1 Ə̈bə̈ əgerə ərə wûtu mâ lafɔ: ə̈bə̈ yashe yî alɔ gâ tə̂ ye tə ləba â yipʉ sə̂ gâ tshekudu aə̈nü ye â ə̈bə̈ kpɔtɔ ngerə də aambrepe morofo amanə bishi tə̂ nə sə̂ tə̂ kumu ye. 2 Tshə sə̂ də əndu â tshelə ye sə̂ kə ka ətshə ndə kə pa tshə zu â tshə sə̂ kə ta râwâ lə əyo nə ə̂në tshə sə kə wu nə kɔ.

3 Ə̈bə̈ ata ərə nə wûtu kwatə̂ye mâ lafɔ je: ə̈bə̈ əmbrʉ agia ə̂në tshə kô dabaderɔ* kɔ, ngirə mata əwo kɔ, akrɔ ye sə̂ mindû amanə bishi də aədɨ morofo, â akpɔtɔ ngerə mindû amanə bishi sə̂ tə̂ akrɔ ye nə. 4 Dambâ ye ngbô mbage aambrepe tshelafɔ bale lə vəta nə, ə̂në əndje â kru tshelə əndje vəta kɔ, ə wlî əndje gâ tə̂ ashɔ. Əmbrʉ agia səkɔ nâ ə kâ gâ ətshi yashe nə ə̂në tshə sə̂ kə zu nə kɔ, ndə kə pa tshə zɨ əgblə nə alɔ ə̂në tshə sə kə zu ətshə. 5 Tshə zû əgblə koshe, əgblə koshe səkɔ kə sə̂ â yisə̂ äwä kə amarä nɔ̂ də tshɔngblɔ kowɔ je*. Əndje zâ əgblə nə̂ ye nə o na ye mâ ngotə̂ Ndjapä də mbata ngerə nə̂ ye gâ ye. 6 Bale, yashe nə kpê, ənə̂ ye, mâ lə ngbûndû, ə̂në Ndjapä gâmba ə̈bə̈ ətshe mbrə ətshə mâ je gâ ye kɔ, ndə kə pa əndje ko rəgo kə ətshə lə aəlo sake bale də ngbangbo bishi amanə zazü vəta (1 260).Əmbrʉ agia

7 Bale, ə̈bə̈ kowɔ âfɔ mâ lafɔ je. Mishalə də atrawaya nə̂ ye mbrə̂ awlra tə̂ əmbrʉ agia nə. Əmbrʉ agia nə ndje də atrawaya nə̂ ye mbrə̂ kowɔ nə, 8 bale tshə rô pâ əyïkowɔ nə̂ ye nə rô ne, â ə̈bə̈ ətshe kwatə̂ye mbrə əndje sə̂ sə̂ je mâ lafɔ je ne. 9 Əndje wlî ətshə gâ tʉ, ətshə əmbrʉ agia nə, əkrɔ tshe leme-e nə, ətshə ə̂në əndje ê ətshə ə pa djablo də Sataa kɔ, ətshə ə̂në tshə djingli äwä tə̂ azü tshepashɔ nɔ̂ kɔ. Əndje wlî ətshə gâ pâ ashɔ gâ ye, ətshə də atrawaya nə̂ ye nə.

10 Bale, mə djî ə̈bə̈ tshema mâ lafɔ ə̂në ə pâ əpʉ tə âgbɔ̂ ə pa:

«Kpəsəye, ə sə tə alɔ ndə kə pa Ndjapä she azü nə̂ ye lə kuzu,

də alɔ awlra nə̂ ye də alɔ əgɔngerə nə̂ ye

də alɔ ngerə nə̂ Kristə nə̂ ye nə tɔ̂ gâ ye.

Mbrə ə̂në əndje wlî awolea alaye əzə̂ nə gâ tʉ gâ ye,

ətshə nə ə̂në tshə lea əndje sɔ də tsheləbu sɔ də alɔ ətshi Ndjapä nə kɔ.

11 Bale, alaye əzə̂ nə rô pâ ye də awlra gâ ye

mbrə ə̈ndjï Aya Ndalimi nə,

ndje mbrə əpʉ ə̂në əndje pâ də əɨrɨ ye kɔ.

Əndje wû sorô əndje wû tə âgbɔ̂ ərə lə ala əndje wala ətshi kuzu ne.

12 Rəkɔ, tshelafɔ, də e-e ə̂në e sə lafɔ nə kɔ,

e sə̈ lə âgbɔ̂ ə̂rû!

Bale, əyo gâ pâ e, ashɔ də ə̂ngû əngbrʉ,

mbrə ə̂në djablo jêrə gâ ndə e gâ ye

də âgbɔ̂ əkɔ tə̂ lɔsu ye,

mbrə ə̂në tshə wusə̂ nə ə pa alɔ daka tə̂ əne kʉ pə teashe!»

13 Alɔ ə̂në əmbrʉ agia nə wû ə pa əndje wlî əne gâ pâ ashɔ gâ ye kɔ, tshə vɔ̂tə̂ kə grɔ äwä yashe nə ə̂në tshə zû əgblə koshe nə kɔ. 14 Bale, əndje kô akombo âgbɔ̂ dɔkpalia bishi kə yashe nə ndə kə pa tshə rɨ də nə mâ lə ngbûndû, tə̂ ətshe nə ə̂në əndje lï kəmə ndə kə pa əndje ko rəgo tə̂ nə kə ətshə kɔ, ngrʉ̂ tə̂ əkrɔ* nə, lə ə̂ngû vəta də yipʉ mindû-a-bale. 15 Bale, əkrɔ nə ndjâ ə̂ngû lə ama ye, mata ə̈bə̈ âgbɔ̂ ə̂ngû mandâ yashe nə ndə kə pa ə̂ngû nə za ətshə ə ro də ətshə. 16 Bale, ashɔ kpê ndə yashe nə ə tɨ̂ ətshə gâ lafɔ: ama ashɔ nə krɔ̂ ə môro âgbɔ̂ ə̂ngû nə ə̂në əmbrʉ agia nə ndjâ lə ama ye nə kɔ. 17 Tshelə əmbrʉ agia nə kô ətshə tə̂ yashe nə, â tshə nâ na ye ndə kə pa tshə tɔ kowɔ tə̂ ə̂dû angwa yashe nə, tə̂ azü ə̂në əndje sə kə bata aəpʉ ama Ndjapä kɔ â ə̂në əndje sə də əpʉ nə̂ Jezu tə̂ lɔsu əndje kɔ. 18 Mandânə, tshə nâ ə kâ gâ pâ mindu tə̂ ama ə̂ngû əngbrʉ.