1 Nene na luwa ililawa Sharoni,

luwa lya yungi yungi ilikota mlwanda.

2 Ka luwa lya yungiyungi haghatighati ha imihonga,

pfipfo pfayali mnoghelwa wangu hayokala hamwe na iwali.

3 Ka mbiki ghwa ghamatunda ighalimta haghati ghati ha imibiki ya kubagho,

pfipfo pfayali mnoghelwa wangu hayokala hamwe na iwasongolo wayaghe,

nideng'elela ukukala hasi ha ichimbeho chake,

na nilanza litunda lyake lyamta ng'ani.

4 Kanighala kuna ichikuta ichina ichijo,

kanyinulila ibendela ilangusa ka yeye konikunda.

5 Ngayeni pfighate pfa tnzabibu ndiye nighute,

ngayeni litunda likemighwa tofaa ndiye nideng'elele,

kwaapfila nene notsilika kwa kumkunda ayuno sideke.

6 litwi lyangu liwasila ghumoko ghwangu ghwa kumoso,

na ghumoko ghwake ghwa kujilo ghunihabatila.

7 Nomdedetsani mwemwe wamapinga wa Yerusalemu.

akuno iwanyama wa kubagho iwokemigha mbala na dondolo wohulikitsa,

mleke ukwikunda na ukuwasa hamwe,

mbete mbaka ichipindi chenu hachipfika.

8 Nohulika litsi lya mnoghelwa wangu, lola kakutsa yotsuma,

kodaluka daluka ipfidunda, na kopfiloka loka ipfighongo.

9 Mnoghelwa wangu keghala na mbala,

ka dondolo imwana,

kema kuchughu kwa ubanda wetu,

kolola hana lidilisha,

kosungulila hana ichonzo yone mghati.

10 Mnoghelwa wangu kanongela,

Winuke mnoghelwa wangu, ghweghwe yuninoghela, utse tuke.

11 Lola msimu ghwa chipfeghetsi ghubita,

naghwo ghumsimu ghwai mvula ghumala.

12 Maluwa ghasanula chila hanu muisi,

ghumsimu ghwa ukwimba ghupfika,

iwanjiwa wohulikika wolila mna imighunda yetu.

13 Mibiki ya mitini yanza ukweleka ghamatunda ghake,

na iminzabibu yanza kusanula, nayo yonung'ila ghoya,

lelo winuke mnoghelwa wangu, tuke wose.

14 Ghweghwe kweghala na njiwa, yawipfisa mna ghamabambalawe ighakang'asuke,

mmbalimbali mwa ipfidunda,

unanguse chihanga chako, na nihulike litsi lyako,

kwaapfila litsi lyako lyamta na ichihanga chako chinogha.

15 Utughoghele wambweha, wambweha awala iwadowado,

awala iwohihinya imighunda yetu ya mitsabibu yetu.

aila minzabibu yetu isanula.

16 Mnoghelwa wangu wakwangu nene, na nene nawakwake yeye,

yeye kodima iwang'olo wake hana luwa lya yungiyungi.

17 Mbaka hamitondo litsuwa halilawa,

na ichisi hachimala,

uye ghwe mnoghelwa wangu, uwe ka mbala,

na ka dondolo imwana mchanya mwa ipfidunda Beteri.