1 Ka apfila wang'onzi iwafile pfawotenda ghamafuta ighonung'ila ghoya ghanung'e, pfipfo ubotsi chidogho pfauhinya ihekima na iheshima. 2 Ghumoyo ghwa munu yana ihekima ghomlongotsa ukutenda ighanoghile, lekeni imunu mbotsi ghumoyo ghwake ghomwaghisa. 3 Imunu mbotsi hata yang'anga mnzila komanyika, komlangusa chila munu yamanye ka yeye mbotsi. 4 Chilongotsi yang'akughudubukila uleke kuka hanu aho, ukwidika lughalugha kodaha kutenda matotso ghako makulu ghaleghusighwe. 5 Kuya mbona chinu chihile ichitendeka muisi, ichinu acho chotendighwa na iwatawala, 6 woweng'a ukulu iwanu wabotsi, na iwanu matajili woweka hasi. 7 Niwona iwatumwa wodina falasi, na iwakulu woghenda kwa maghulu ka watumwa. 8 Yohimba lipondo kodaha kwingila imwenyegho, yobomola ubanda inzoka katsomluma. 9 Imunu iyotula ghamabwe ghomlagha imwenyegho, na iyobatsula ligogo pfipfila lyomlagha mwenyegho. 10 Tsobamighwa ngupfu nyingi kwa imunu yotumila hoya dughi, lekeni ukutumila ihekima komtenda imunu yabwede. 11 Imunu kodaha kumtenda inzoka yaleke kumluma, lekeni ka inzoka kolongola ukumluma chatendile bule ghendo. 12 Ghamalonga gha imunu yana ihekima ghomtenda yatogholighwe, lekeni ghamalonga gha imunu mbotsi ghomuhinya imwenyegho. 13 Imunu mbotsi kakwandusa kulonga mbuli tsa ubotsi, na komalitsila kulonga kwa ukalukwale wihile. 14 Pfipfila imunu mbotsi kolonga chaka, na kuduhu munu iyomanya ighakutsa. Yuhi iyodaha kumlongela ighakutsa na ighatsolawila hayatsakufa? 15 Imunu mbotsi kakwipfa kwa isang'ano yake mbaka ng'omanya baye inzila ya kughendela kuna ghumji ghwake. 16 Kutsoghaya ghwe isi mfalume wako yang'awa mbwanga, na pfilongotsi wako wang'atenda chihungo matsuwa ghose. 17 Kutsobweda ghwe isi mfalume wako yang'awa mwana wa iwanu wakulu, na iwakulu wako wang'aja ichijo mna ichipindi ichitogholeka, ili wapate ngupfu na si kwa ukupatika baye. 18 Ka imunu yang'awa mdebwe ichiswili chonyeta, na udebwe ung'ongetseka ing'anda yosulula. 19 Chihungo chotendighwa ili iwanu waseke, idipfai yosangalamsa ugima, lekeni ifetsa yotenda imunu yapate chila chinu. 20 Mna ghumoyo ghwako uleke kumlighita mfalume, wala uleke kumlighita imunu tajili kuna ichiheleto chako chuwasa, kwaapfila ichideghe wa kulanga katsohulika, na katsoghuluka yawaghalile tsimbuli tsaulonga.