1 Mwanangu, ung'amwikila tsamana miyagho, kwa kwilaghana na imunu mgheni, 2 kwitegha na kwiyonza kwa ghamalonga gha ghumlomo ghwako, 3 Umanye ghendo ka kughoghighwa mna ghamoko gha miyagho lelo mwanangu, tenda apfino uhone: mghendele imunu ayo ukamdedetse yakulekelele. 4 Uleke kuleka tsinenge tsako tsone nongo, wala tsikope tsa tsinenge tsako tsileke kudongila. 5 Wiyonzole ulawe mna ghamoko agho, ka mbawala kulawa mna ghumoko ghwa munu iyowinda, au ka ichideghe kulawa mna ghamoko gha imunu iyotegha. 6 Ghweghwe uli mdebwe, walole wamswa, walole apfila pfawokala, uwe na hekima, 7 Hata ka wahela iyowemila, wala mkulu, wala chilongotsi, 8 lekeni weyikila ichijo mna ghumsimu ghwa chiyangatsi, wokunga ichijo mna ghumsimu ghwa ukupfuna. 9 Lekeni ghweghwe mdebwe, utsowasa mbaka tsuwachi? Utsolamka tsuwachi mna tsinongo tsako? 10 Kolonga, "Wime niwase chidogho, tanu nidongile chidogho, nikunje ghamoko nibwihile chidogho." 11 Baho uhingwa utsokutsingila ka mbapfi, ukubama kutsokuwinza ka munu yana isilaha.

12 Imunu iyali henzehenze, iyehile, kakwanga kwanga akuno kolonga ughutsu. 13 kokonyetsa kwa tsinenge, kolonga kwa kukwada ghamaghulu, na kakonesa kwa ipfidole, 14 na mmoyo mwake kopanga ukutenda ighehile, kowasongetsa iwanu wesonge. 15 Lekeni ayo maghayo ghatsompata kwa kwidukitsa, katsokomighwa na ng'atsohona baye.

16 Kuna pfinu sita ipfimwihila IMNDEWA, ona, kuna pfinu saba ipfimdesa, 17 tsinenge tsa ukwighoda, lulimi ilughutsuka, ghamoko ighokoma iwalihela matotso, 18 ghumoyo ighubama ukutenda ghehile, ghamaghulu ighosumkila kutenda ghehile, 19 mkalangama mghutsu iyolonga ughutsu, imunu iyowasongetsa wandughu wesonge.

20 Mwanangu tegheletsa ghayokulaghitsa aba wako, wala uleke kughaleka ghayokufunda mai wako. 21 Ugheke mmoyo mwako, na ughendelele kughoha ka mkufi msingo mwako. 22 Haughenda mnzila ghatsokulongotsa, hauwasa ghatsokukalitsa, haulamka ghatsolonga naghwe. 23 Kwa apfila ghamalaghitso aghano gha tala, na ghamahala aghano gha ghumwanga, ukukanyighwa iyo inzila ighenda kuna ugima, 24 Ghatsokwika kutali na ipinga yehile, kulawa mna ghamalonga ghalimta gha ipinga ayo mghoni, 25 Uleke kusulukila ukunogha kwake, wala uleke kutoghola tsinenge tsake tsayolembula tsikwonze. 26 Kwa apfila munu kodaha kwaghisa ichighate chake kwa kumhonga pinga chiweghe, lekeni kwa ipinga wa imunu kakwaghisa ugima wake wose. 27 Pfihi imunu kodaha kwika chiwenge mmambagha, na ligwanda lyake lileke kulakala? 28 Angu imunu kodaha kukanyagha ghumoto na kutsayo kwake kuleke kulakala? 29 Apfi pfipfo pfaitsolawila kwa immale iyowasa na ipinga wa miyaghe, wowose iyomdolitsa ipinga ayo katsotowighwa. 30 Iwanu ng'awombetsa baye imunu yang'eba, ka kana nzala, 31 lekeni yang'aghoghighwa koliha mala saba na katsolapfa tsimali tsose tsa mng'anda mwake. 32 Immale iyowasa na pinga wa munu yungi, ayo kahela tsimbutsi ghendo, iyotenda apfo kekoma imwenyegho ghendo. 33 Katsopata pfilonda na ukubetsighwa, na ichinyala chayopata ng'achitsomala baye. 34 Kwa apfila wipfu wayali nawo immale womtenda yone maya, na ng'atsakona libatsi baye hayatsomuyitsila ighehile imghoni wake. 35 Ng'atsobokela liho lyolyose baye, hata liwe kulu pfihi, katsolema ghendo ukulibokela.