1 Mandânə, əndje zâ ə̈bə̈ wara ə̂në ə kô ə̈bə̈ aya ayɔ kə lï gâ tə̂ aərə kɔ kə əmə, ə pâ kə əmə ə pa: «Äfɔ ə lï tshelə Anda Ndjapä nə də gblaka nə ə dɨ̈ azü nə ə̂në əndje sə̂ kə vrɔ Ndjapä nə mâ je kɔ. 2 Bale, tshelə Anda nə djoko ə̂shû nə, kätə̂ nə gâ ye ə dɨ̈ dɨ̈ ne, mbrə ə̂në əndje kâtə̂ nə kə amarä ə̂në əndje wusə̂ Ndjapä wu ne kɔ gâ ye. Əndje sə kə dɔ tshelə gala nə ə̂në ə sə kpî kɔ də aə̈nü əndje lə yipʉ zazü bishi amanə bishi*. 3 Mə sə kə wla azü bishi nə ə̂në əndje pa əpʉ nə̂ əmə kɔ ndə kə pa əndje pa əpʉ tə aawopandəma Ndjapä, ə̂në əndje yî aləba mbadja kɔ, lə əlo sake bale də ngbangbo bishi də tshepa nə zazü vəta (1 260).»

4 Azü sə̂ bishi ə̂në əndje pa əpʉ nə̂ əmə nə kɔ kə də̂ aayɔ ɔlivə nə bishi də aə̈nü alamba nə bishi nə ə̂në ə ka ətshi Âgbɔ̂ Əyïngerə tshepashɔ kɔ.* 5 Kədə ə̈bə̈ əzü kə yində kə pa əne mbrə ə̈bə̈ əmbrʉ ərə tə̂ əndje, əwo wütu lə ama əndje ə jü alayïkowɔ nə̂ əndje nə. Ayî, kədə ə̈bə̈ əzü kə yində kə pa əne mbrə ə̈bə̈ əmbrʉ ərə tə̂ əndje, ə lï ndə kə pa tshə tshu kʉ rə. 6 Əndje sə də awlra ndə kə pa əndje kânga tshelafɔ ndə kə pa yavrɨ ni ni ne lə aəlo nɔ̂ ə̂në əndje sə kə mbrə kosəra nə̂ əndje nə̂ aawopandəma Ndjapä nə kɔ. Əndje sə ndje də awlra ndə kə pa əndje do aə̂ngû tə ə̈ndjï ə mbrə adongo aəmbrʉ aərə nɔ̂ gâ pâ ashɔ, alɔ ə̂në tshelə əndje yində nə.*

7 Alɔ ə̂në əndje sə kə pa Əpʉ nə̂ Ndjapä nə ə nglɔ, agia nə ə̂në tshə tô lə âgbɔ̂ kudû ə̂në ə lî rô pâ nə â ə sə̂ kə o nə kɔ, tshə sə kə tɔ kowɔ tə̂ əndje ə ro pâ əndje də awlra ə wo əndje. 8 Aəko əndje sə kə daka pə la âgbɔ̂ äwä tshelə âgbɔ̂ gala ə̂në əndje dô ə dô ə ê ə pa Sɔdɔmə də Ejipətə kɔ, tə̂ ətshe ə̂në azü kû Âgbɔ̂ Əyïngerə nə̂ əndje gâ ala masheyɔ tə̂ nə ndje kɔ. 9 Azü aəgɔ nɔ̂, lə amarä nɔ̂, lə aama aəgɔ nɔ̂, lə ashɔ aəgɔ nɔ̂ sə kə shekɔ aəko əndje nə lə əlo vəta də tshegrû nə, â əndje sə sə kə katə̂ äwä ndə kə pa əndje shi aəko əndje nə ne. 10 Azü tshepashɔ sə kə sə də ə̂rû mbrə kuzu əndje nə, â əndje sə kə mbrə sandaga ə wla aərə tə aâkrâ kə angâ əndje lə takpa tə̂ əndje, mbrə ə̂në aawopandəma Ndjapä sə̂ bishi kɔ nâ də əyo ngbatshe gâ pâ azü tshepashɔ nə. 11 Mandâ aəlo vəta nə də tshegrû nə nə, ə̈bə̈ əwu sorô ə̂në ə tô mâ ndə Ndjapä ə nâ kɔ, ə lî gâ lə aawopandəma Ndjapä səkɔ â əndje âfɔ ə kâ gâ lafɔ də ə̈nü əndje. Âgbɔ̂ awa zâ azü nə ə̂në əndje sə̂ kə shekɔ əndje nə kɔ. 12 Aawopandəma Ndjapä səkɔ djî ə̈bə̈ tshema ə̂në ə tô mâ lafɔ ə pâ əpʉ tə âgbɔ̂ kə əndje kɔ ə pa: «E ö mâtəye!» Əndje ô na ye gâ lafɔ nə lə andra â alayïkowɔ nə̂ əndje nə sə̂ kə shekɔ əndje. 13 Tə̂ alɔ nə səkɔ, ashɔ même tə bandanə â mbage tshelə gala nə bale lə morofo nə, ə̂në əndje â kru tshelə morofo kɔ, ə ngɔ̂ gâ tʉ. Azü sake mindû amanə bishi (7 000) tshû lə kə meme ashɔ səkɔ. Ə̂dû azü nə mbrə̂ awa ə mbê Ndjapä ə̂në tshə sə lafɔ kɔ.

14 Bishi ərə əyo nə rô gâ ye. Vəta ərə əyo nə sə kə wutu katshä katshä səye.

15 Bale, mindû amanə bishi trawaya nə̂ Ndjapä nə û ängɔ̈ nə. Atshema tô mâ lafɔ ə kɨ̂ tə âgbɔ̂ ə pa:

«Ngerə tshepashɔ sə̂ gâ lə kəna Əyïlingû Ndjapä nə̂ əzə̂

də Kristə nə̂ ye gâ ye.

Tshə sə kə mbrə ngerə nə piii!»

16 Aâgbɔ̂ azü nə zazü bale amanə vəna nə ə̂në əndje sə̂ gâ tʉ gâ pâ ambata ngerə nə ətshi Ndjapä nə kɔ, əndje tê gâ tʉ ə zâ kumu əndje su ashɔ ə vrɔ̂ Ndjapä nə 17 ə pa:

«Ä za mərshe kə əbə,

Əyïlingû Ndjapä, Âgbɔ̂ Əyïworɔgbɔ,

əbə ə̂në bə sə kpəsəye ə sə̂ je kerə kɔ,

mbrə ə̂në bə yîsə̂ âgbɔ̂ awlra nə̂ zə gashu

ə zâ ngerə nə̂ zə tɔ gâ lafɔ gâ ye.

18 Azü aəgɔ mbrə̂ əkɔ,

bale alɔ əkɔ nə̂ zə tɔ̂ gâ ye.

Ənə̂ akuzu ə sə tə alɔ kə wa ngbanga nə̂ əndje,

də alɔ kə ko aərə kə alayïkosəra nə̂ zə, aawopandəma Ndjapä,

də azü nə̂ zə ə̂në əndje sə kpî kɔ gâ ndə azü ə̂në əndje sə kə kpe rawa əɨrɨ zə kɔ,

aəngʉ azü də aâgbɔ̂ azü.

Ə sə ndje tə alɔ ndə kə pa bə ndɨ

azü ə̂në əndje sə kə ndɨ tshepashɔ nə kɔ.»

19 Bale, Anda Ndjapä nə ə̂në ə sə mâ lafɔ kɔ, ə krɔ̂, â əzü lî ndə kə wu sandugu mbʉkʉ nə̂ Ndjapä nə ə̂në ə sə̂ kpə tə̂ âgbɔ̂ ətshe lə Anda nə̂ ye nə kɔ. Bale, yavrɨ srô, atshema kɨ̂, yavrɨ nə sɔ̂ â ashɔ même â vɔdjɔndjɔ yɔ̂ gâ tʉ tə bandanə.