1 Dipfai yomtenda imunu yawe mtalatsi na imbwali yomtenda imunu yawe mghobo, imunu wowose iyolongotsighwa napfo kahela hekima. 2 Ukughudubuka kwa mfalume kweghala na ukuduma kwa simba, iyomtenda yaghudubuke koulema ugima wake. 3 Imunu iyohepa ukwisonga ayo kobama kutogholeka, lekeni chila munu mbotsi kobama ukwisonga. 4 Munu mdebwe ng'olima baye mna ghumsimu ghwa ukulima, apfo mna ghumsimu ghwa ukupfuna yeye katsakuwa munu iyolombalomba lekeni ng'opata chinu baye. 5 Ghali mna ghumoyo ghwa imunu gheghala na ghamatsi ighaghendese hasi, Lekeni imunu yana tsimbutsi kodaha kughamanya. 6 Wanu wengi weghoda ghendo ka wawo waluso, lekeni nani iyodaha kumpata imunu iyotogholeka? 7 Imunu yanoghile yang'akala kwa kuwinza nzila tsa haki, iwanaghe wayowaleka watsobweda ghendo. 8 Mfalume hayokala mna ichighoda chake yahighe, kosughula ighehile ghose ghayakona kwa tsinenge tsake. 9 Angu nani iyodaha kulonga, "Ghumoyo ghwangu nighwika ghwela, nene nyela, nahela nzambi?" 10 Minzani ya ughutsu na pfinu pfa ukulingila ipfibugha, pfose pfili pfomdesa IMNDEWA. 11 Hata imwana mdodo komanyika kwa aghala ghayotenda, ka chayotenda chela au chinogha. 12 Lighutwi ilihulika na inenge ikona, pfose pfili kapfiumba IMNDEWA. 13 Uleke kuwasawasa hela kutsakuwa mhingwa, kala meso naghwe kutsakuwa na chijo chingi cha ukuja. 14 Imunu iyoghula ipfinu kodaha kulonga, "Ng'apfinoghile baye, ng'apfinoghile baye," Lekeni yang'oka keghoda apfila pfayaghulile kwa bei ndodo. 15 Kuna nzahabu, na kuna lubi nyingi, lekeni ghamalonga gha ukumanya igholawa mna ghumlomo ghana samani ng'ulu kubita ghamabwe agho. 16 Sola ligwanda lya ayula iyomwikila poni imgheni, ulikindilitse ghoya ka komwikila poni pinga mgheni. 17 Ichijo chayopata imunu kwa ukwiba chamta ng'ani, lekeni hambele kumlomo chakuwa ka chijo chimemile msanga. 18 Ung'abama ukutenda ipfinu wabame iwanu wakushauli, uleke kughenda kung'ondo aku ng'una ubokele ushauli baye. 19 Munu mng'enye ng'apfisagha chinu baye, apfo mhepe imunu iyali mlopwalopwa. 20 Imunu wowose iyowalighita aba wake na mai wake, itala ya ugima wake itsotsimika mna ichisi tititi. 21 Tsimali tsa ukuhala himahima aho mwanduso, ako kwatsitsighila ng'aitsokubwedesa baye. 22 Uleke kulonga, "Nitsakuyitsa ghehile ghawanendele." Mbete IMNDEWA, naye katsokukombola. 23 Minzani ya ughutsu yomdesa IMNDEWA, pfipfila na ipfipimo ipfibunza 24 Chila ghumghulu ghwa imunu haghukwang'a, IMNDEWA yuyo iyolongotsa, lelo imunu yodahatse kumanya inzila yake mwenyegho iyoghenda? 25 Imunu keyonza imwenyegho ka kolonga himahima ka katsomlapfila ichinu Imulungu, na hambele chidogho kakwanza ukwalangula kwa achila chayalongile kolapfa. 26 Mfalume yana ihekima kowabeta iwehile, naye kowahigha bila kuwonela libatsi. 27 Itala ya IMNDEWA yokaghula ghumoyo ghwa imunu, yokaghula mbaka mghati ghendo mwa imunu. 28 Uluso na ukutogholeka kwa mfalume komtenda yakale mgima, ichighoda chake cha ufalume chakwima ghoya kwa uluso wake. 29 Iwasongolo weghodela tsingupfu tsawo, na iwanzehe wanogha kwa uhenga uli mwitwi mwawo. 30 Imikwalutso ya ipfiboko yomalitsa ighehile na ukufapulighwa kotenda ghumoyo mghati ghwele.