1 Imwana yana ihekima komtegheletsa aba wake hayomfunda, lekeni imwana msughu ng'otegheletsa baye ahala hayokanyighwa. 2 Imunu kakuja ighanoghile kwa ghamatunda gha ghumlomo ghwake, lekeni awala iwaghutsu wosulukila ukutenda ughobo. 3 Ayula iyakwalangitsa mna ukulonga koukinga ugima wake, lekeni ayula yana ichilimilimi katselagha imwenyegho. 4 Imunu mdebwe ng'atsopata baye ichinu chayobama, lekeni imunu iyosang'ana kwa ukwiyunda katsopata ipfinu ipfimwenela. 5 Imunu yana haki ughutsu womwihila, lekeni ayula iyehile koghuma chinyala na kodesa. 6 Haki yomkinga imunu ayula iyakwanga mna tsinzila tsigholoke, lekeni ighehile ghomghwisa hasi imunu yana inzambi. 7 Kuna munu ketenda kana mali aku kahela chinu, na yungi ketenda kamhingwa lekani kana mali bwelele. 8 Tsimali nyingi tsa imunu tsodaha kuukombola ugima wake, lekeni imunu mhingwa ng'opfuka chinu chochose baye. 9 Imunu yana ihaki keghala na itala ilangatsa pfinoghile, lekeni iwanu wehile weghala na itala itsimika. 10 Chidandali chowatenda iwanu wesonge, lekeni hekima yakoneka kwa iwanu awala iwowategheletsa wayao. 11 Imali imunu iyopata himahima ng'aikawa baye ukuhunguka, lekeni yeye iyobama tsimali chidogho chidogho katsoyongetsa. 12 Chinu chaulolela ching'akawa ukutsa, ghumoyo ghotama, lekeni ching'alawila chakuwa ka ghumbiki ghwa ugima. 13 Iyobetsa ukufundighwa ayo kelagha imwenyegho, lekeni ayula iyotegheletsa ghamalaghitso katsoghwekighwa. 14 Ghayokufunda imunu yana ihekima gheghala na mbwimbi ya ugima, ghodaha kumwonzola imunu kulawa mna nyonzo tsa lifwa. 15 Yana tsimbutsi tsinoghile kotogholeka, lekeni nzila ya munu ing'ayotogholeka baye yoghala maghayo. 16 Chila munu yana tsimbutsi kotenda pfinu kwa ukumanya, lekeni imunu mbotsi kakwenetsa ubotsi wake. 17 Imsenga yehile kakughwa mna ghamaghayo, lekeni msenga iyotogholeka kowatenda iwanu wahone. 18 Ayula iyolema kufundighwa katsakuwa mhingwa na katsopata chinyala, lekeni ayula iyotoghola kufundighwa katsoheshimighwa. 19 Chaubama ching'alawila, ghumoyo ghodeng'elela, lekeni iwanu wabotsi wodeseka ukuleka ighehile. 20 Ayula iyelongotsa na iwanu wana ihekima, naye katsakuwa na hekima, lekeni ayula iyelongotsa na iwanu iwabotsi katselagha. 21 Ghamaghayo ghomlawila imunu ayula iyotenda tsinzambi, lekeni ukubweda kutsowalawila awala iwotenda ihaki. 22 Imunu yanoghile hayakufa kowalekela iwatsukulu wake tsimali, lekeni tsimali tsa imunu yana tsinzambi watsakwing'ghwa iwanu wana ihaki. 23 Mghunda ghwa munu imhingwa ghodaha kumela pfijo pfingi, lekeni iwanu wehile wopfiboka ipfijo apfo. 24 Imunu iyoleka kumfapula imwanaghe, ayo komhila, lekeni ayula iyomkunda imwanaghe ng'okawa baye ukumkanya. 25 Imunu yana ihaki kakuja mbaka libasu lyake lyomala, lekeni lida lya imunu yehile lyokala na nzala matsuwa ghose.