1 Mandânə, mə djî ə̈bə̈ tshema ə̂në ə tô lə Anda Ndjapä nə ə pâ kə atrawaya nə̂ Ndjapä nə mindû amanə bishi nə kɔ tə âgbɔ̂ ə pa: «E rö ə sɨ̈ âgbɔ̂ əkɔ nə̂ Ndjapä nə lə akopo nə mindû amanə bishi nə kɔ gâ pâ ashɔ!»

2 Angbʉlî trawaya nə̂ Ndjapä nə rô ə zâ kopo nə̂ ye nə ə sɨ̂ gâ pâ ashɔ. Alabə̈ aəmbrʉ aəku gbadja ə̂në ə ka ətshe tə bandanə kɔ tê gâ tə̂ azü nə ə̂në əndje sə̂ də kə ke ətshe nə̂ agia nə tə̂ əndje ə̂në əndje sə̂ kə vrɔ foto ye nə kɔ.

3 Bishi trawaya nə̂ Ndjapä nə zâ kopo nə̂ ye nə ə sɨ̂ gâ ala ə̂ngû əngbrʉ nə. Ə̂ngû nə dô tə̂ ye tə ə̈ndjï mata ə̈ndjï əko kuzu â aagia nɔ̂ ə̂në əndje sə̂ lə ə̂ngû əngbrʉ nə kɔ, əndje tshû.

4 Vəta trawaya nə̂ Ndjapä nə zâ kopo nə̂ ye nə ə sɨ̂ gâ ala aâgbɔ̂ aə̂ngû də ayasa; aə̂ngû nə nɔ̂ dô tə̂ əndje tə ə̈ndjï. 5 Bale, mə djî trawaya nə ə̂në tshə sə̂ də awlra gâ pâ ə̂ngû nə kɔ, tshə pâ:

«Kə mbrə ərə nə̂ zə sə də äwänə, əbə ə̂në bə sə je kpəsəye ə sə̂ je kerə kɔ, əbə ə̂në bə sə kpî kɔ,

mbrə ə̂në bə wâ ngbanga nə rə.

6 Mbrə ə̂në ə̈ndjï azü nə̂ zə də ənə̂ aawopandəma zə tû lə kəna əndje gâ ye,

â bə zâ ə̈ndjï kə əndje ndə kə pa əndje ndju kɔ.

Əndje lï də nə.»

7 Mandânə, mə djî ə̈bə̈ tshema ə̂në ə tô lə gblaka nə kɔ ə pâ əpʉ ə pa:

«Ayî, Əyïlingû Ndjapä, tə Âgbɔ̂ Əyïworɔgbɔ,

aəpʉ kə wa ngbanga nə̂ zə

sə tə djatra kə wa ngbanga â sə də äwänə.»

8 Vəna trawaya nə̂ Ndjapä nə zâ kopo nə̂ ye nə ə sɨ̂ gâ ala alɔ. Əndje zâ äwä kə alɔ nə ndə kə pa ə ju azü də əwo. 9 Bale, ə̈bə̈ əmbrʉ kə wo ətshe jû azü nə â əndje gû aə̂gû tə̂ əɨrɨ Ndjapä nə ə̂në tshə sə də awlra gâ pâ aəmbrʉ aərə əyo səkɔ. Bale, əndje tshî äwä angbrɔ kə mbrə tə̂ əndje nə tshî tʉ ndə kə pa əndje mbe Ndjapä nə ne.

10 Mindû trawaya nə zâ kopo nə̂ ye nə ə sɨ̂ gâ pâ mbata ngerə nə̂ agia nə. Əgɔngerə nə̂ ye nə bû shiwu. Azü sə̂ kə zɨ tshelə aəji əndje mbrə ərə nə ə̂në ə sə̂ kə ka əndje kɔ. 11 Əndje gû aə̂gû tə̂ Ndjapä nə ə̂në tshə sə mâ lafɔ kɔ mbrə ərə nə ə̂në ə sə̂ kə ka əndje kɔ də aəku gbadja nə̂ əndje nə, bale əndje tshî äwä aəmbrʉ aərə ə̂në əndje mbrə kɔ tshî tʉ ne.

12 Mindû amanə bale trawaya nə zâ kopo nə̂ ye nə ə sɨ̂ gâ ala âgbɔ̂ ə̂ngû Efratə. Ə̂ngû nə ndjêrɔ ndə kə pa äwä gamba tə̂ ye mbrə alayïngerə ə̂në əndje afɔ djoko tshepalɔ ə sə kə na nə kɔ. 13 Bale, mə wû aafrɔ ayirə̂ vəta, ə̂në əndje kô akpakpru kɔ, əndje tô lə ama əmbrʉ agia nə, lə ama agia nə, ndje lə ama afrɔ awopandəma ndjapä* nə ə sə̂ kə wutu gashu. 14 Ayirə̂ nə ə̂në Sataa wlâ əndje, ə̂në əndje mbrə aərə ə̈lü kɔ kə sə̂. Əndje sə kə na gâ tə̂ alayïngerə tshepashɔ nɔ̂ ndə kə pa əndje ngbo əndje gâ tə̂ nə mbrə kə tɔ kowɔ tə̂ âgbɔ̂ əlo nə̂ Ndjapä nə, tə Âgbɔ̂ Əyïworɔgbɔ.

15 Âgbɔ̂ Əyïngerə pâ: «Mə sə kə na mata əyïangba. Ənə̂ ye tə̂ ə̂rɔ̂nə, əzü ə̂në tshə lo əlo lo ne ə sə kə bata aləba nə̂ ye tə̂ ye, ndə kə pa tshə na ana na kpɔnderɔ ne, kanika gana ngɔ ətshə ngɔ lə ala azü ne!»

16 Ayirə̂ nə ngbô alayïngerə nə gâ tə̂ nə tə̂ ətshe ə̂në əndje ê də ama ebrʉ ə pa «Arəmagedɔ» kɔ.

17 Mindû amanə bishi trawaya nə zâ kopo nə̂ ye nə ə sɨ̂ gâ lə awolangatshe. Ə̈bə̈ tshema tô lə Anda Ndjapä nə, lə mbata ngerə nə ə pâ əpʉ tə âgbɔ̂ ə pa: «Ərə nə nglɔ̂ gâ ye!» 18 Bale, yavrɨ vɔ̂tə̂ kə sro nə, atshema vɔ̂tə̂ kə kɨ nə, yavrɨ nə vɔ̂tə̂ kə sɔ nə â ashɔ meme tə bandanə, â alɔ bale marä tə̂ kə meme ashɔ rə sə sə je kerə ə̂në azü sə pâ ashɔ kɔ ne. 19 Tshelə âgbɔ̂ gala nə sɔ̂ vəta. Agala aəgɔ nɔ̂ ngɔ̂ gâ tʉ, â Ndjapä nə lî tshelə ye tə̂ âgbɔ̂ gala Babilɔnə ndə kə pa tshə za kopo duva əkɔ əwo nə̂ ye kə gala nə tshə ndju. 20 Adala la aə̂ngû nɔ̂ kpê gâ ye â akaga yû gâ ye. 21 Əgbro avɔdjɔndjɔ ə̂në ə lʉ mata kelɔ zazü bishi kɔ, ə âfɔ mâ lafɔ ə tê gâ pâ azü nə. Azü nə gû aə̂gû tə̂ Ndjapä nə mbrə əmbrʉ ərə əyo nə ə̂në avɔdjɔndjɔ nə ə mbrə tə̂ əndje nə kɔ, mbrə ə̂në ə sə̂ tə ə̈bə̈ âgbɔ̂ ərə əyo.