1 Mandâ aərə səkɔ, mə lîshi kwatə̂mə, ə wû ə̈bə̈ manda ə̂në ə krɔ̂ mâ lafɔ-e.

Angbʉlî tshema sə̂ ə̂në ə kɨ̂ mata ängɔ̈, ə̂në mə djî ə̂në ə pâ əpʉ kə əmə kɔ pâ: «Ö mâtəye, mə sə kə yisə̂ ərə ə̂në ə lï ndə kə pa ə wutu mandânə je kɔ kə əbə bə wu.»

2 Kʉ pə kôto, Âgbɔ̂ Yîrə̂ zâ əmə â mə wû ə̈bə̈ mbata ngerə mâ lafɔ â ə̈bə̈ əzü sə̂ gâ tʉ gâ pâ mbata ngerə səkɔ. 3 Ətshə nə ə̂në tshə sə̂ gâ tʉ gâ pâ mbata ngerə nə kɔ, tshekotə̂ ye tshê mata aəkpʉ ə̂në əndje ê ə pa jasəpə də sarədwanə kɔ, â ə̈bə̈ awlingi ə̂në ə tshê mata əkpʉ ə̂në əndje ê ə pa emerɔdə kɔ sə̂ dji mbata ngerə nə. 4 Dji ndʉ mbata ngerə nə, alabə̈ ambata ngerə zazü bale amanə vəna sə̂ je. Â pâ ambata ngerə səkɔ, aâgbɔ̂ azü zazü bale amanə vəna sə̂ gâ tʉ, ə̂në əndje yî aə̂mbî aləba. Akpɔtɔ ngerə lɔrə sə̂ tə̂ kumu əndje. 5 Lə mbata ngerə nə, yavrɨ vɔ̂tə̂ kə sro nə sɔ gashu, â alabə̈ atshema də kə sɔ yavrɨ nə tɔ̂ lə nə gashu. Ətshi mbata ngerə nə, alamba mindû amanə bishi də əwo lə nə sə̂ kə tshe nə, ə̂në ə sə tə ayirə̂ nə̂ Ndjapä mindû amanə bishi kɔ. 6 Ətshi mbata ngerə nə, ə̈bə̈ ərə mata ə̂ngû əngbrʉ ngewle ngewle, ə̂në ə sə mata ərə ə̂në əndje ê ə pa krisətalə kɔ sə̂ je.

Lə ə̂grû nə, dji ndʉ mbata ngerə nə, alabə̈ asorô vəna ə̂në tshekotə̂ əndje nɔ̂ sə̂ kʉ də aala djoko ətshi əndje ndje djoko mandâ əndje kɔ sə̂ je. 7 Angbʉlî sorô nə kô bamara, bishi nə kô ə̈bə̈ akɔ pagra, vəta nə sə̂ də tshitshi mata tshitshi əzü, â vəna nə kô dɔkpalia ə̂në tshə sə kə rɨ lafɔ kɔ.* 8 Asorô nə vəna nə, ayə bale bale sə də akombo mindû amanə bale, â tshekotə̂ əndje nɔ̂ sə kʉ də aala gâ pa akombo əndje ndje tshekudu nə. Sɔ də tsheləbu sɔ də alɔ, əndje sə kə pa alɔnɔ̂ ə pa:

«Tshə sə kpî, tshə sə kpî, tshə sə kpî,

Əyïlingû tə Ndjapä, tə Âgbɔ̂ Əyïworɔgbɔ,

ətshə ə̂në tshə sə̂ je leme-e kerə, ə̂në tshə sə je kpəsəye â ə̂në tshə sə kə na gu nə kɔ!»

9 Â alɔnɔ̂ ə̂në asorô nə vəna nə sə kə mbe, ə sə kə lʉ, â ə sə kə za mərshe kə ətshə nə ə̂në tshə sə gâ tʉ gâ pâ mbata ngerə nə kɔ, â sə tə sorô də ə̂ngû də ə̂ngû piii kɔ, 10 aâgbɔ̂ azü nə zazü bale amanə vəna nə te gâ tshekudu ətshə nə ə̂në tshə sə gâ tʉ gâ pâ mbata ngerə nə kɔ ə ko kumu əndje su ashɔ gâ ətshi ye nə ə̂në tshə sə tə sorô də ə̂ngû də ə̂ngû piii kɔ. Əndje ko ndje akpɔtɔ ngerə nə̂ əndje nə ə wli gâ ətshi mbata ngerə nə ə pa:

11 «Əyïlingû, Ndjapä nə̂ ä,

bə lï ndə kə pa bə sɔtə̂

kə mbe ətshe də kə lʉ ətshe də awlra,

mbrə ə̂në əbə kə mbrə̂ aərə nɔ̂,

əbə kə yîndə nə â aərə nɔ̂ wû tsheshu

â bə mbrə̂ nɔ̂ gâ ye kɔ.»