1 Ghwe neghe mfalume,

lola ghamaghulu ghako ighapfalile mikwabatsa pfaghanoghile,

imighulu yako yeghala ghendo na ghamabwe ghanoghile gha johari,

ing'onde ya ghamoko gha munu iyadahile ghoya.

2 Chikupfu chako ka ibakuli yampfilingo,

nayo ng'aikala baye bila dipfai ihanganyike,

chuno chako ka lundo la mitsani ya ngano,

chitsungulukighwe na maluwa gha yungiyungi.

3 Ghamatombo ghako pfaghali ka iwana weli wa mbala iwoneke hamwe,

ka wana weli wa dondolo iwoneke hamwe.

4 Isingo yako pfaili ka mnala ighutengenetsighwe na tsimembe tsa nembo,

tsinenge tsako ka matsimbu gha Heshiboni,

ighali habehi na lilango lya Beti Rabi,

imula yako ka mnala ghwa Lebanoni,

ighwilolesa na Damasko.

5 Litwi lyako lima wima ka chidunda Karimeli,

mvili tsako tsili mwitwi tsinoghesa,

natso tsodaha ghendo ukumwonza mfalume.

6 Lola apfila pfaunoghile na pfaudeghete,

ghwe mnoghelwa wangu!

7 Lumbo lyako ka mbiki ghwa mtende,

matombo ghako ka pfikungwi pfa tende.

8 Nitsoghudina ghumtende aghwo,

na nitsobawa ipfikungwi pfake,

ghamatombo ghako ghawe ka pfikungwi pfa nzabibu,

na ghumuhe ghwako ghwonung'ila ka matunda.

9 Mlomo ghwako ghweghala na dipfai ilimta.

Ileke idipfai ihulumke mbaka kuna mnoghelwa wangu,

ibite mchanya mwa ghumlomo ghwake na mna ghamatsino ghake.

10 Nene na wakwake mnoghelwa wangu, naye konibama ng'ani.

11 Utse mnoghelwa wangu, tuke kumghunda,

tuke tukawase ako kuna ipfijiji.

12 Tuke sambi, tughende kuna imighunda ya minzabibu,

tukalole ka iminzabibu itsuka,

na maluwa ghake ka ghasanula,

pfipfila ka imikomanga nayo yanza ukulapfa ghamaluwa,

kuko nitsokulangusa pfanikukunda.

13 Iminunguluwala yonung'ila ghoya,

hana imilango yetu hana ghamatunda ighanoghile,

gha sambisambi na ghaghumwande,

agho ghose nikwikila ghweghwe mnoghelwa wangu.