1 Kuya ndola iwanu pfawotendelighwa pfihile muisi. Mbona wolila lekeni haduhu munu wowose wa ukuwakanza. Iwowadidimitsa tsawana ngupfu nyingi lekeni wawo tsawahela ghendo imunu wa ukuwakanza. 2 Apfo nene nilongela nimwenyegho, "Wabweda awala iwafile kubita awala iwoghendelela kukala wagima. 3 Lekeni yabwedile kubita awo wose weli ayula yang'ana yoneke, ayo yang'ana yone aghala ighehile ighotendighwa muisi." 4 Mbona iwanu pfawohenyeka mna tsing'onde tsawo mbaka wobweda, wobweda kwaapfila chila munu komwonela gele miyaghe, kobama yambite miyaghe. Agho nagho si chinu ghendo, gheghala na ukuwinga libeho. 5 Imunu mbotsi ng'osang'ana baye, na kotsigha kwa ukwikoma mwenyegho na inzala. 6 Ng'apfu kukala na chidogho aku ghumoyo ghukala tulu kubita kuwa na pfingi na ghamaghayo. Ukutenda apfo kweghala na ukuwinga libeho. 7 Kuya mbona chinu chimwe mna isi ichili bule ghendo. ghendo. 8 Nimwona munu kayeka yeka, kahela mwana wala ndughu, naye ng'oleka kusang'ana baye, na tsimali tsayali natso ng'atsimwenela baye, naye ng'eghutsa apfi baye, "Angu nimuhenyekela nani mbaka ndeke kuhomola tsimali tsangu?" Alyo nalyo si chinu ghendo baye ila ukuhenyeka kuliyeka. 9 Ng'apfu kuwa weli kubita kuwa munu yumwe kwaapfila watsolihighwa pfinoghile kwa isang'ano yawo. 10 Haitsolawila yumwe kaghwa, miyaghe katsomwinula. Lekeni katsochona ayula iyaliyeka hayatsakughwa na kuduhu munu wa kumwinula. 11 Pfipfila iwanu weli wang'awasa hamwe wotsumbuka, lekeni imunu yang'awa yaliyeka yodahatse ukutsumbuka? 12 Munu yumwe kodaha kutsidiwa ngupfu, lekeni wang'awa weli ng'awodaha kutsidiwa ngupfu baye. Mitsabi midatu ing'apfoghosighwa hamwe ng'aisumka ukudumka baye. 13 Ng'apfu imsongolo mhingwa yana ihekima, kubita mfalume mzehe mbotsi yoleka kutegheletsa aghala ighanoghile ghayokanyighwa, 14 kodaha kuwa mfalume hata ka kolawila kuna ligeletsa, na hata ka iwamweleke tsa wahingwa. 15 Tsaniwona iwanu wose iwokala muisi, womuwinza imsongolo ayula iyasolile hanu ha mfalume. 16 Iwanu iyawatawale tsawakala wengi ng'ani. Hata apfo awala iwatsakoneka hambele ng'awatsomdeng'elela baye. Agho nagho bule ghendo, gheghala na ukuwinga libeho.