1 Wagholele iwanu ipfinu pfako kwaapfila matsuwa mengi ighakutsa kutsopata keli. 2 Uwagholele wanu saba chawinacho, hata wang'awa wanane, kwaapfila ng'umanya baye chinu chachi chihile chitsolawila mna isi. 3 Libingu ling'awa tito imvula yotowa muisi, ghumbiki ghung'aghwila kusini au kasikazini, aho aghukughwila baho haghutsokala. 4 Iyololesa libeho pfaliduma ng'atsohanda mbeghu baye, na iyololela libingu pfalili ng'atsopfuna chinu baye. 5 Ka pfila pfang'umanya libeho libita nzila yachi, au apfila imipate ya mwana mdodo pfaikula munda mwa mai wake, pfipfila ng'aumanya baye tsisang'ano tsayosang'ana Imulungu iyaumbile pfinu pfose. 6 Nemitondo uhande tsimbeghu, na ahipfika nemihe uleke kwipfa ukuhanda tsimbeghu, kwaapfila ng'umanya baye mbeghu tsihi itsikwota, ka tsa nemitondo au tsanemihe, na tsing'ota tsose itsakuwa pfinogha. 7 Ukona ghumwanga kwamta, na pfinogha ghendo tsinenge ukwona litsuwa pfalilawa chila nemitondo. 8 Imunu yang'akala mgima miyaka mingi, yadeng'elele imiyaka ayo yose iyokala, lekeni yakumbuke matsuwa ighakutsa ghatsakuwa gha ukughaya nagho ghatsakuwa mengi. Ghose ighotsolawila hambele bule ghendo.

9 Ghweghwe msongolo, uudeng'elele usongololo wako, ghumoyo ghwako ghukutende udeng'elele mna ghamatsuwa gha usongolo wako. Utende achila chaghubama ghumoyo ghwako na achila chaukona kwa tsinenge tsako. Lekeni umanye ka Imulungu katsokuhigha kwa agho ghose ghautenda. 10 Apfo uleke kwalangula chinu chochose mna ghumoyo ghwako, na uleke kwalangula apfila ilukuli lwako pfalughaya, kwaapfila usongolo na ukukala miyaka mingi kose si chinu baye.