1 Lola pfaunoghile mnoghelwa wangu,

ghweghwe kunogha ghendo,

nenge tsako itsighubikighwe na lishela tsinogha ka njiwa,

tsimvili tsako tsodimka ka mene iwohulumka mna ichidunda cha Gileadi.

2 Matsino ghako matselu ka ng'olo mapinga iwatselu iwaganighwe imighala sambi,

iwoyile kulawa ukoghetsighwa,

chila yumwe kakweleka wana weli weli,

na kuduhu hata yumwe ing'akwelaka mwana.

3 Milomo yako yeghala na utsi mdung'u,

ghumlomo ghwako ghunogha,

ghamakanza ghako ighaghubikighwe na lishela gheghala na tunda ilikemighwa komamanga libatsuke.

4 Isingo yako inoghile yeghala na ghumnala ghwa Daudi,

ighutsengighwe pfinoghile ghuwe hanu ha ukwikila tsisilaha,

mchanya mwake watundika tsingao elufu, tsose tsa maasikali iwadahile ukwitowa.

5 Matombo ghako meli ghanogha ka iwana weli wa imbala iwoneke hamwe,

iwakuja imitsani haghatighati ha ghamaluwa gha yungiyungi.

6 Nitsoghenda kuna ichidunda cha manemane,

na kuna ichighongo cha upfumba,

mbaka kunze kwenzeluke

na ichisi chuke

7 Ghweghwe mnoghelwa wangu kunogha ghendo,

ghweghwe kwahela chochose ichihunguke.

8 Ghwe mwali wangu yanikukwela utse kulawa Lebanoni,

utse tuwe wose kulawa Lebanoni,

uhulumke kulawa chidanando cha ichidunda cha Amana,

uhulumke utse kulawa chidanando cha ichidunda cha Seniri na cha Herimoni,

utse kulawa kuna tsimango tsa simba,

na kulawa kuna ipfudunda pfawokala waduma.

9 Kughukangawatsa ghendo ghumoyo ghwangu,

ghweghwe mwali wangu, pinga wangu yanikukwela,

kughukangawatsa ghendo ghumoyo ghwangu,

ahala haundolile mala lumwe kwa tsinenge tsako,

na kwa ghumkufu ghumwe ghwaupfalile msingo.

10 Lola ukukunda kwako pfauli mta,

mwali wangu, pinga wangu,

lola unoghelo wako pfauli mta kubita dipfai,

ghamapfuta ghaubakale ghonung'ila ghoya kubita ghamapfuta ghose ighonung'ila.

11 Milomo yako yochilika uki, ghwe mwali wangu,

lulimi lwako luna uki na matsiwa,

tsinguwo tsaupfalile tsonung'ila ghoya ka mikataluba ya Lebanoni.

12 Pinga wangu, mwali wangu

ghweghwe kweghala na likonde ilipfisike,

kweghala na mbwibwi idiwighwe.

13 Ghweghwe kweghala na pfipughuti pfa mibiki ya mikomamanga,

haikula yakweleka ghamatunda ighalimta,

na kweghala na mibiki ikweleka hina na nado,

14 nado na zafarani, mchai na mdalasini,

hamwe na chila mbiki ghwa upfumba na udi,

na mibiki ingi inung'ila ghoya,

15 Ghweghwe kwa mbwibwi ya likonde.

kwa chisima cha ghamatsi ghali na ugima,

ighohulumka kulawa Lebanoni.

16 Udume ghwe libeho lya kasikazini,

utse ghwe libeho lya kusini,

mdume mna likonde lyangu,

ghamanukato ghanung'ile ghoya chila hanu,

mlekeni mnoghelwa wangu yatse kwikonde,

yaje ghamatunda ghake ighanoghile.