1 Chila chinu ichilawila muisi, cholawila mna chipindi chayekile Imulungu. 2 Keka chipindi cha ukwelekighwa na chipindi cha ukufa, chipindi cha ukuhanda na chipindi cha ukupfuna. 3 Pfipfila keka chipindi cha ukukoma, na chipindi cha ukuhonetsa, chipindi cha ukumwagha na chipindi cha ukutsenga, 4 chipindi cha ukulila na chipindi cha ukuseka, chipindi cha ukudomboketsa na chipindi cha ukupfina. 5 Kuya keka chipindi cha ukwasa ghamabwe na ichipindi cha ukudondola ghamabwe, ichipindi cha ukuhabatila na chipindi cha kuleka kuhabatila. 6 chipindi cha ukubama na chipindi cha ukwaghisa, chipindi cha kwika ghoya na chipindi cha ukwasa, 7 chipindi cha ukudegha na chipindi cha ukudadatsa, chipindi cha ukwinyamala tulu na ichipindi cha ukulonga, 8 chipindi cha ukukunda na chipindi cha ukwihila, chipindi cha ing'ondo na ichipindi cha ukukala tseghamba. 9 Angu imunu iyosang'ana ng'onde ng'omu yopata choni kwa ing'onde yake? 10 Nene mbona sang'ano ng'omu imunu yeng'ighwe ne Imulungu yaihenyekele. 11 Imulungu katenda chila chinu chinoghile kwa chipindi chake. Kamtenda imunu yabame ukumanya ipfinu ipfitsolawila hambele, lekeni imunu ayo ng'odaha baye ukumanya aghala ghayotenda Imulungu kulawa hayakwanzila mbaka hayotsighila. 12 Nomanya ka kuna chinu chimwe chiliyeka ichinoghile kwa imunu, nacho ukudeng'elela na ukutenda ghanoghile chipindi chose chayokala mgima. 13 Pfipfila chila munu kobamighwa ukuja, ukunwa na ukudeng'elela aghala ghayopata kulawa mna tsisang'ano tsake tsayotenda kwaapfila acho chinu cha ukugwekighwa kulawa kwa Imulungu. 14 Nomanya ka chochose chayotenda Imulungu chokala matsuwa ghose ing'aghohupa. Kuduhu ichikongetsighwa wala ichihungutsighwa, Imulungu kotenda apfo ili iwanu wampfuke yeye. 15 Ichilawila sambi tsachilawila, ichitsolawila hambele ma tsachilawila, naye Imulungu koghatenda aghala ighapfosile ghoye keli.

16 Kuya mbona chinu chingi muisi, kuna libalatsa lya ukuhighila, na ghehile ghabaho, na hanu ha ukupata haki, ighehile nagho ghotendeka baho. 17 Apfo nilongela mna ghumoyo ghwangu nilonga, "Imulungu katsowahigha iwanu iwalihela nzambi na iwehile, kwaapfila keka chipindi chake kwa chila chinu na kwa chila sang'ano." 18 Pfipfila nilongela mna ghumoyo ghwangu ka Imulungu kowaghetsa iwanu, ili webone ka wawo weghala na iwanyama. 19 Kwaapfila ichiwalawila iwanu chicho ichiwalawila iwanyama, pfayakufa imunu pfipfo pfayakufa imnyama, awo wose wohumula pfipfo, apfo imunu kahela chinu chongetseke cha ukumbita imnyama, agho ghose si chinu ghendo baye. 20 Wose wakufa na woghenda hanu hamwe. Wose wolawa mna litimbwisi, na wose watsakuya mna litimbwisi. 21 Yuhi iyomanya ka iloho ya imunu yoghuluka mchanya na iloho ya imnyama yohulumka hasi mna lidongo? 22 Baho nitanga ka kuduhu chinu chinoghile ng'ani kwa imunu kubita ukudeng'elela aghala ghayapatile kulawa mna isang'ano yake, kwaapfila acho chicho chayekilighwe. Yuhi iyodaha kumlongela imunu aghala ighatsolawila yeye hayatsakufa?