1 «Tä ngrowô kə trawaya nə̂ Ndjapä nə̂ Laglizə mâ Efazə:

«Əpʉ ə̂në ətshə ə̂në tshə tegbɔ aambrepe mindû amanə bishi gâ lə ndəkɔ ye kɔ, ə̂në ə sə kə na ana lə ə̂grû tə̂ aə̈nü alamba mindû amanə bishi ə̂në ə sə də lɔrə kɔ ə pa kɔ kə səye: 2 Mə wusə̂ aərə ə̂në bə sə kə mbrə nə kɔ də əyo ə̂në bə wu tə̂ kosəra ə̂në ə gbɔ ə gbɔ kɔ də kə ru tshelə zə lə aərə kɔ. Mə wusə̂ nə ngâ ə pa bə lï lï ndə kə pa bə kânga tshelə zə tə̂ aəmbrʉ azü ne. Bə trâ azü ə̂në əndje pa alane sə tə azü-awla, ə̂në əndje sə sə tə azü-awla nə ne kɔ, bə wû əndje tə alayïəterə gâ ye. 3 Bə wusə̂ kə ru tshelə zə lə aərə: bə wû əyo mbrə əmə â bə mɔ̂ mɔ̂ tə̂ äwä nə ne. 4 Bale, əpʉ ə̂në mə sə də nə gâ tə̂ zə kɔ sə rəke: bə tshî äwä angbʉlî kə yi tə̂ nə̂ zə tʉ gâ ye. 5 Rəkɔ, lï tshelə zə gâ tə̂ ətshe ə̂në bə tê tə̂ nə kɔ. Tshï äwä nə tʉ gbrä ə gü ndə aangbʉlî aərə ə̂në bə sə̂ kə mbrə nə ətshinə kɔ; də̂ ne, mə sə kə gu ndə zə ə djɔ ə̈nü alamba nə̂ zə nə tə̂ ə̂sə̂ nə gashe, kədə bə tshi äwä kə mbrə tə̂ zə nə tshi tʉ gbrä ne. 6 Bale, bə sə də ərə səke ndə zə: tshelə zə wəra tə̂ ye tə̂ aərə ə̂në azü aangbɔ nə̂ Nikola ə mbrə kɔ*, mata ə̂në tshelə əmə də ə̂tə̂ əmə wəra tə̂ ye tə̂ nə kɔ.

7 «Əzü ə̂në tshə sə də ətu, tshə djï əpʉ ə̂në Yîrə̂ ə pa kə Alaglizə kɔ!

«Əzü ə̂në tshə ro pa əmbrʉ ərə də awlra, mə sə kə za äwä kə ətshə ndə kə pa tshə zɨ leyɔ sorô ə̂në ə sə lə paradi nə̂ Ndjapä kɔ*.»

8 «Tä ngrowô kə trawaya nə̂ Ndjapä nə̂ Laglizə mâ Səmirənə:

«Əpʉ ə̂në ətshə ə̂në tshə sə tə angbʉlînə də bale nə kɔ, ətshə ə̂në tshə tshû gâ ye â sə tə sorô kwatə̂ye kɔ ə pa kɔ kə səke: 9 Mə wusə̂ ərə əyo ə̂në bə sə lə nə kɔ də əyo zə, kandää bə sə tə əyïrishi. Mə wusə̂ aəpʉ ə̂në azü ə̂në əndje pa alane sə tə Ajuwufu, ə̂në ə sə sə tə Ajuwufu nə ne kɔ ə pa gâ tə̂ zə kɔ, əndje sə tə azü aangbɔ nə̂ Sataa. 10 Awa ə̈bə̈ ərə bale ə̂në bə wu əyo lə nə je kɔ mbrə̈ əbə mbrə̈ ne. Djablo ə ko alabə̈ azü lə takpa tə̂ e ə wli əndje gâ lə anda kânga je, ndə kə pa tshə tra e, e sə kə sə lə ərə əyo lə aəlo morofo. Däka pə tə̂ äwä əpʉ lɔsu ʉrrr ndjɔ gâ tə̂ kuzu, mə za sorô kə əbə tə ərə tshe mandânə je.

11 «Əzü ə̂në tshə sə də ətu, tshə djï əpʉ ə̂në Yîrə̂ ə pa kə Alaglizə kɔ!

«Əzü ə̂në tshə sɔ lagbanga, bishi kuzu sə sə kə ma ə̈bə̈ ərə bale tə̂ ye ne.»

12 «Tä ngrowô kə trawaya nə̂ Ndjapä nə̂ Laglizə mâ Perəgamə:

«Əpʉ ə̂në ətshə ə̂në tshə sə də ə̈ngrʉ̈ kamba ə̂në aama nə bishi ki ə ki kɔ ə pa kɔ kə səke: 13 Mə wusə̂ ətshe ə̂në bə lo tə̂ nə kɔ, kôto də̂ mbata ngerə nə̂ Sataa sə je kɔ. Bale, bə tɔ popo əmə, bə tshî äwä əpʉ lɔsu zə ə̂në bə zâ kə əmə kɔ tshî tʉ ne, kəmə ndje tə̂ alɔ ə̂në azü wô Atipasə, awopandəma əpʉ nə̂ əmə də äwänə, mâ ndə e, tə̂ ətshe ə̂në Sataa ə sə tə̂ nə kɔ. 14 Bale, mə sə də alabə̈ aəpʉ gâ tə̂ zə: bə sə də alabə̈ azü kpə ndə zə kôto ə̂në əndje zâ tə̂ əndje gâ tə̂ äwä kə yisə̂ ərə nə̂ Balamə kɔ.* Leme-e, Balamə nə yîsə̂ äwä kə Balakə ndə kə pa tshə gi azü əgɔ Isərayalə ndə kə pa əndje zɨ aagia ə̂në azü tô də əkrɔ kə aamba andjapä kɔ də kə mbrə ə̂trû kanika əndje te gâ lə əmbrʉ ərə. 15 Äwä bale ndje, əbə nɔ̂, bə sə də alabə̈ azü ə̂në əndje zâ tə̂ əndje gâ tə̂ äwä kə yisə̂ ərə nə̂ azü aangbɔ nə̂ Nikola kɔ. 16 Rəkɔ, tshï äwä səkɔ tʉ gbrä; də̂ ne, mə sə kə gu ndə zə katshä katshä səye ə tɔ kowɔ tə̂ azü səkɔ də ə̈ngrʉ̈ kamba tshelə ama əmə.

17 «Əzü ə̂në tshə sə də ətu, tshə djï əpʉ ə̂në Yîrə̂ ə pa kə Alaglizə kɔ!

«Əzü ə̂në tshə sɔ lagbanga, mə sə kə za manə ə̂në mə zâ wû kɔ də ə̈bə̈ ə̂mbî badja kə ətshə. Gâ pâ ə̂mbî badja səkɔ, əndje tâ ə̈bə̈ tafa əɨrɨ ə̂në ə̈bə̈ əzü bale wusə̂ nə wu ne kɔ, kʉtə̂ ətshə nə ə̂në tshə sɔtə̂ badja nə kɔ kə wusə̂ nə.»

18 «Tä ngrowô kə trawaya nə̂ Ndjapä nə̂ Laglizə mâ Tiatirə:

«Əpʉ ə̂në Ɨrɨ Ndjapä, ətshə ə̂në andila ye sə mata ala əwo ə̂në ə tshe ə tshe kɔ, â ə̂në aə̈nü ye sə mata gbenge ə̂në ə tshe ə tshe kɔ ə pa kɔ kə səke: 19 Mə wusə̂ aərə ə̂në bə sə kə mbrə nə kɔ, də äwä kə yi tə̂ nə̂ zə, də əpʉ lɔsu zə, də ə̂rɔ̂ ərə ə̂në bə mbrə kə azü kɔ gâ ndə äwä kə ru tshelə zə lə aərə. Mə wusə̂ nə ngâ ə pa aərə ə̂në bə mbrə̂ djoko mandânə kɔ ə ngbâ ə rô aangbʉlî aənə̂ sə̂ ə̂në bə mbrə̂ ətshinə gâ ye kɔ. 20 Bale, əpʉ ə̂në mə sə də nə gâ tə̂ zə kɔ sə rəke: bə katə̂ äwä kə Jezabalə,* yashe səkɔ, ə̂në tshə pa əne sə tə awopandəma Ndjapä kɔ, tshə sə kə djingli äwä tə̂ alayïkosəra nə̂ əmə, ə̂në tshə sə kə yisə̂ äwä kə mbrə ə̂trû də kə zɨ aagia ə̂në əndje tô də əkrɔ kə aamba andjapä kɔ kə əndje kɔ. 21 Mə kâtə̂ äwä kə ətshə ndə kə pa tshə tshi angbrɔ äwä kə mbrə tə̂ ye nə tʉ gbrä, bale tshə yi yində kə pa tshə tshi äwä ə̂trû nə̂ ye nə tʉ ne. 22 Mə sə kə za ətshə ə wli ətshə gâ pâ ə̈bə̈ klʉngbʉ âgbɔ̂ əyo, ətshə də azü nə ə̂në əndje də aəndje ə mbrə ərə ə̂trû nə kɔ, kədə əndje tshi äwä aərə nə ə̂në əndje mbrə kɔ tshi tʉ ne. 23 Mə sə kə wo azü nɔ̂ ə̂në əndje za äwä ye kɔ. Rəkɔ, Alaglizə nɔ̂ sə kə wusə̂ nə kpro ə pa əmə kə sə̂ â wusə̂ aəpʉ ə̂në ə sə tə̂ lɔsu azü kɔ də aəgo lɔsu əndje. Mə sə kə ko aərə kə əzü bale bale lə takpa tə̂ e, ə lï də aərə ə̂në tshə mbrə̂ gâ ye kɔ.

24 «Bale, ə də̂ ənə̂ e, ə̂dû azü əgɔ Tiatirə nɔ̂, ə̂në e mbrə̂ ərə mbrə̂ Lïndə̂ kə yisə̂ ərə səkɔ ne â wûsə̂ ərə ə̂në əndje ê ə pa tshebudu lengerə aəpʉ nə̂ Sataa kɔ wû alɔ bale ne kɔ, mə pa kə e: mə sə sə kə za ə̈bə̈ ata kongbɔ gâ pâ e ne. 25 Kʉtə̂ əpʉ bale, ərə ə̂në e sə də nə kɔ, e zä tə̂ e nɔ̂ gâ tə̂ nə ʉrrr ndjɔ gâ tə̂ alɔ kə yi kumu əmə. 26 Əzü ə̂në tshə sɔ lagbanga, ə̂në tshə daka pə kə mbrə aərə ə̂në tshelə əmə yində nə kɔ ʉrrr ndjɔ gâ tə̂ ama nə, mə sə kə za əpʉ ngerə gâ pâ amarä kə ətshə. 27 Tshə sə kə yisə̂ äwä kə əndje də tshɔngblɔ kowɔ, tshə sə kə ndɨ tshelə əndje mata ə̂në əzü sə kə ndɨ tshelə aləsû ə̂tô kɔ,* 28 mata ə̂në, əmə ndje, mə sɔ̂tə̂ əpʉ ngerə nə lə kəna Abä əmə kɔ. Â mə sə kə za təmble kə ətshə.

29 «Əzü ə̂në tshə sə də ətu, tshə djï əpʉ ə̂në Yîrə̂ ə pa kə Alaglizə kɔ!»