1 Ng'apfu ukuja ughali chibalu aku kuduhu ukwisonga, kubita ukukala kuna ing'anda ina tsisona aku iwanu wesonga. 2 Imtumwa iyakengele katsomtawala imwana iyoghela chinyala, naye katsehangila nawo imali iyoleka aba wawo. 3 Inzahabu na ipfetsa yoghetsighwa inoghe kwa kulakatsighwa mna litanuli lya ghummoto, lekeni ukunogha kwa ghumoyo ghwa imunu koghetsighwa na IMNDEWA. 4 Iyotenda ighehile kotegheletsa milomo ya iwanu wehile, na imghutsu koliwamba lighutwi lyake litegheletse lulimi ilubugha. 5 Munu iyomseka imunu mhingwa komligha Muumba wake, na ayula iyodeng'elela ukughaya kwa wayaghe katsohghighwa. 6 Tsina sekulu weghodela iwatsukulu wawo, ka apfila iwana pfaweghodela waletsi wawo. 7 Malonga ighanoghile ng'aghalongaghwa baye na imilomo ya munu mbotsi, ng'ambe pfiha ghendo kwa imilomo ya chilongotsi kulonga ughutsu! 8 Hongo lyakoneka ka fubala ya uhawi kwa ayula iyohonga, kwa apfila chila chinu chayobama ukutenda chotendeka. 9 Iyopfisa ighehile kobama ukukundighwa, lekeni iyolonga longa ighehile ghayatendighwe kowasa kutali sale tsake wa habehi. 10 Ukumanila mala lumwe imunu ayula iyakengele komwingila ng'ani, kubita kumfapula pfiboko miya imwe munu mbotsi. 11 Chayobama munu yehile ukulema ukuhulikitsa kuliyeka, apfo msenga yalihela libatsi katsotumighwa kuna yeye. 12 Ng'apfu witingane na iduma iyabokighwe iwana wake, kubita kwitingana na imunu mbotsi mna ubotsi wake. 13 Ayula iyomuwiyitsila miyaghe ghehile kwa aghala ghanoghile ghayamtendele, ighehile ng'aghatsohupa baye mna ing'anda yake. 14 Iyakwanzisa ukwisonga keghala na imunu iyotobola hanu hana ghamatsi, apfo mleke ughobo ng'ana ukwisonga kulawile baye. 15 Ayula iyomlekelela imunu iyatendile ghehile na kumhigha imunu iyalihela matotso, awo wose weli womdesa IMNDEWA. 16 Angu choni ghendo munu mbotsi kusola litobole yakaghule ihekima, aku yeye mwenyegho kahela tsimbutsi? 17 Sale yako kokukunda matsuwa ghose, lekeni indughu yako koneka yakwapfile mna ghamatsuwa gha ukughaya. 18 Iyalihela tsimbutsi kolonga katsolapfa chinu, na komwikila sale yake poni ichinu chake, 19 Iyobamagha ukwisonga ayo kokunda tsinzambi, na ayula iyotsenga lilango linoghile yetambe ayo kebamila ghamaghayo. 20 Imunu yana ghumoyo ghwihile ng'opata baye ighanoghile, na ayula iyoghutsuka kwa lulimi lwake, ukughaya kutsomlawila. 21 Iyakweleka imwana mbotsi keghalila usungu imwenyegho, na aba wake mwana mbotsi ng'odaha baye ukudeng'a. 22 Ghumoyo ghusangalale ghwadawa ihonetsa, lekeni ghumoyo ighutenyuke ghonyalitsa imipate. 23 Imunu yehile kobokela hongo chinyelenyele, ili yatsaghise tsinzila tsa ihaki. 24 Imunu iyakengele chayobama ihekima iliyeka, lekeni tsinenge tsa munu mbotsi tsololalola chila hanu muisi. 25 Imwana mbotsi koghuma hutsuni kwa aba wake, na komghela usungu ayula iyamweleke. 26 Ng'apfinoghile baye kumtotsa imunu yalihela matotso, wala ukuwafapula pfilongotsi kwa ukutenda kwao ighanoghile. 27 Imunu yana ukumanya ng'olonga malonga mengi baye, na ayula iyenyamala tulu kana tsimbutsi. 28 Hata imunu mbotsi yang'enyamala kakoneka kana hekima, na kakoneka kakengela hayodiwa ghumlomo ghwake.