1 Mindû trawaya nə̂ Ndjapä nə û ängɔ̈ nə. Mə wû ə̈bə̈ ambrepe ə̂në ə âfɔ mâ lafɔ ə tê gâ pâ ashɔ. Əndje zâ krele âgbɔ̂ kudû ə̂në ə lî tə bandanə kɔ kə ətshə. 2 Tshə krɔ̂ ama âgbɔ̂ kudû nə ə̂në ə lî tə bandanə kɔ, ə̈bə̈ ngâwo mata ngâwo tshelə âgbɔ̂ anda ə̂në əwo tê lə nə kɔ, âfɔ lə âgbɔ̂ kudû nə ə dâ o nə gashu. Tshela alɔ də tshelə əyi bû shiwu mbrə ngâwo tshelə âgbɔ̂ kudû nə. 3 Lə ngâwo nə, alagbɔ̂ wûtu gâ pâ ashɔ, â əndje zâ awlra mata marä tə̂ awlra nə̂ akplakongo kɔ kə əndje. 4 Əndje pâ kə əndje ə pa əndje mbrə mbrə əmbrʉ ərə wala tə̂ agusu, wala tə̂ ə̈bə̈ kako güsü, wala tə̂ ə̈bə̈ ayɔ bale ne, bale əndje mbrə əmbrʉ ərə nə kʉ gâ tə̂ azü ə̂në əndje sə̂ sə̂ də tapɔ nə̂ Ndjapä nə tə̂ matshi əndje ne kɔ. 5 Əndje zâ äwä kə əndje ndə kə pa əndje wo azü nə wo ne, bale əndje ko əndje kʉ gi əyo lə yipʉ mindû. Əyo nə ə̂në əndje mbrə tə̂ azü nə kɔ, ə sə mata əyo ə̂në əzü sə kə wu nə alɔ ə̂në kplakongo tɔ ətshə kɔ. 6 Tə̂ alɔ nə səkɔ, azü sə kə pra kuzu, bale əndje sə sə kə sɔtə̂ kuzu nə ne. Əndje sə kə ma əgo ndə kə tshu nə, bale kuzu nə sə kə kpe gashe ngrʉ̂ tə̂ əndje.

7 Alagbɔ̂ səkɔ kô ambrata ə̂në əndje gâmba aərə gâ tə̂ əndje mbrə kə tɔ kowɔ kɔ. Alabə̈ aərə sə̂ tə̂ kumu əndje mata akpɔtɔ ngerə lɔrə, â tshitshi əndje sə̂ mata tshitshi azü. 8 Əndje sə̂ də sukumu mata sukumu ayashe, â aəji əndje sə̂ mata aənə̂ abamara. 9 Əndje sə̂ də aərə tə̂ lagbɔgɔ əndje mata kandalinga kowɔ, â əsərɨ akombo əndje kɨ̂ mata əsərɨ akutu ambrata ə̂në əndje ngba ə ngba, ə̂në ə sə kə kpe ärɔ̈ ndə kowɔ kɔ. 10 Əndje sə̂ də adambâ ə̂në ə kô aənə̂ akplakongo kɔ, də aama nə sə̂ də̂ əndje tɔ azü də nə kɔ. Lə adambâ əndje nə də̂ əndje sə də awlra ndə kə pa əndje mbrə əmbrʉ ərə tə̂ azü nə lə yipʉ mindû nə kɔ. 11 Əyïngerə nə̂ əndje kə də̂ trawaya nə̂ âgbɔ̂ kudû, ə̂në əɨrɨ ye də ama ebrʉ kə də̂ Abadɔ kɔ, â də ama grakə kɔ kə də̂ Apɔliyɔ, ə̂në âdâ nə kə də̂ «Awondɨ ərə» kɔ.

12 Angbʉlî ərə əyo nə rô gâ ye. Alabə̈ aərə əyo nə bishi ə wutu kwatəndje mandânə je.

13 Mindû amanə bale trawaya nə̂ Ndjapä nə û ängɔ̈ nə. Bale, mə djî ə̈bə̈ tshema ə̂në ə tô lə aədɨ gblaka lɔrə nə vəna, ə̂në ə sə̂ ətshi Ndjapä nə kɔ. 14 Ə pâ kə mindû amanə bale trawaya nə̂ Ndjapä nə ə̂në tshə zâ ängɔ̈ nə gâ lə kəna ye kɔ ə pa: «Wöra atrawaya nə vəna ə̂në əndje î əndje tə̂ ama Efratə, tə âgbɔ̂ ə̂ngû kɔ.» 15 Bale, atrawaya nə vəna ə̂në əndje gâmba əndje mbrə alɔ nə, mbrə əlo nə, mbrə yipʉ nə, ndje mbrə ə̂ngû nə kɔ, əndje wôra əndje gâ ye ndə kə pa əndje wo mbage azü bale lə vəta nə, ə̂në əndje â kru tshelə əndje vəta. 16 Mə djî kə ngba atrugu kə kpe də ambrata nə ə sə̂ sake zazü bale äwä sake morofo. 17 Lə ərə nə ə̂në mə wû mata ə̈lü kɔ, mə wû ambrata nə də azü nə ə̂në əndje ô gâ pâ ambrata nə kɔ, əndje sə̂ rəke: əndje sə̂ də akandalinga ə̂në əmbre nə sə̂ ngirə mata əwo, â sə̂ mata tshelafɔ ndje mata tshelə əprʉ ngatə kɔ. Akumu ambrata nə sə̂ mata kumu abamara, â əwo də ngâwo gâ ndə abadja ə̂në ə sə kə sho ətshe ə sho kɔ sə̂ kə wutu lə aama əndje. 18 Aəmbrʉ aərə vəta səke: əwo nə də ngâwo nə gâ ndə abadja ə̂në ə sho ətshe ə sho kɔ ə̂në sə̂ kə wutu lə aama ambrata nə kɔ wô mbage azü bale lə vəta nə, ə̂në əndje â kru tshelə əndje vəta kɔ. 19 Mbrə ə̂në awlra nə̂ ambrata nə sə̂ lə aama əndje də adambâ əndje. Adambâ əndje nə kô aəkrɔ, akumu nə sə tə̂ nə â də nə də̂ əndje mbrə əmbrʉ ərə nə kɔ.

20 Bale, ə̂dû azü nə ə̂në aəmbrʉ aərə səkɔ wô əndje wô ne kɔ, əndje tshî äwä aəmbrʉ aərə nə̂ əndje tshî tʉ ne, əndje kâ kâtə̂ äwä kə vrɔ aafrɔ ayirə̂ də aamba andjapä ə̂në əndje gâmba əndje də lɔrə, də ngbengewle ngendja, də ədrɔ kowɔ, də əkpʉ, də ayɔ, ə̂në əndje lï lï ndə kə pa wala əndje wu ərə wala ə dji əpʉ wala ə na ana bale ne kɔ. 21 Azü nə tshî äwä wala kə wo azü wala kə mbrə ayɔ wala kə mbrə ə̂trû wala kə zɨ angba nə̂ əndje tshî tʉ ne.