14 Əndje sə kə mʉ Ə̂rɔ̂ Əpʉ Əgɔngerə nə̂ Ndjapä səye pâ ashɔ nɔ̂ ndə kə pa amarä nɔ̂ dji əpʉ nə. Bale, mandânə, tshepashɔ sə kə nglɔ nə.»

29 «Trale, mandâ aəlo aərə əyo səkɔ, tshela alɔ sə kə bu nə, yipʉ sə sə kə tɔ kwatə̂ye ne, aambrepe sə kə afɔ mâ lafɔ ə yɔ gâ tə̂ ashɔ, Ndjapä sə kə meme aawlra tshelafɔ. 30 Bale, ərə ə̂në ə sə kə yisə̂ alɔ kə yi kumu Əgblə nə̂ Əzü kɔ sə kə wutu lafɔ. Amarä nɔ̂ pâ ashɔ sə kə kɨ ə̂sə̂ əyo tə̂ əndje. Əndje sə kə wu kə gu Əgblə nə̂ Əzü lə andra lafɔ də awlra ye nɔ̂ də ə̂yî ye nɔ̂. 31 Tshə sə kə wla atrawaya nə̂ Ndjapä, əndje sə kə u əgerə ängɔ̈ ə̂në ə kɨ tə bandanə kɔ ə ngbo azü ə̂në Ndjapä kê əndje pâ ashɔ nɔ̂ gâ ye kɔ gâ tə̂ nə, ə vɔ̂tə̂ nə tə̂ ama ashɔ ʉrrr ndjɔ gâ tə̂ budu nə.»

42 Rəkɔ, ala e në, mbrə ə̂në, e wusə̂ əlo ə̂në Âgbɔ̂ Əyïngerə nə̂ e ə gu də nə kɔ wu ne. 43 E wüsə̂ nə tə ə̂rɔ̂nə ə pa, kədə əyïnga anda kə wusə̂ alɔ ə̂në əyïangba sə kə na də nə də tsheləbu kɔ, tshə sə sə kə lo nə ə katə̂ ye ka tshə ngɔ anda nə ə li ne. 44 Âdârə ə̂në, e-e ndje, e sə̈ trö, mbrə ə̂në Əgblə nə̂ Əzü sə kə gu nə tə̂ alɔ ə̂në e wusə̂ nə wu ne kɔ.»

20 ə yïsə̂ ərə kə əndje ndə kə pa əndje bata aərə nɔ̂ ə̂në mə zâ ama kə e də nə gâ ye kɔ. Bale, e wüsə̂ nə ə pa mə sə də e alɔnɔ̂, ʉrrr ndjɔ gâ tə̂ ama tshepashɔ.»

32 «Əzü bale wusə̂ əlo nə də alɔ nə wu ne. Atrawaya nə̂ Ndjapä ə̂në əndje sə mâ lafɔ kɔ wusə̂ əlo nə wu bale ne wala Ɨrɨ Ndjapä nə bale ne, kʉtə̂ Abä tshî kə wusə̂ nə.

1 Ə sə tə ə̂rɔ̂nə ndə kə pa bə wusə̂ ərə səye: tə̂ bale aəlo tshepashɔ, alɔ nə sə kə sə tə əmbrʉnə. 2 Mbrə ə̂në azü sə kə sə tə alayïkpütü, tə azü kə ma əgo ngendja rô pâ nə, tə alayïwuma, tə alayïgbama, tə aawogu Ndjapä, tə aawodji əpʉ ama alabä əndje də alayï əndje dji ne, tə azü ə̂në əndje wusə̂ ə̂rɔ̂ ərə ə̂në azü ə mbrə kə əndje kɔ wu ne, tə azü ə̂në əndje kpe rawa aərə nə̂ Ndjapä kpe ne kɔ. 3 Əndje sə sə kə sə də lɔsu əzü ne, ə wu əyo angâ əndje wu ne, ə sə kə pa tə̂ angâ əndje, ə wusə̂ kə ru tshelə əndje tə̂ ərə wu ne, ə sə kə gi əyo tə̂ angâ əndje, ə sə tə alayïkowɔ nə̂ ə̂rɔ̂ ərə. 4 Əndje sə kə sə tə aawoka angâ əndje, tə aawombrə ərə ə tegbɔ kumu əndje tegbɔ ne, tə azü ə̂në wuma bû ala əndje gâ ye kɔ, əndje sə kə yində aərə ə̂në ə fʉ ə fʉ tə̂ əndje kɔ ə rô Ndjapä. 5 Əndje sə kə mbrə ərə a pa də əndje tɔ̂ popo Ndjapä gâ ye, kandää, əndje sə kə tshi äwä awlra əpʉ lɔsu nə tʉ. Dö tshepa zə gbo marä tə̂ azü səkɔ!

17 "Ndjapä pâ əpʉ ə pa: Tə̂ krutə aəlo,

mə sə kə wla Âgbɔ̂ Yîrə̂ nə̂ əmə gâ pâ azü nɔ̂.

Aneshe koshe də aneshe yashe nə̂ e sə kə pa ndəma Ndjapä,

amɔdɔ nə̂ e sə kə wu aərə mata ə̈lü,

ayawaza nə̂ e sə kə wu ə̈lü.

18 Ngâ, lə aəlo səkɔ, mə sə kə wla Âgbɔ̂ Yîrə̂ nə̂ əmə

gâ pâ alayïkosəra nə̂ əmə tə akoshe də ayashe

â əndje sə kə pa ndəma əmə.

19 Mə sə kə mbrə aərə ə̂në ə rô pâ kumu azü, mâ ngâ lafɔ

ə mbrə aərə ə̈lü djoko tʉ pâ ashɔ:

ə̈ndjï də əwo gâ ndə ngâwo mata andra sə kə sə je.

20 Alɔ sə kə do tə̂ ye tə əbu nə,

yipʉ sə kə do tə̂ ye tə ə̂drô nə mata ə̈ndjï,

angbʉlînə ndə kə pa âgbɔ̂ əlo də əlo ə̂yî Âgbɔ̂ Əyïngerə lï.

21 Bale, əzü nɔ̂ ə̂në tshə e ətshe də əɨrɨ Âgbɔ̂ Əyïngerə,

tshə sə kə tshɔ lə kuzu."*

15 Rəkɔ, əpʉ ə̂në ä sə kə pa kə e Lïndə̂ ə̈bə̈ əpʉ nə̂ Âgbɔ̂ Əyïngerə kɔ kə səye: əzə̂ də̂ asorô, ə̂në a daka pə mbrə əlo kə gu Âgbɔ̂ Əyïngerə nə kɔ, a sə sə kə ro ətshinə tə̂ azü ə̂në əndje tshû gâ ye kɔ ne. 16 Mbrə ə̂në, tə̂ alɔ ə̂në əndje ta râwâ, ə̂në tshema ə̈bə̈ makɔndji nə̂ atrawaya kɨ, ə̂në ängɔ̈ nə̂ Ndjapä sə kə kɨ nə, Âgbɔ̂ Əyïngerə də ə̂tə̂ ye, sə kə afɔ mâ lafɔ ə jerə, bale, azü ə̂në əndje zâ lɔsu əndje kə Kristə nə gâ ye â tshû kɔ, əndje sə kə she angbʉlînə. 17 Mandânə, əzə̂ də̂ asorô nə, ə̂në a daka pə ənə̂ əzə̂ je kɔ, Ndjapä sə kə ko əzə̂ də aəndje äwä bale ə o də əzə̂ mâ lafɔ lə andra ndə kə pa a te Âgbɔ̂ Əyïngerə nə lə əyi, â rəkɔ, a sə kə sə alɔnɔ̂ gâ ngotə̂ Âgbɔ̂ Əyïngerə nə. 18 Rəkɔ, e gbɔ̈gbɔ lɔsu e lə takpa tə̂ e tə̂ äwä aəpʉ səkɔ.

6 Rəkɔ, a lö lö mata ə̂dû azü ne, bale ala əzə̂ sə̈ tə ə̈kü nə, tshelə ala əzə̂ sə̈ ambanə. 7 Azü ə̂në əndje lo əlo kɔ, əndje lo əlo də tsheləbu, â azü ə̂në əndje ndju ə̂pî kɔ, əndje ndju də tsheləbu. 8 Bale, əzə̂ ə̂në a sə tə azü ə̈kü alɔ kɔ, tshelə ala əzə̂ sə̈ ambanə. A tëgbɔ lɔsu əzə̂ də kə yi tə̂ nə̂ əzə̂ mata kandalinga kowɔ də̂ a yi kɔ ə tëgbɔ əpʉ kə she əzə̂ lə kuzu ə̂në lɔsu əzə̂ ka gâ pâ əpʉ nə kɔ mata kpɔtɔ kowɔ də̂ a yi kɔ.* 9 Mbrə ə̂në Ndjapä kê əzə̂ kê ndə kə pa əkɔ nə̂ ye te pâ əzə̂ ne, bale tshə kê əzə̂ ndə kə pa a sɔtə̂ sorô nə̂ alɔnɔ̂ tə̂ äwä Âgbɔ̂ Əyïngerə nə̂ əzə̂ Jezu Kristə,

34 «E gbɔ̈ ndə akwa e! E zä lɔsu e zä nɔ̂ kʉ gâ tə̂ kə zɨ ərə də kə ndju ərə ro pâ nə ne. E lï tshelə e lï gâ pâ kə sə e pâ ashɔ səye ne. Kədə e gbɔ ndə akwa e gbɔ ne, əlo nə sə kə te gâ pâ e, e sə sə kə wusə̂ nə ne. 35 Mbrə ə̂në ə sə kə te mata gbânda gâ pâ azü nɔ̂ pâ ashɔ nɔ̂. 36 E sə̈ də ə̈kü ala e ə yü Ndjapä alɔnɔ̂ ndə kə pa Ndjapä za awlra kə e ndə kə kpe aərə ə̂në ə sə kə wutu nə kɔ, ka e ka gâ lafɔ gâ ətshi Əgblə nə̂ Əzü.»

8 Alaye əmə ə̂në mə yîndə e ngbatshe kɔ, ə̈bə̈ əpʉ sə je ə̂në ə̂sə̂ nə lï lï ndə kə pa ə djerə e ne: lə ala Əyïlingû, əlo bale sə mata ə̂ngû sake bale (1 000) â ə̂ngû sake bale (1 000) sə mata əlo bale.* 9 Ərə ə̂në Âgbɔ̂ Əyïngerə zâ ama də əpʉ kə mbrə nə gâ ye kɔ, əndʉ nə sə sə kə dɨ ə dɨ â tshə mbrə ndəma nə ne, mata ə̂në alabə̈ azü wu ənə̂ əndje ə pa əndʉ nə dɨ̂ ga ye kɔ. Bale, tshə daka pə kə ru tshelə ye tə̂ e, mbrə ə̂në tshə yində nə yi ə pa ə̈bə̈ əzü tshu kuzu ne, bale tshə yində nə ə pa azü nɔ̂ tɔ gâ tə̂ äwä kə tshi äwä angbrɔ kə mbrə tə̂ əndje tʉ.

10 Bale, əlo kə gu Âgbɔ̂ Əyïngerə sə kə sə mata alɔ kə na əyïangba. Tə̂ əlo nə səkɔ, tshelafɔ sə kə ro nə də əsərɨ nə tə âgbɔ̂, aambrepe sə kə ju nə â tshelə əndje sə kə gba nə â ashɔ də aərə ə̂në azü mbrə̂ pâ ashɔ nɔ̂ kɔ sə kə ro nə*. 11 Rəkɔ ə̂në aərə səkɔ nɔ̂ sə kə ro nə ə ro kɔ, kə sə e lï ndə kə sə atâ a? E mbrə̈ tə̂ e tə azü ə̂në e sə kpî ə tɔ̂ popo Ndjapä gâ ye kɔ 12 ka ə sə kə ka mbrə kə wutu əlo nə̂ Ndjapä nə ə sə kə dra əlo nə ə dra. Tə̂ əlo nə, əwo sə kə ju tshelafɔ â sə kə gba tshelə nə nɔ̂, aambrepe sə kə ju nə â tshelə əndje ə gba nɔ̂ je. 13 Bale, Lïndə̂ tshelə ndəma Ndjapä nə, a sə kə ka mbrə tafa tshelafɔ də tafa ashɔ ə̂në kə mbrə ərə də äwänə sə kə sə je pâ nə kɔ.*

51 E djï-a, mə sə kə yisə̂ ə̈bə̈ lengerə əpʉ kə e: a sə sə kə tshu nɔ̂ ne, bale əzə̂ nɔ̂, a do tə̂ əzə̂ kpî je, 52 kʉ diawû, mata ə̂në əzü ngɔ ala kɔ, tə̂ əkɨ bale tɔtɔliɔ. Mbrə ə̂në tɔtɔliɔ nə ə kɨ je â akuzu ə she də tshekotə̂ ə̂në ə ndɨ ndɨ tə̂ ərə ne kɔ je, â əzə̂, a do tə̂ əzə̂ kpî je.

1 Bale, mə wû ə̈bə̈ tafa tshelafɔ də ə̈bə̈ tafa ashɔ, mbrə ə̂në angbʉlî tshelafɔ nə də angbʉlî ashɔ nə rô gâ ye â ə̂ngû əngbrʉ sə sə kwatə̂ye je ne. 2 Â mə wû gala nə ə̂në ə sə kpî mbrə Ndjapä kɔ, tafa Jeruzalamə nə, ə̂në ə tô mâ lafɔ, mâ ngotə̂ Ndjapä nə â ə sə̂ kə jerə nə kɔ, ə gâmba tə̂ ye gâ ye mata yashe ə̂në koshe tô ətshə â tshə mbrə̂ gao ndə kə ka mbrə äkɔ̈ nə kɔ. 3 Mə djî ə̈bə̈ âgbɔ̂ tshema ə̂në ə tô djoko tə̂ mbata ngerə nə ə pâ əpʉ ə pa: «Ə̂sə̂ kə sə Ndjapä sə lə takpa tə̂ azü gâ ye! Ə̂sə̂ kə sə ətshə sə kə sə lə takpa tə̂ əndje â əndje sə kə sə tə azü nə̂ ye. Ətshə də ə̂tə̂ ye sə kə sə lə takpa tə̂ əndje, â tshə sə kə sə tə Ndjapä nə̂ əndje. 4 Tshə sə kə tru ngɔla nɔ̂ lə ala əndje. Kuzu ə sə sə je kwatə̂ye ne, â əpʉ mbadja wala əkɨ wala kə wu əyo ə sə sə je kwatəndje ne, mbrə ə̂në aangbʉlî aərə rô gâ ye.»