1 Ihekima katsenga ng'anda yake, ng'anda ina ngutso saba. 2 Kachinja wanyama wa chihungo, na idipfai yake kaihanganya ghoya, na imetsa yake kaika ghoya. 3 Kawatuma watumighwa wake mapinga, wakawakeme iwanu iwokala mpfidanando pfa ghumji. 4 "Iyali mbotsi na yatse akuno," na iyalihela tsimbutsi komlongela. 5 "Utse uje ichijo changu, unwe idipfai yanihanganye ghoya." 6 Leka mbuli tsa ubotsi, uwe mgima, winza nzila tsa ukumanya. 7 Iyomkembela munu iyobetsa kobokela ichinyala, iyomanila munu yehile kobokela maligho. 8 Uleke kumlonga imunu wa kubetsa hela katsokuhila, umlonge imunu yana ihekima naye katsokukunda. 9 Mlangulitse yana ihekima naye kakongetseka ihekima, umfunde munu yana ihaki yaghendelele ukumanya. 10 Ukumpfuka IMNDEWA kuko mwanduso ghwa ihekima, na ukummanya Iyaenzeluke kuko ukuwa na tsimbutsi.

11 Kwa apfila nene hekima nitsokongetsela ghamatsuwa ghako, na imiyaka yako ya ukukala mgima itsakongetseka. 12 Ung'awa na hekima, ihekima yako itsokubwedesa, na ung'awa mtalatsi, kutsoghaya ghumwenyegho. 13 Ipinga mbotsi kana chilimilimi, ng'omanya chinu baye wala kahela chinyala. 14 Kokala hana ghumlango ghwa ng'anda yake mna pfidanando pfa ghumji, 15 Kowakema iwanu iwobita mnzila, iwoghenda kuna tsing'onde tsawo. kolonga, 16 "Mwemwe imli wabotsi, mwingile amno," na komlongela iyalihela tsimbutsi, 17 "Ghamatsi ighebighwe ghamta, na ichighate ichikujighwa kwa ukwipfisa chamta sideke." 18 Lekeni iyali mbotsi ng'omanya baye ka amwo mna iwafile, iwagheni wake wa hasi ghendo kutsimu.