1 Wanangu tegheletseni aba wenu chayowafunda, muwambe ghamaghutwi mtegheletse na mmanye. 2 Mana nene nowafunda ghamahala, wala mleke kughalema malangulitso ghangu. 3 Hanikalile na mwana kwa aba wangu, mhole, na mwana nyalimwe kwa mai wangu iyanikundile. 4 Aba wangu kanongela apfino, "Ugheke mmoyo ghanikulongela, kinda ghamalaghitso ghangu, naghwe kwakuwa mgima. 5 Uwe na ihekima na ukumanya, uleke kwisemwa wala kughalema ghanilonga. 6 Uleke kumleka Ihekima, kwaapfila katsokukinga, umkunde naye katsokukinga. 7 Kuwa na hekima chicho chinu chikulu ghendo, ng'apfu ulapfe chila chinu upate ukutanga. 8 Umtunye naye katsokutunya, umhaghatile naye katsokutoghola. 9 Katsokubota ichilemba mwitwi, katsokupfalitsa litaji lina unzolingo." 10 Mwanangu tegheletsa na ghabokele ghanilonga, naghwe kutsokala miyaka mingi. 11 Nikulangusa inzila ya ihekima, nikulongotsa mna tsinzila tsigholoke. 12 Haughenda, mghulu ghwako ng'aghutsogima baye, na hautsuma ng'witsekwala baye. 13 Ghakinde ghamalaghitso, uleke kughaleka ghoke, ghakindilise ghendo kwaapfila agho ghagho ugima wako. 14 Uleke kubita mna tsinzila tsa iwehile, wala uleke kutenda pfowotenda ing'awanoghile. 15 Kala kutali na tsinzila atso, wala uleke kutsisoghelela, uhunduke uke. 16 Wawo ng'awowasa baye bila kutenda ghehile, ng'awopata baye tsinongo bila kumlagha munu. 17 Kwa apfila wawo wakuja chighate ichilawa mna ighehile, na wakunwa idifai ilawa mna ughobo. 18 Lekeni tsinzila tsa iwanu wana ihaki tseghala na ukulangala kwa nemitondo, kwaapfila koghendelela kulangatsa mbaka nemisi. 19 Tsinzila tsa iwehile tseghala na chisi chikulu ghendo, ng'awomanya baye choni ichiwatenda wekwale. 20 Mwanangu tegheletsa aghano ghanilonga, ghamaghutwi ghako ghategheletse ghamalonga ghangu. 21 Uleke kughaleka ghoke mnange mwako, ghaleke ghengile mmoyo mwako. 22 Kwaapfila agho ghana ugima kwa awala iwoghapata, na ghohonetsa ilukuli lwose. 23 Kubita ghose, ulolese ghumoyo ghwako, kwaapfila mumo mwatsilawa tsimbwibwi tsa ugima. 24 Kala kutali na imidawalo ya ukubugha, leka kulonga mbuli tsa ughutsu. 25 Utsileke tsinenge tsako tsilole hambele, utsitsodole ghendo tsilole ghoya hambele. 26 Ulolese ghoya ahala haghubita ghumghulu ghwako, na tsinzila tsako tsose tsitsakwima ghoya. 27 Ulumbilile, uleke kubaghuka kujilo wala kumoso, ughulapfe ghumghulu ghwako mna ighehile.