehile, 13 iwotsileka tsinzila itsigholoke watsighendele tsinzila tsa ichisi. 14 Iwodeng'elela ukutenda ghehile, wonoghelwa na awala iwoghendelela kutenda ghehile, 15 awala iwobita mna tsinzila tsaghile, na mna tsinzila tsihile. 16 Itsokuswekula kulawa kwa ipinga chiweghe, ipinga chiweghe yana ghamalonga ghali mta, 17 iyamlekile mmale wake wa uwali, na iyesemwile lilaghano lyayekile kwa Imulungu wake. 18 Kwa apfila ing'anda yake yolongotsa kuna ukufa, na tsinzila tsake tsoghenda kutsimu. 19 Wose iwomghendela ng'awakuya baye, ng'awoyiyila keli baye inzila ya ugima. 20 Apfo wang'e mna tsinzila tsa iwanu iwanoghile, na tsinzila tsa iwanu wana ihaki. 21 Kwa apfila awala wana ihaki wawo iwatsokala muisi, na iwalihela matotso wawo iwatsokala mumo. 22 Lekeni iwehile watsolapfighwa muisi, na iwobugha watsobulighwa kulawa amwo.