1 Ng'apfu litwagha linoghile kubita mapfuta ighonung'ila. Ng'apfu litsuwa lya ukufa kubita litsuwa lya ukwelekighwa. 2 Ng'apfu kughenda kuna ing'anda ina ichililo kubita kughenda kuna ing'anda ina ichihungo, kwaapfila iwanu wose watsakufa, apfo iwanu iwagima wobamighwa alyo walikumbuke. 3 Ng'apfu ukutsinika kubita ukuseka, kwaapfila ichihanga chitsinika chotenda ghumoyo ghubwede. 4 Ghumoyo ghwa imunu yana ihekima ghwa mghati mwa ing'anda ina ichililo, lekeni ghumoyo ghwa imunu mbotsi ghwa mghati mwa ing'anda ina ichiseko. 5 Ng'apfu kuhulika ukukanyighwa na imunu yana ihekima kubita kuhulika wila wa imunu mbotsi. 6 Kwaapfila chiseko cha imunu mbotsi cheghala na tsimiwa itsitananuka mmoto, agho nagho bule ghendo. 7 Ukubunza komtenda imunu yawe mbotsi, na ukubokela hongo kohinya ghumoyo. 8 Ukutsigha kwa ichinu kunogha kubita ghumwanduso ghwake. Na iyodudumila mmoyo kanogha kubita yana ichidandali. 9 Uleke kusumka kona maya, kwaapfila imaya yokala mghati mwa imimoyo ya iwabotsi. 10 Uleke kulonga, "Hebali matsuwa gha ghumwande tsaghanogha kubita gha sambi?" Kwaapfila ung'aghutsa apfo kwahela hekima. 11 Ihekima inogha ka ulisi, na inogha kwa awala wose iwali wagima. 12 Kwaapfila ihekima yodaha kumkinga imunu ka apfila ifetsa pfaidaha kumkinga. Chinu chikulu cha ukumanya, ihekima yokinga ugima wa imunu yalinayo. 13 Wifikitse tsisang'ano tsa Imulungu, kwaapfila yuhi iyodaha kuchigholosa chayapfedule Imulungu? 14 Mna ghamatsuwa gha ukubweda, udeng'elele, mna ghamatsuwa ukughanzika wifikitse aghano, kwaapfila agho ghose meli Imulungu kaghatenda ghalawile ili imunu yaleke kumanya ighatsolawila hambele hake. 15 Mna ghamatsuwa ghangu gha ugima ighali si chinu baye, nene nighona aghano, kuna imunu iyana ihaki iyakufa aku kotenda ighali gha haki, na kuna imunu iyehile iyokala mgima matsuwa mengi aku koghendelela ukutenda ighehile. 16 Uleke kuwa imunu yana ihaki kubitilitsa, wala uleke kuwa imunu yana ihekima kubitilitsa. Heule wilagha ghweghwe mwenyegho? 17 Uleke kuwa imunu yehile yabitilitse, wala uleke kuwa mbotsi! Hebali ufe ng'ana matsuwa ghako ghapfike? 18 Pfinogha ulikinde lya mwanduso na lya keli uleke kulileka, kwaapfila imunu iyompfuka Imulungu katsoghahepa ghose agho. 19 Hekima yomtenda imunu yawe na ngupfu ng'ani kubita watawala kumi iwali mna ghumji. 20 Ona ghendo, kuduhu munu iyana ihaki mna isi iyotenda ghanoghile matsuwa ghose bila ukutenda nzambi. 21 Uleke kwika mna ghumoyo ghwako chila chinu chawolonga iwanu hela kutsomuhulika mtumighwa wako imwenyegho kokulighita. 22 Kwaapfila hata ghweghwe mwenyegho mna ghumoyo ghwako kuwalighitagha iwanu wangi.

23 Agho ghose nighalinga kwa ihekima, nilongela: "Nobama niwe imunu yana ihekima," lekeni ihekima yakutali ghendo na nene, 24 ya kutali ng'ani na ipfisika, yuhi iyodaha kuitanga? 25 Apfo nighutuka, na ghumoyo ghwangu ghubama niimanye ihekima na ipfinu pfilibaho, na nimanye ka ighehile ubotsi, na ka ubotsi ukalukwale. 26 Chinu chimwe chanitangile china usungu ng'ani kubita ukufa, ipinga iyali mtegho na nyonzo, na ghamoko ghake ighali ka minyololo, imunu ayo iyomnoghetsa Imulungu katsomhepa, ila yana tsinzambi katsomwonza. 27 Lelo muhubili kolonga, "Agho ghagho ghanitangile hanilingile chinu chimwe na chinu chingi. 28 Haning'ali nighendelela ukubama nitange ipfinu apfo, nitanga keli chinu chimwe. Mna wamale elufu imwe nimwona mmale yumwe yotogholighwa, lekeni mna wapinga wose elufu imwe simwonile baye hata yumwe yotogholighwa. 29 Lola! Nitanga chinu chimwe, Imulungu tsakawaumba iwanu wanogha, lekeni wawo webamila ukutenda pfawo wenyegho."