1 Mandânə, mə wû ə̈bə̈ ata trawaya nə̂ Ndjapä nə ə̂në tshə tô mâ lafɔ ə sə̂ kə jerə nə kɔ, ə̂në tshə sə̂ də ə̈bə̈ âgbɔ̂ awlra kɔ. Ə̂yî ye zâ â ə tshê pâ ashɔ nɔ̂. 2 Tshə tâ râwâ tə âgbɔ̂ ə pa:

«Ə tê gâ ye, ə tê gâ ye,

âgbɔ̂ gala Babilɔnə nə!

Ə dô tə̂ ye tə ə̂sə̂ əlo aafrɔ ayirə̂* gâ ye,

tə ə̂sə̂ kə ko tə̂ wû tə̂ ayirə̂ nɔ̂ ə̂në əndje sə sə mvo ne kɔ,

tə ə̂sə̂ kə ko tə̂ wû tə̂ ayanu nɔ̂ ə̂në əndje sə sə mvo ne kɔ,

ə̂në tshelə azü wə̂ra tə̂ əndje tə̂ əndje nɔ̂ gâ ye kɔ.

3 Mbrə ə̂në azü aəgɔ nɔ̂ ndjû duva ə̂trû nə̂ ye nə

ə̂në ə za əwo ə za kɔ gâ ye,

â alayïngerə pâ ashɔ mbrə̂ ərə ə̂trû də ətshə gâ ye,

â aawoka aərə pâ ashɔ dô tə̂ əndje tə alayïrishi

mbrə əgbro aərə rishi nə̂ ye ə̂në ə fʉ ə fʉ kɔ gâ ye.»

4 Mandânə, mə djî kwatə̂mə ə̈bə̈ ata tshema ə̂në ə tô mâ lafɔ kɔ ə pa:

«Azü nə̂ əmə, e wütu lə nə gashu!

E wütu gashu kanika e sə sə lə anyaka

ə̂në azü tshelə nə ə mbrə kɔ ne,

ka e sɔ sɔtə̂ ama aəmbrʉ aərə

ə̂në ə te gâ pâ ye je kɔ ne.

5 Mbrə ə̂në anyaka nə̂ ye nə ngbô gâ pâ nə gâ pâ nə ʉrrr ndjɔ mâ lafɔ-e,

â lɔsu Ndjapä tê gâ pâ aəmbrʉ aərə nə̂ ye nə gâ ye.

6 E mbrə̈ tə̂ ye ə lï kʉ də ərə ə̂në tshə mbrə̂ kə angâ nə kɔ,

ə mbrə̈ ərə ə̂në tshə mbrə̂ gâ ye kɔ äwä bishi kə ətshə.

E sɨ̈ ərə gâ lə kopo nə ə̂në tshə sɨ̂ ərə gâ lə nə gâ ye kɔ äwä bishi kə ətshə.

7 Mata ə̂në tshelə ye yîndə əgerə ətshe də aərə rishi ngbatshe gâ ye kɔ,

e zä ətshə gi əyo rô pâ nə ə mbrə̈ ətshə ndje gâ lə mbadja rô pâ nə.

Mbrə ə̂në tshə pa mâ tə̂ lɔsu ye ə pa:

"Mə sə gâ pâ mbata ngerə tə yashe ngerə,

mə sə sə tə yashe koya ne,

mə sə sə kə mbrə mbadja alɔ bale ne."

8 Âdârə ə̂në, kʉ lə əlo bale,

aəmbrʉ aərə sə kə jerə pâ ye:

kuzu, də mbadja gâ ndə âgbɔ̂ əgo.

Əndje sə kə za ətshə ə wli ətshə gâ ala əwo ndə kə pa tshə ju trale,

mbrə ə̂në Əyïlingû tə Ndjapä nə

ə̂në tshə wâ ngbanga nə gâ pâ ye gâ ye kɔ,

tshə sə də awlra.»

9 Alayïngerə tshepashɔ nə nɔ̂ ə̂në əndje də aəndje nə mbrə̂ ə̂trû nə gâ ye kɔ â ə̂në tshelə əndje də aəndje nə mɔ̂ lə aərə rishi nə gâ ye kɔ, əndje kɨ əkɨ ə kɨ əyo tə̂ əndje mbrə ətshə je, alɔ ə̂në əndje sə kə wu ngâwo əwo nə ə̂në ə sə kə ju ətshə kɔ. 10 Əndje sə kə ka ngrʉ̂ mbrə awa əyo nə ə̂në tshə sə kə wu nə kɔ, â sə kə pa:

«Marä tə̂ əyo ənə̂ səye! Marä tə̂ əyo ənə̂ səye!

Âgbɔ̂ gala, gala Babilɔnə, gala ə̂në ə gbɔ ə gbɔ kɔ!

Kʉ lə ə̈nü alɔ bale,

alɔ ngbanga nə̂ zə tɔ̂ gâ ye!»

11 Aawoka aərə tshepashɔ ndje sə kə kɨ nə ə sə kə mbrə mbadja mbrə ətshə, mbrə ə̂në ə̈bə̈ əzü bale yɔ akongbɔ nə̂ əndje nə yɔ kwatəndje ne: 12 lɔrə, də ngbengewle ngendja, də aəkpʉ ə̂në andogɔ nə gbɔ ə gbɔ kɔ, də akədji, də aləba lanə ə̂në ə tshe ə tshe kɔ, də aə̂drɔ̂ aləba, də aləba ə̂në əndje mbrə̂ də ndakla aəje kɔ də aləba ə̂në ə sə ngirə kɔ, də aayɔ nɔ̂ ə̂në ə fu tə ə̂rɔ̂nə kɔ, də aərə nɔ̂ ə̂në əndje mbrə̂ də əji mbla kɔ, də aərə nɔ̂ ə̂në əndje mbrə̂ də aərɔ̂ aayɔ, də ədrô kowɔ, də kowɔ, ndje də əkpʉ ə̂në əndje ê ə pa marəbrə kɔ. 13 Əndje yɔ̂ ndje ndə əndje ərə ə̂në əndje ê ə pa kanelə kɔ, də aərə ə̂në əndje ko gâ ndə rəgo kɔ, də ayombo, ənə̂ sə̂ ə̂në əndje ê mirə tə̂ nə də dukanə kɔ, də duva, də kâdâ kə fa də rəgo, də ndjuwu mapa, də ərə ə̂në əndje ê ble tə̂ nə kɔ, də apagra, də andalimi, də ambrata, də akutu ambrata, gâ ndə akanga də alayïkânga. 14 Aawoka aərə nə sə kə pa kə ətshə ə pa:

«Aərə nə ə̂në əgo nə sə̂ tə̂ lɔsu zə kɔ,

ə rô ngrʉ̂ tə̂ zə gâ ye.

Aərə sə̂ nɔ̂ ə̂në ə fʉ ə fʉ â ə sə tə əgbro arishi kɔ,

ə yû tə̂ zə gâ ye,

əndje sə sə kə sɔtə̂ nə kwatəndje bale ne.»

15 Aawoka aərə nə ə̂në əndje dô tə̂ əndje tə alayïrishi nə mbrə ətshə nə kɔ, əndje sə kə ka ngrʉ̂ mbrə awa əyo nə ə̂në tshə sə kə wu nə kɔ; əndje kɨ əkɨ ə mbrə mbadja je. 16 Əndje pa əpʉ je ə pa:

«Marä tə̂ əyo ənə̂ səye! Marä tə̂ əyo ənə̂ səye!

Âgbɔ̂ gala ə̂në ə yî ləba lanə

də aə̂drɔ̂ aləba ə̂në ə tshe ə tshe kɔ gâ tə̂ ye kɔ,

ə̂në ə yî aərə lɔrə də aərə ə̂në əndje mbrə̂ də aəkpʉ ndogɔ

gâ ndə akədji gâ tə̂ ye kɔ!

17 Kʉ lə ə̈nü alɔ bale,

arishi ngbatshe ndɨ̂ gâ ye!»

Aawokpe də abato nɔ̂ də azü kə mbrə kosəra lə nə nɔ̂, də azü kə na la ə̂ngû əngbrʉ nɔ̂ gâ ndə aawombrə kosəra la ə̂ngû əngbrʉ nə nɔ̂ kâ ngrʉ̂ tə̂ ye, 18 â alɔ ə̂në əndje sə kə wu ngâwo əwo nə ə̂në ə sə kə ju ətshə nə kɔ, əndje tâ râwâ ə pa: «Gala ənə̂ta kə lï də âgbɔ̂ gala səye?» 19 Əndje gʉ̂ ashɔ gâ lə akrɔ əndje, ə sə̂ kə kɨ nə ə sə̂ lə mbadja ə sə̂ kə ta râwâ ə pa:

«Marä tə̂ əyo ənə̂ səye! Marä tə̂ əyo ənə̂ səye!

Âgbɔ̂ gala ə̂në arishi tshelə nə

mbrə̂ azü nɔ̂ ə̂në əndje sə̂ də abato kɔ tə alayïrishi gâ ye kɔ,

kʉ lə ə̈nü alɔ bale, ə dô tə̂ ye tə amba ətshe gâ ye!»

20 Tshelafɔ, sə̈ də ə̂rû mbrə kə liwu gala nə!

E-e ndje, azü nə̂ Ndjapä, də azü-awla gâ ndə aawopandəma Ndjapä,

e sə̈ də ə̂rû!

Mbrə ə̂në Ndjapä nə wû âdâ əpʉ nə̂ e gâ ye â wâ ngbanga gâ lə kumu ye gâ ye kɔ.

21 Bale, ə̈bə̈ trawaya nə̂ Ndjapä tə əyïworɔgbɔ zâ ə̈bə̈ əkpʉ ə̂në ə sə̂ mata ə̈bə̈ âgbɔ̂ lawû kɔ ə wlî gâ ala ə̂ngû əngbrʉ ə pâ:

«Kʉ də marä tə̂ awlra rə də̂ əndje sə kə za gala Babilɔnə nə,

âgbɔ̂ gala nə ə wli ətshə gâ tʉ,

â azü sə sə kə wu ətshə kwatəndje bale ne!

22 Azü sə sə kə dji kwatəndje əkɨ kundi nə̂ aawonɔ akundi nə,

də tshema aawovi ətshi nə,

də əkɨ âmblâ də ängɔ̈ nə̂ aawo-u nə alɔ bale lə zə ne.

Əndje sə sə kə sɔtə̂ ə̈bə̈ awombrə adongo aərə lə kəna kwatəndje alɔ bale lə zə ne,

əndje sə sə kə dji kwatəndje əkɨ lawû alɔ bale lə zə ne.

23 Əwo lamba sə sə kə za kwatə̂ye alɔ bale lə zə ne,

â əndje sə sə kə dji kwatəndje tshema koshe də yashe ə̂në əndje sə kə ko əndje kɔ alɔ bale lə zə ne.

Mbrə ə̂në aawoka aərə lə zə sə̂ leme-e tə əgbro azü tshepashɔ,

â kifi nə̂ zə frɔ̂ azü aəgɔ nɔ̂ â əndje djîngli äwä gâ ye.

24 Lə zə, ə̈ndjï aawopandəma Ndjapä də ənə̂ azü nə̂ Ndjapä

gâ ndə azü nɔ̂ ə̂në əndje wô əndje pâ ashɔ kɔ, ə tû gâ ye.»