1 Ka ung'awile ndughu yangu,

iyong'ile ghamatombo gha mai wangu,

ka ning'akonile ako kunze, ning'akunonole,

na kung'awile kuduhu munu wa ukunibetsa nene.

2 Twing'elongotse na kupfika kuna ing'anda ya mai wangu,

yeye iyanifundile,

ning'akwing'ile dipfai ikolele ipfiungo,

ning'akwing'ile isanga ya makomamanga ghangu.

3 Ghumoko ghwake ghwa kumoso ghwa hasi ha litwi lyangu,

na ghumoko ghwake ghwa kujilo ghunihabatila.

4 Nomdedetsani mwemwe wamapinga wa Yerusalemu,

mleke ukwikunda na ukuwasa hamwe,

mbete mbaka ichipindi chenu hachipfika.

5 Angu nani ayuno iyakutsa kulawa kunyika,

iyamwaghamile mnoghelwa wake.

Nene nikulamsa hasi ha mbiki ghwa ghamatunda ghalimta,

hanu mai wako hayakindile inda,

na baho hayonile usungu hayakweleke ghweghwe.

6 Unyike mna ghumoyo ghwako ka muhuli,

ka muhuli mna ghumoko ghwako,

ukwikunda kuna ngupfu ka apfila pfaili ingupfu ya ukufa,

wipfu wake mkali ka apfila pfakuli kutsimu,

kwolakatsa ka ghumoto pfaghulakatsa,

na kwolakatsa ka milambi ya ghumoto.

7 Ghamatsi mengi ng'aghodaha baye ukutsima ukwikunda,

wala ghamatsi gha mvula ighokululusa ng'aghodaha baye kughadidimitsa,

imunu iyolapfa tsimali tsake yaghule ukukunda,

ayo katsobetsighwa ghendo.

8 Twetwe tunaye mdodo wetu pinga,

matombo ghake ng'ana ghakule baye,

lelo tumtendele choni mdodo wetu,

hayolapfighwa tsengele?

9 Ka yeye ka ubanda,

tutsotsenga minala ya fetsa mchanya mwake,

na ka yeye kamlango,

tung'aghutengenetse kwa mibiki ya mikataluba.

10 Nene na ubanda,

na matombo ghangu ka minala,

pfipfo pfanili hambele hake,

nomtenda yadeng'elele.

11 Selemani tsakana mghunda ghwa minzabibu,

hanu ihokemighwa Baali Hamoni,

kawapangila iwakalitsi,

chila munu tsakalapfa pfihande elufu pfa fetsa.

12 Mghunda ghwa minzabibu ghwa kwangu nene mwenyegho,

apfo pfihande elufu imwe pfa fetsa pfakwako ghweghwe Selemani,

na pfihande miya mbili pfa awala iwokalitsa ghamatunda.

13 Ghweghwe yukala kuna ibostani hamwe na sale tsako,

leka nene nihulike litsi lyako.

14 Tsuma, mnoghelwa wangu,

tsuma hima ka mbala pfayotsuma kuna ipfidunda ipfinung'ila ipfiungo.