1 Ghumoyo ghwa mfalume ghwamna ghamoko gha IMNDEWA,

yeye koghulongotsa ka ichikolongo cha ghamatsi kokose kwayobama.

2 Chila chinu chayotenda imunu chakoneka chinogha hambele ha tsinenge tsake,

lekeni IMNDEWA yuyo iyolinga imimoyo.

3 Ukutenda ghana ihaki na ukuhigha ghoya,

komnoghela IMNDEWA kubita kumlapfila inambiko.

4 Tsinenge tsa ichidandali na ighumoyo ighwighoda,

ipfili tala ya wanu wehile, pfose nzambi.

5 Chayobama ukutenda imunu iyeyunda chomlongotsa kuna ukupata tsimali,

lekeni chayotenda imunu mmbambala chomlongotsa kuna uhingwa.

6 Ukupata tsimali kwa lulimi lwa ughutsu

kweghala na liyosi ilifuka, ako ukwibamila ukufa.

7 Chidandali cha iwanu wehile chitsowabuluta kutali,

kwaapfila wolema kutenda ighobamighwa.

8 Inzila ya munu yana ghamatotso ipfeduka,

ghamatendo gha imunu iyalihela matotso ghagholoka.

9 Ng'apfu kukala hana imembe ya ichiswili,

kubita kukala na pinga imghobo mna ing'anda ng'ulu.

10 Munu yehile kosulukila kutenda ghehile,

kahela libatsi hata kwa imunu iyokala habehi naye.

11 Umtowe munu imtalatsi na iyali mbotsi katsopata hekima,

Umfunde yana ihekima naye katsopata ukumanya.

12 Imulungu yana ihaki kololesa ghoya ighotendeka mna tsing'anda tsa iwanu wehile,

naye kowaghwisa hasi wahupe.

13 Imunu iyodiwa ghamaghutwi ghake yaleke kuhulika ichililo cha iwanu wahingwa,

naye pfipfila katsolila na kuduhu wakumhulikitsa.

14 Inzawadi ilapfighwa chinyele yomhotsa imunu iyaghudubuke.

ihongo yohighwe mbeme nayo yohotsa imaya ng'ulu.

15 Imunu yana ihaki kodeng'elela ukutenda aghala ighali gha haki,

lekeni iwanu wehile wakwingilighwa na wogha.

16 Imunu iyakwanga kwanga kutali na inzila ya ukumanya,

ayo katsokala hana ghumtingano ghwa iwanu iwafile.

17 Imunu iyokunda ukuhondola ayo katsakuwa mhingwa,

na ayula iyokunda imbwali na kuja pfijo pfinonile ayo ng'odaha baye kuwa na mali nyingi.

18 Munu yehile kakuwa chinu cha kuwakombolela iwanu wanoghile,

na wanu waghutsu watsakuwa chinu cha kuwakombolela iwanu iwolamla ghoya.

19 Ng'apfu kukala kuna isi ya nyika,

kubita kukala na pinga mghobo na yana lighubu.

20 Mna ing'anda ya imunu yana ihekima mna ikano imemile ipfijo pfinoghile na ghamapfuta,

lekeni imunu mbotsi ipfinu pfake kopfihondola pfose.

21 Imunu iyotenda haki na uluso,

ayo katsobokela ugima, haki na heshima.

22 Imunu iyana ihekima koghughendela ghumji ghuna ingupfu,

na koughwisa hasi ubanda wao mkulu wawouhuwila uwakinge.

23 Imunu wowose iyakwalangitsa chaghulonga ghumlomo ghwake na ilulimi lwake,

ayo kekinga imwenyegho na ghamaghayo.

24 Yana ichidandali na iyeghoda taghwa lyake kokemighwa "Mtalatsi;"

ghayotenda ghose ghamema ichidandali.

25 Ukusulukila kwa imunu mdebwe kutsomkoma,

kwaapfila ghamoko ghake gholema ukusang'ana.

26 Misi ngima imunu ayo kosulukila ukupata ipfinu,

lekeni imunu yana ihaki koghola ghola ipfinu kwa uluso.

27 Inambiko iyolapfa imunu yehile yodesa,

yodesa ghendo ka yolapfghwa na ghumoyo ghwihile.

28 Mkalangama wa ughutsu katsohupa,

lekeni chayolonga imunu iyotegheletsa chitsokala matsuwa mengi.

29 Imunu yehile hayolonga uhanga wake wobabala,

lekeni imunu yanoghile kofikitsa pfinoghile apfila pfayotenda.

30 Kuduhu hekima wala ukumanya,

wala ushauli wowose kumtsidi IMNDEWA.

31 Ifalasi kakwikighwa ghoya kwa litsuwa lya ing'ondo,

lekeni ukuhuma kolawa kwa IMNDEWA.