1 Yuhi iyali ka imunu yana ihekima? Yuhi yomanya ipfinu pfapfili? Ihekima yotenda ichihanga cha imunu chidedemke, na yotenda ichihanga acho chileke koneka china usungu.

2 Nene nowalongela apfino: Mkinde malaghitso gha mfalume kwaapfila tsakwilaha kwa Imulungu. 3 Uleke kusumka kulawa hambele hake, wala uleke kughendelela ukutenda ighehile, kwaapfila mfalume kodaha kutenda chochose ichimnoghela. 4 Kwaapfila malaghitso gha mfalume ghana ngupfu, yuhi yodaha kumghutsa, "Utenda choni?" 5 Iyokinda ghamalaghitso ghake, ighehile ng'aghatsompata baye, na yana ihekima katsomanya ghamatsuwa ighanoghile na apfila pfayatsotenda. 6 Kwaapfila chila chinu chotendeka mna matsuwa ghake, na cholawila kwa nzila yake, hata ka imunu kobita mna maghayo makulu. 7 Kwaapfila ng'omanya baye ghamatsuwa ighakutsa hambele, lelo yuhi iyodaha kumlongela ighatsolawila? 8 Kuduhu imunu yodaha kumghoma yaleke ukufa, wala kuduhu iyodaha kughoma litsuwa lyake lya ukufa lileke ukupfika. Ka apfila pfaili kuna ing'ondo imunu ng'odaha baye kuhona baye, na ighehile ng'aghodaha baye kumkombola imunu iyehile.

9 Ghose aghano nighona haning'ali nifikitsa ighotendighwa mna isi aino, apfila imunu pfayodaha kumdidimitsa miyaghe na kumdununza. 10 Kuya mbona iwanu iwehile pfawotsikighwa, iwanu iwatsowele kwingila na kulawa hanu helile, awala iwatunyighwe mna imiji iyawang'ali wotendagha ighehile. Alino nalyo si chinu ghendo baye. 11 Ka ighehile ighotendighwa na iwanu ng'aghohighighwa himahima baye, apfo imimoyo ya iwanu nayo yosumkila ukutenda ighehile. 12 Hata ka imunu yana nzambi katenda ighehile mala miya, naye koghendelela kukala mgima matsuwa mengi, lekeni nene nomanya watsobweda awala iwompfuka Imulungu. 13 Lekeni kwaapfila iwanu wehile ng'awompfuka Imulungu baye, wawo ng'awatsobweda baye. Wawo watsakufa wang'ali wadodo. 14 Mna isi aino hana chinu chimwe ichitendighwa, iwanu wana ihaki wotendelighwa aghala ghawobamighwa kutendelighwa iwanu wehile, na iwanu wehile watsotendelighwa aghala ghawobamighwa kutendelighwa iwanu wana ihaki. Alino nalyo nolonga si chinu ghendo baye. 15 Apfo nene nokomangitsa iwanu wadeng'elele, kwaapfila ichinu chinoghile ghendo kwa imunu mna isi aino, ukuja, ukunwa na ukudeng'elela. Ukudeng'elela ako kughendelele mna ghamatsuwa ghake ghose ghayeng'ighwe na Imulungu yasang'ane muisi. 16 Nene hanifikitse nimanye ihekima na ukwona ighotendeka muisi, nitanga kodaha kukala meso chilo na misi, 17 baho mbona ghose ghayatendile Imulungu. Kuduhu munu iyomanya aghala ighotendeke muisi. Hata ka imunu kohenyeka yaghamanye, ng'odaha baye kughamanya. Imunu yana ihekima kodaha kulonga koghamanya lekeni kumbe ng'oghamanya ghendo baye.