1 Apfo nilongela mwenyegho, "Leka nighetse chila chinu ichinitenda nideng'elele." Lekeni mbona ukutenda apfo nako si chinu ghendo baye. 2 Nilonga, "Ukuseka nako ubotsi, angu ukudeng'elela nako kuna choni?" 3 Tsanifikitsa mna ghumoyo ghwangu nilole pfanidaha kulusangalamsa lukuli lwangu kwa kunwa imbwali, akuno ghumoyo ghwangu ghung'ali ghulongotsighwa na ihekima. Tsanibama mbone chinu chachi chinoghile iwanu chawobamighwa ukutenda kwa ghamatsuwa madodo ghawokala muisi. 4 Tsanitenda pfinu pfikulu, nitsengela mang'anda na nilima mighunda ya minzabibu, 5 tsanitendela bostani na imighunda, kuko nihanda chila mbiki ghwa matunda. 6 Nihimba matsimbu gha ghamatsi ili nighelele imibiki ayo. 7 Nighula watumwa, wapinga na wamale na wangi tsawonekela mng'anda mwangu. Tsanikala na mali nyingi, ng'ombe, ng'olo na mene kubita imunu wowose iyanilongolele kukala Yerusalemu. 8 Nilundikila fetsa na nzahabu kulawa kuna tsihatsina tsa wafalume na kuna tsiisi. Tsanipata iwanu iwakwimba wamale na wapinga na wapinga iwanitendile nideng'elele ng'ani. 9 Tsanikala munu mkulu iyomanyika ng'ani kubita wose iwanilongolele kukala Yerusalemu, mna ghose aghano nighendelela kuwa na ihekima yangu. 10 Chila chinu chanibamile tsanichipata, na tsanitenda chila chinu ichideng'elesa ghumoyo ghwangu, kwaaapfila ghumoyo ghwangu tsaghudeng'elela, na alino tsalikala ghweko lya tsisang'ano tsangu. 11 Kuya nifikitsa ghose ghanitendile na ghamaghayo ghanipatile kwa tsisang'ano atso. Lekeni nitanga agho ghose si chinu baye, gheghala na ukuwinga libeho, wala kuduhu chochose chanipata mna isi. 12 Kuya nyandusa kwipfikitsa ihekima, lukwale na ubotsi chinu chachi? Nighutsa nimwenyegho "Mfalume yang'amalitsa ukutawala, imunu iyosola hanu hake kobamighwa yatende choni ing'achina chitendeke?" 13 Baho mbona ihekima inogha kubita ubotsi, ka apfila ghumwanga pfaghunoghile kubita ichisi. 14 Imunu iyana ihekima kotumila ka pfayotumila tsinenge, kakwona kwoghenda, lekeni imunu mbotsi koghenda mna ichisi. Hata apfo nitanga ka imunu yana ihekima na imbotsi wose wohupila lumwe. 15 Kuya nilongela mna ghumoyo ghwangu, "Ghatsompata imunu mbotsi pfipfila ghatsonipata nene, apfo ning'awa na ihekima iyongetseke nitsopata choni?" Nifikitsa nilonga, "Agho nagho si chinu ghendo baye." 16 Kwaapfila kuduhu iyomkumbuka yana ihekima, wala imbotsi, mna ghamatsuwa ighakutsa wose watsosemwighwa, mana pfayakufa imunu yana ihekima pfipfo pfayatsakufa imunu mbotsi! 17 Apfo niwihila ugima, kwaapfila ighatendeke mna isi tsanighona gheha kuna nene. Ghose tsaghakala si chinu baye, gheghala na ukuwinga libeho. 18 Chila chinu chanisang'ane mna isi aino tsanichona chiha, kwaapfila tsanibamighwa nimlekele imunu iyakutsa hachughu hangu. 19 Kuya yuhi yomanya ka katsakuwa na hekima au katsakuwa mbotsi? Ghose ghanisang'ane kwa ihekima yangu mna isi aino ghatsakuwa ghake, alyo nalyo si chinu ghendo baye. 20 Apfo ghumoyo ghwangu ghutenyuka kwa tsisang'ano tsose tsanitendile kwa ukuhenyeka mna isi. 21 Mana imunu kodaha kusang'ana ing'onde yake kwa ihekima, ukumanya na tsimbutsi, kuya kobamighwa yamlekele imunu yungi yang'apfisang'anile pfose pfayali napfo. Pfipfila alyo nalyo si chinu baye, nalyo liha ghendo. 22 Angu imunu yopata choni kwa tsisang'ano tsake tsayotenda kwa ukuhenyeka mna isi? 23 Kwaapfila matsuwa ghake ghose kosang'ana kwa ukughaya, na ukudununzika, hata nechilo ng'obwihila baye ukwalangula. Alyo nalyo si chinu ghendo baye. 24 Kuduhu chinu ichinoghile kwa imunu, ila ukuja na ukunwa, na ukudeng'elela sang'ano yake. Alyo nalyo nilyona lyolawa kwa Imulungu, 25 kwaapfila bila Yeye, yuhi iyodaha ukuja na ukudeng'elela? 26 Mana Imulungu komwing'a imunu iyomnoghela, ihekima, tsimbutsi na indeng'elo, lekeni komwing'a imunu yana tsinzambi sang'ano ya ukukunga na ukumemetsa, kuya komwing'a iyomnoghela yeye. Alyo nalyo si chinu ghendo, leghala na ukuwinga libeho.