1 Mitsani ya ughutsu yomwihitsa IMNDEWA, lekeni yeye kodeng'elela imunu iyolinga pfinoghile. 2 Chidandali choghala chinyala lekeni ukwihulumsa kwa imunu koghala ihekima. 3 Ukunogha kwa iwanu wana ihaki kowalongotsa, lekeni usughu wa awala iwobugha utsowakoma. 4 Tsimali si chinu baye mna litsuwa lya imaya, lekeni ihaki itsomkombola imunu kulawa mna ukufa. 5 Ihaki ya imunu iyalihela matotso itsogholosa tsinzila tsake, lekeni yehile kakonzighwa na ghehile ghake. 6 Ihaki ya iwanu walihela matotso itsowakombola mna ukonzeka, lekeni awala iwobugha watsakonzighwa na libatsu lyawo lihile 7 Imunu yehile hayakufa, ghose ghayololela ghohupa, na ghose ghayasang'ane kwa ngupfu tsake si chinu baye. 8 Imunu yana ihaki kokombolighwa kulawa mna ghamaghayo, lekeni ghamaghayo agho ghatsomtsila imunu yehile. 9 Imunu ing'ayompfuka Imulungu komwaghisa miyaghe kwa ung'enye wayolonga, lekeni iyotenda ghanoghile katsokombolighwa kubitilla ukutalamka kwake. 10 Imunu yana ihaki hayobweda, ghumji ghose ghodeng'elela, lekeni hayohupa iyotenda ghehile iwanu wose wodeng'elela. 11 Ukubweda kwa ghumji kolawa kwa iwanu wana ihaki, lekeni ghumji ghohinyighwa kubitila imilomo ya iwanu wehile. 12 Iyalihela tsimbutsi kombetsa miyaghe, lekeni imunu iyakengele kenyamala tulu ghendo. 13 Imunu mng'enye ng'okala na mbuli baye, lekeni iyotogholeka kopfisa imbuli. 14 Ka kuduhu ulongotsi wa ihekima, isi yakughwa, lekeni hana iwashauli wengi isi yohuma. 15 Imunu iyomwikila tsamana imgheni, alyo litsompata lyake, lekeni ayula iyohepa ukumwikila imgheni tsamana, ayo kokala tseghamba. 16 Uluso wa ipinga womtenda yaheshimighwe, lekeni iwamale ing'awana libatsi wopata mali nyingi kwa kuboka. 17 Uluso wa imunu iwo iwumtenda yebwede, lekeni munu kaltili kelagha imwenyegho. 18 Munu yehile kobokela maliho gha ughutsu, lekeni iyohanda ihaki katsogwekighwa. 19 Ukutenda ghanoghile komtenda imunu yawe mgima, lekeni imunu yosumkila ukutenda ghehile, ayo keghalila imwenyegho ukufa. 20 IMNDEWA kowahila iwanu awala iwakwalangula ghehile mmoyo mwao, lekeni womnoghela iwanu wose iwotenda ighanoghile. 21 Ona ghendo, imunu yehile ng'atsohepa baye ukutowighwa, lekeni iwana ihaki watsokombolighwa. 22 Ipinga yanoghile aku mwitwi mduhu chinu, ayo keghala na ipete ya nzahabu ili mmula mwa ingubi. 23 Chayobama imunu yana ihaki chomghalila ighanoghile, lekeni ukulolela kwa munu yehile komghalila imaya. 24 Kuna munu kopwililisa tsimali tsake kwa uluso, naye koghendelela kongetsighwa, lekeni yungi kakuwa na misi, naye kotsighila kuwa mhingwa. 25 Imunu yana ghumoyo mluso, ayo katsobweda, na ayula iyowanwesa wayaghe ghamatsi, naye watsomnwesa pfipfo. 26 Iwanu womlighita imunu ayula iyopfisa ghumtama, lekeni wombaliki imunu iyoutsa ghumtama. 27 Imunu iyobama ukutenda ighanoghile, ayo katsopata ighanoghile, lekeni ayula iyobama kutenda ighehile, ighehile ghatsomtsila. 28 Imunu iyehuwila tsimali tsake katsakughwa, lekeni imunu yana ihaki katsodegheta ka tsani bisi. 29 Imunu wowose iyowatenda iwanu iwali akaye yake waghaye, ayo katsopfuna libeho. Imunu mbotsi katsakuwa mtumwa wa munu yana ihekima. 30 Ghayotenda imunu yana ihaki gha mbiki ghwa ugima. Na imunu yana ihekima koikwegha imimoyo ya iwanu. 31 Ka imunu yana ihaki katsolihighwa bahano muisi, pfihi lelo kwa ayula iyehile na yana tsinzambi ng'atsolihighwa ng'ani bahano muisi baye?