1 Apfo nifikitsa na kukaghula kaghula mna agho ghose, kuya nitanga iwanu iwana haki na iwana ihekima na aghala ghose ghawotenda ghamna ghamoko gha Imulungu, na kuduhu iyomanya ka iwanu watsowakunda au watsowohila. 2 Chinu chimwe chihile chowalawila wose, chomlawila imunu yana ihaki na iyehile, chomlawila imunu iyanoghile na ing'ayanoghile, chomlawila imunu yelile na iyakodotsoke, pfipfila chomlawila iyolapfa nambiko na ing'ayolapfa nambiko. Pfayali Imunu iyanoghile pfipfo pfayali imunu yana tsinzambi, pfayali imunu iyelaha pfipfo pfayali imunu iyopfuka kwilaha. 3 Alino liha ghendo mna ghose ighotendeka muisi, chinu chimwe chihile chowalawila wose. Pfipfila matsuwa ghose hawakuwa wagima wawo wotenda ghehile, ukalukwale umema mna imimoyo yawo, na hambele wose wakufa. 4 Imunu wowose iyali hamwe na iwanu wagima ayo kana lolelo, ng'apfu uwe yumbwa iyali mgima kubita kuwa simba yafile. 5 Kwaapfila iwanu wagima womanya ka watsakufa, lekeni iwafile ng'awomanya chochose baye, wawo ng'awotsoghwekighwa chinu chochose baye kwaapfila wasemwighwa ghendo. 6 Apfila pfawang'ali wowakunda iwanu, na apfila pfawang'ali wowehila iwanu, na apfila pfawang'ali wowonela gele iwanu, kose kuhupa hamwe nawo, wao wahela chinu chochose mna ghose ighotendeka muisi. 7 Lelo ghenda ukaje chijo chako aku kodeng'elela, na ukanwe dipfai yako usangalamke kwaapfila Imulungu katsitoghola tsisang'ano tsako. 8 Matsuwa ghose upfale tsinguwo tsinzelu na wibake ghamapfuta mwitwi. 9 Ukale ghoya na mwehe wako yumkunda matsuwa ghose, mna matsuwa ghako gha ukudununzika, ghamatsuwa agho ghawing'ighwe na Imulungu mna isi aino, kwaapfila alyo lilyo lyawing'ighwe ahala haukala mgima, na ahala hauhenyeka kusang'ana tsing'onde tsako muisi. 10 Chochose chubama kutenda, chitende kwa ngupfu tsako tsose, kwaapfila ako kutsimu kwaughenda kuduhu sang'ano, wala kufikitsa, wala ukumanya, wala ihekima. 11 Kuya mbona chinu chingi muisi mno, iwohuma mna ukutsuma si awala iwadahile ukutsuma baye, wala iwohuma kung'ondo si awala wana tsingupfu baye, wala iwopata chijo si awala iwana ihekima baye, wala iwopata utajili si awala wana tsimbutsi baye, lekeni tondokela ling'alawila, lyowalawila wose. 12 Kwaapfila imunu ng'omanya ka agho ghatsolawila tsuwachi, ka apfila iwasomba pfawakonzeka mna wapfu, na wapfideghe pfawakonzeka mna ghumtegho, pfipfo iwanu pfawakonzeka ahala ighehile haghowalawila kwa ukwidukitsa.

13 Kuya nene niyona ihekima pfaili muisi, ichinu acho nene chinikangawatsa, 14 tsahana mji ghumwe mdodo ghuna iwanu chidogho, kuya katsa mfalume yumwe yana ingupfu kaghutsingila na katsenga ngome ili yaghutowe. 15 Lekeni mumo mna ghumji tsahana mhinghwa yumwe yana ihekima, kaghukombola ghumji agho kwa ihekima yake. Lekeni kuduhu munu yamkumbuke mhingwa ayo. 16 Lelo nene nolonga ihekima inogha kubita tsingupfu, hata ka ihekima ya munu mhingwa yobetsighwa, na ghayolonga ng'aghotegheletsighwa baye. 17 Ng'apfu kumtegheletsa imunu yana ihekima iyolonga lughalugha, kubita kumtegheletsa mfalume iyodalamka mna mtingano ghwa iwabotsi. 18 Ihekima inogha kubita tsisilaha tsa ing'ondo, lekeni munu yumwe yana nzambi kohinya pfinu pfngi ipfinoghile.