1 Bale, mə wû ə̈bə̈ trawaya nə̂ Ndjapä nə ə̂në tshə tô mâ lafɔ ə sə̂ kə jerə nə kɔ, ə̂në tshə têgbɔ krele manda âgbɔ̂ kudû ə̂në ə lî tə bandanə kɔ də ə̈bə̈ âgbɔ̂ ə̂wû kowɔ gâ lə kəna ye kɔ. 2 Tshə têgbɔ əmbrʉ agia nə, əkrɔ tshe leme-e nə, ə̂në tshə də̂ djablo də Sataa nə kɔ, ə î ətshə mbrə ə̂ngû sake bale (1 000). 3 Tshə zâ ətshə ə wlî ətshə gâ lə âgbɔ̂ kudû nə ə kânga manda nə də krele nə gâ pâ ye ə zâ tapɔ gâ pâ nə, ndə kə pa tshə kwatə̂ye kwa ə djingli äwä tə̂ azü aəgɔ ne ʉrrr ndjɔ ə̂ngû sake bale (1 000) nə nglɔ gâ ye kane. Mandânə, əndje sə kə wora ətshə teashe gâ ye kane.

4 Mandâ ərə səkɔ, mə wû ambata ngerə. Azü nə ə̂në əndje sə̂ gâ tʉ gâ pâ nə kɔ, əndje zâ äwä kə əndje ndə kə pa əndje wa ngbanga. Mə wû ndje ayirə̂ azü ə̂në əndje dê aəgʉ əndje kprû mbrə əpʉ nə̂ Jezu ə̂në əndje pâ gâ ye kɔ gâ ndə Əpʉ nə̂ Ndjapä kɔ. Əndje sə̂ ə̂në əndje wəra tə̂ əndje ndə kə vrɔ agia nə wala foto ye nə kɔ, ə̂në əndje tâ əɨrɨ agia nə tâ gâ tə̂ matshi əndje wala gâ tə̂ kəna əndje nə ne kɔ, əndje dô tə̂ əndje tə asorô â əndje də a-Kristə mbrə̂ ngerə lə ə̂ngû sake bale (1 000). 5 Ə̂dû akuzu nə dô tə̂ əndje dô tə asorô nə ne ʉrrr ndjɔ ə̂ngû sake bale (1 000) nə ə nglɔ gâ ye kane. Angbʉlî kə she azü kə sə̂. 6 Ənə̂ ye tə ə̂rɔ̂nə â tshə sə tə ənə̂ Ndjapä, əzü ə̂në tshə sə lə takpa tə̂ azü nə ə̂në əndje she angbʉlînə kɔ! Bishi kuzu sə sə kə mbrə ə̈bə̈ ərə tə̂ azü səkɔ ne, bale əndje sə kə sə tə aawotokrɔ nə̂ Ndjapä də əndje nə̂ Kristə â əndje də a-Kristə nə ə mbrə ngerə lə ə̂ngû sake bale (1 000) je.

7 Alɔ ə̂në ə̂ngû sake bale (1 000) nə â nglɔ gâ ye, əndje sə kə wora Sataa nə lə kânga nə̂ ye nə. 8 Â tshə sə kə wutu ndə kə pa tshə djingli äwä tə̂ azü aəgɔ ə̂në əndje sə lə aə̂ngʉ̂ tshepashɔ vəna kɔ: Gɔgə də Magɔgə*, ndə kə pa tshə ngbo əndje gâ tə̂ nə mbrə kə tɔ kowɔ. Kumu əndje ngba mata mindu tə̂ ama ə̂ngû əngbrʉ. 9 Əndje rô na na ye pâ ashɔ nɔ̂ ə kpê dji bâda nə̂ azü nə̂ Ndjapä nə də tshelə gala nə ə̂në Ndjapä yîndə nə tə bandanə kɔ. Bale, ə̈bə̈ əwo tô mâ lafɔ ə jêrə ə jû əndje nɔ̂. 10 Djablo nə ə̂në tshə djîngli əndje nə kɔ, əndje zâ ətshə ə wlî ətshə gâ ala âgbɔ̂ kudû əwo abadja ə̂në ə sho ətshe ə sho kɔ, tə̂ ətshe nə ə̂në agia nə də awopandəma ndjapä əterə sə̂ tə̂ nə kɔ. Əndje sə kə wu əyo sɔ də tsheləbu sɔ də alɔ, də ə̂ngû də ə̂ngû piii.

11 Bale mandânə, mə wû ə̈bə̈ əgerə ə̂mbî mbata ngerə də ətshə nə ə̂në tshə sə̂ gâ tʉ gâ pâ nə kɔ. Tshelafɔ də ashɔ kpê ətshi ye gâ ye â ə sə̂ sə̂ je kwatəndje ne. 12 Bale, mə wû akuzu, aâgbɔ̂ əndje də aəngʉ əndje, əndje kâ gâ lafɔ gâ ətshi mbata ngerə nə. Əndje ndjɔ̂ tshela alabə̈ afraka, â əndje ndjɔ̂ tshela ə̈bə̈ ata fraka nə ə̂në ə sə tə fraka sorô kɔ. Əndje wâ ngbanga gâ pâ akuzu nə ə lï də ərə ə̂në əndje tâ gâ lə afraka nə kɔ, Lïndə̂ aərə ə̂në əndje mbrə̂ gâ ye kɔ. 13 Ə̂ngû əngbrʉ kô əndʉ akuzu ə̂në əndje sə̂ lə ye kɔ gashu, kuzu də ə̂sə̂ akuzu kô əndʉ akuzu ə̂në əndje sə̂ lə əndje kɔ gashu, â əndje wâ ngbanga gâ pâ əndje ə lï də aərə ə̂në əzü bale bale mbrə̂ gâ ye kɔ. 14 Mandânə, əndje zâ kuzu gâ ndə ə̂sə̂ akuzu nə ə wlî əndje gâ ala âgbɔ̂ kudû əwo. Ala âgbɔ̂ kudû əwo nə kə də̂ bishi kuzu nə. 15 Əzü nɔ̂ ə̂në əndje sɔ̂tə̂ əɨrɨ ye sɔ̂ lə fraka sorô nə ne kɔ, əndje zâ ətshə ə wlî ətshə gâ ala âgbɔ̂ kudû əwo nə.