1 Bale, ə̈bə̈ trawaya nə̂ Ndjapä nə bale lə takpa tə̂ əndje mindû amanə bishi nə ə̂në əndje kô akopo mindû amanə bishi nə gâ lə kəna əndje nə kɔ nâ ə pâ əpʉ kə əmə. Tshə pâ kə əmə ə pa: «Nä gâ əmə, mə sə kə yisə̂ ngbanga ə̂në əndje wa gâ lə kumu âgbɔ̂ yashe ə̂trû nə je, ə̂në tshə sə̂ gâ tʉ gâ tə ama aâgbɔ̂ aə̂ngû kɔ. 2 Ətshə də̂ əndje də alayïngerə tshepashɔ mbrə̂ ə̂trû nə gâ ye kɔ, â duva ə̂trû nə̂ ye nə mbrə̂ azü nə pâ ashɔ nə gâ ye kɔ.»

3 Tshə zâ əmə ə rô də əmə, tə̂ äwä Yîrə̂, lə ə̈bə̈ ngbûndû. Bale, mə wû ə̈bə̈ yashe ə̂në tshə sə̂ gâ tʉ gâ pâ ə̈bə̈ ə̂drɔ̂ agia ə̂në aəɨrɨ kə gu aə̂gû tə̂ Ndjapä kɔ zâ tshekotə̂ ye nɔ̂ gâ ye kɔ, â ə̂në akrɔ ye sə̂ mindû amanə bishi â aədɨ ye sə̂ morofo kɔ. 4 Yashe səkɔ yî ə̂drɔ̂ ləba ə̂në ə tshe ə tshe kɔ ə yî aərə lɔrə də aərə ə̂në əndje mbrə̂ də aəkpʉ ə̂në ndogɔ nə gbɔ̂ wââ kɔ gâ ndə aərə tshelə əgʉ gâ tə̂ ye. Tshə zâ ə̈bə̈ kopo lɔrə gâ lə kəna ye, ə̂në aərə kene də aəmbrʉ aərə ə̂trû nə̂ ye nə sû trɔ̂ gâ ye kɔ. 5 Tə̂ matshi ye, əndje tâ ə̈bə̈ əɨrɨ ə̂në əzü wu âdâ nə wu ne kɔ ə pa: «Âgbɔ̂ gala Babilɔnə, əyï ayashe ə̂trû də aərə kene tshepashɔ.» 6 Mə wû yashe səkɔ ə̂në tshə ndjû ə̈ndjï azü nə̂ Ndjapä də ə̈ndjï azü ə̂në əndje pa əpʉ gâ pâ Jezu kɔ â sə̂ kə mbrə ətshə tə ə̂pî kɔ.

Ə̂në mə wû ətshə kɔ, kumu əmə kpê pâ əndu əmə nɔ̂ gâ ye. 7 Trawaya nə̂ Ndjapä nə pâ kə əmə ə pa: «Kumu zə kpê pâ əndu zə mbrə yea? Mə sə kə yisə̂ lengerə əpʉ yashe nə də əpʉ agia nə ə̂në tshə za yashe nə gâ pâ ye, agia nə ə̂në akrɔ ye sə mindû amanə bishi â aədɨ ye sə morofo kɔ, kə əbə. 8 Agia nə ə̂në bə wû ətshə kɔ, tshə sə̂ je ətshinə, bale tshə sə sə je kwatə̂ye ne. Tshə sə kə afɔ lə âgbɔ̂ kudû nə ə̂në ə lî tə bandanə kɔ ə o ə na gâ ə̂sə̂ kə liwu ərə. Azü tshepashɔ, əndje ə̂në əndje tâ əɨrɨ əndje tâ gâ lə fraka sorô nə ne kerə pə tə̂ alɔ kə mbrə tshepashɔ nə kɔ, kumu əndje sə kə kpe pâ əndu əndje, alɔ ə̂në əndje sə kə wu agia nə kɔ, mbrə ə̂në tshə sə̂ je ətshinə, ə sə sə je kwatə̂ye ne â tshə wutu kwatə̂ye je.

9 «Kotəye də̂ əzü lï ndə kə pa tshə wusə̂ ərə ə wusə̂ âdâ nə. Akorɔ mindû amanə bishi nə kə də̂ akaga mindû amanə bishi ə̂në yashe nə sə gâ tʉ gâ pâ nə kɔ. Ə tə nə kə də̂ ndje alayïngerə mindû amanə bishi: 10 mindû lə takpa tə̂ əndje tê gâ ye, mindû amanə bale nə sə je kpəsəye, â mindû amanə bishi nə te te pa ə na ne; alɔ ə̂në tshə â na, tshə sə kə daka pə kʉ teashe. 11 Agia nə ə̂në tshə sə̂ je ətshinə â sə sə je kwatə̂ye ne kɔ, tshə sə də ə̂tə̂ ye tə mindû amanə vəta əyïngerə nə. Tshə sə ndje lə takpa tə̂ alayïngerə nə mindû amanə bishi nə, â tshə sə kə ro gâ tə̂ ə̂sə̂ kə liwu ətshe.

12 «Aədɨ morofo nə ə̂në bə wû kɔ, ə sə tə alayïngerə morofo ə̂në əndje te te pa ə sɔtə̂ äwä kə mbrə ngerə ne kɔ, bale əndje sə kə sɔtə̂ äwä nə tə alayïngerə nə kʉ lə ə̈nü alɔ bale, əndje də agia nə. 13 Alayïngerə sə̂ nɔ̂ kɔ, əndje sə kʉ də əpʉ bale tə̂ lɔsu əndje: əndje za awlra nə̂ əndje nə də ngerə nə̂ əndje nə kə agia nə je. 14 Əndje tɔ kowɔ tə̂ Aya Ndalimi nə je, â Aya Ndalimi nə ə ro pâ əndje də awlra je, mbrə ə̂në tshə sə tə Âgbɔ̂ Əyïngerə nə̂ aâgbɔ̂ alayïngerə nɔ̂ də Əyïngerə nə̂ alayïngerə nɔ̂. Azü ə̂në tshə ê əndje gâ ye ə kê əndje gâ ye kɔ â ə̂në əndje tɔ popo äwä ye kɔ, əndje ro ndje pâ əndje də awlra je.» 15 Mandânə, trawaya nə̂ Ndjapä nə pâ kə əmə ə pa: «Ama aâgbɔ̂ aə̂ngû nə ə̂në bə wû, ə̂në yashe ə̂trû nə sə̂ gâ tʉ gâ pâ nə kɔ, ə tə nə kə də̂ azü aəgɔ, də aə̂kpû azü, də azü ashɔ aəgɔ də azü aama aəgɔ. 16 Bale, ə də̂ ənə̂ aədɨ nə morofo nə ə̂në bə wû kɔ də ənə̂ agia nə, əndje vɔtə̂ kə wəra tə̂ əndje tə̂ yashe ə̂trû nə je, ə ko aərə nɔ̂ tə̂ ye je â katə̂ ye kpɔnderɔ je; əndje zɨ adɔ̂ngɔ̂ ye ə sho ətshə ə sho nɔ̂ də əwo je. 17 Mbrə ə̂në Ndjapä zâ gâ tə̂ lɔsu əndje ndə kə pa əndje mbrə ndəma ərə ə̂në tshə gâmba gâ ye ndə kə mbrə nə kɔ, ə mbrə ndəma kʉtə̂ əpʉ bale nə ə̂në ə sə tə̂ lɔsu əndje nə kɔ ə ko angerə nə̂ əndje nə kə agia nə, ʉrrr ndjɔ ndəma aəpʉ nə̂ Ndjapä nə ə mbrə gâ ye kane.

18 «Yashe nə ə̂në bə wû ətshə kɔ, ətshə kə də̂ âgbɔ̂ gala nə ə̂në ə sə də ngerə gâ pâ alayïngerə nɔ̂ pâ ashɔ kɔ.»