1 Chilo chigima mna lusatsi lwangu,

nimbama ayula iyoghunoghela ghumoyo ghwangu,

nimbama immale ayo lekeni simwonile baye.

2 Apfo nitsoghenda nikange kange mna ghumji ghose,

nibite mna tsinzila na mna ipfibwalu pfa ukwitinganila,

nimbame ayula iyali mna ghumoyo ghwangu.

Baho nimbama lekeni simwonile baye.

3 Iwakalitsi iwang'ali wobita bita kukalitsa ghumji wambona,

na nene niwaghutsa, "Pfihi mmona ayula iyoghunoghela ghumoyo ghwangu?"

4 Baho haniwalekile, nimwona ayula iyoghunoghela ghumoyo ghwangu,

nimkinda wala simlekile baye yoke,

nimghala kuna ing'anda ya mame wangu,

mbaka kuna ichumba cha ayula iyanyeleke.

5 Nomdedetsani mwemwe wamapinga wa Yerusalemu,

akuno mbala na dondolo wohulikitsa,

mleke ukwanza ukwikunda,

mbete mbaka ichipindi chenu hachipfika.

6 Angu ayu nani iyakutsa kulawa kunyika,

kakutsa ka yosi limile wima,

iyonung'ila manemane na upfumba,

ipfinu apfo ipfihutsighwa na wachulutsi?

7 Lola, Selemani kakutsa,

kadutighwa mna ichighoda chake cha ufalume,

aku maasikali sitini wamtsunguluka,

Maaskali wa Isiraeli iwadahile ukwitowa pfinoghile.

8 Chila asikali kakinda limaghe lyake,

wose wodaha ghendo kwitowa kung'ondo,

chila munu kohomeka limaghe lyake mchuno,

wakala ghoya ghendo kwa ukwitowa nechilo.

9 Mfalume Selemani ketengenetsela chighoda chake cha ufalume,

ketengenetsela kwa tsimbao tsinoghile tsa imibiki ilawa Lebanoni.

10 Tsingutso tsake tsitendighwa kwa fetsa,

ghumghongo ghwake ghuhambighwa na nzahabu,

na hanu ha ukukala haghubikighwa na pfitambala pfa nzambalau.

na mtuka ghwake ghudadatsighwa na njumu,

mghati mwake mdadatsighwa pfinoghile na wapinga wa Yerusalemu.

11 Mlawe kunze mwemwe iwapinga wa Sayuni, mtse mumlole mfalume Selemani,

kapfala litaji lyayapfatsighwe na mai wake,

mna litsuwa lyayakwelile,

litsuwa ghumoyo ghwake haghudeng'elela ng'ani.