1 Nene ningila mna ibostani yangu,

pinga wangu na mwali wangu,

nokunga hamwe ghamanukato gha manemane na ipfihungo ipfinung'ila ghoya,

ndiya uki wangu uli msegha,

nuwa idipfai yangu na ghamatombo ghangu.

Mje na mnwe mwemwe sale tsangu,

Mnwe ghendo mwemwe wanoghelwa wangu.

2 Tsaniwasa, lekeni ghumoyo ghwangu ng'aghuwasile baye,

kwaapfila ayula mnoghelwa wangu kogong'onda ghumlango.

Nipfughulile ghwe pinga wangu, mnoghelwa wangu,

njiwa wangu, ing'ahungukighwe na chochose baye,

litwi lyangu linyoda litungwe,

mvili tsangu tsipfulumka na ghamawagha gha nechilo.

3 Nene ma nitsula ligwanda lyangu,

pfihi nipfale keli?

Nene nighahopfugha ghamaghulu ghangu,

pfihi nifinale keli?

4 Baho mnoghelwa wangu kengitsa ghumoko ghwake hana ichonzo,

na ghumoyo ghwangu ghumdeng'elela.

5 Nyinuka nimpfughulile mnoghelwa wangu,

ghamoko ghangu tsaghamema mapfuta ighonung'ila gha manemane,

hanikindile ghumlango nipfughule,

ipfidole pfangu pfing'ali pfilaghatsa manemane.

6 Nimpfughulila ghumlango mnoghelwa wangu,

lekeni kumbe tsakahunduka koka,

ghumoyo ghwangu tsaghutenyuka hanitangile koka,

nimbama lekeni simwonile baye,

nimkema lekeni ng'anyidike baye.

7 Iwakalitsi iwang'ali wotsunguluka ghumji wambona,

wanitowa na wandagha,

na iwakalitsi wa ubanda waniboka ishela yangu.

8 Lelo nowadedetsa mwemwe wapinga wa Yerusalemu,

mng'amwona mnoghelwa wangu,

mlongeleni koninoghela mbaka nene notsilika.

9 Ghwe ipinga yunoghile kubita mapinga wose,

angu ayo mnoghelwa wako yanoghiletsa kuwabita wamale wose?

Angu yanoghiletse mbaka ghweghwe utudedetse apfo ghendo?

10 Mnoghelwa wangu komelemeta na kana ngupfu,

kanogha kubita iwamale elufu kumi.

11 Litwi lyake ka nzahabau inoghile kubita tsose,

tsimvili tsake tsipfoghoseka,

na nitu ka bondwa.

12 Tsinenge tsake ka njiwa iwakalile mmbambali mwa ichikolongo,

iwoghile ghamatsiwa mmbali mbali mwa ipfikolongo.

13 Ghamakanza ghake gheghala na likonde linoghile,

ilimemile upfumba unung'ila ghoya,

milomo yake ka maluwa gha yungiyungi,

idononda ghamadone gha manemane.

14 Ghamoko ghake ka ng'weku tsa nzahabu,

ikighwe unzolingo kwa ghamabwe ighanoghile gha zabarajadi,

ilukuli lwake ka membe ya nembo,

ikighwe unzolingo wa ghamabwe ighanoghile gha yakuti.

15 Imighulu yake ka ngutso tsa malumalu,

itsihimikighwe mna imisingi ya nzahabu,

kema ka chidunda cha Lebanoni,

china imibiki ya mikataluba.

16 Ghumlomo ghwake ghumema malonga ghalimta,

apfo yeye kanogha ghendo.

Ayu yuyo mnoghelwa wangu, ayu yuyo sale yangu,

mwemwe mapinga wa Yerusalemu.