1 Mandânə, mə wû atrawaya nə̂ Ndjapä vəna, ə̂në əndje kâ gâ lafɔ lə aə̂ngʉ̂ tshepashɔ vəna kɔ. Əndje gbɔ̂ tə̂ äwä tə̂ aəyi vəna tshepashɔ, ndə kə pa ə̈bə̈ əyi bale yi yi wala pâ ashɔ wala la ə̂ngû əngbrʉ wala gâ tə̂ ə̈bə̈ ayɔ bale ne. 2 Â mə wû ə̈bə̈ ata trawaya nə̂ Ndjapä nə ə̂në tshə âfɔ djoko tə̂ ətshe ə̂në alɔ ə afɔ tə̂ nə kɔ ə zâ tapɔ nə̂ Ndjapä nə ə̂në tshə sə tə sorô kɔ gâ lə kəna. Tshə tâ râwâ kə atrawaya nə̂ Ndjapä nə vəna kɔ ə̂në əndje zâ äwä kə əndje ndə kə pa əndje mbrə əmbrʉ ərə tə̂ ashɔ də ə̂ngû əngbrʉ kɔ ə pa: 3 «E mbrə̈ mbrə̈ əmbrʉ ərə tə̂ ashɔ nə wala tə̂ ə̂ngû əngbrʉ nə wala tə̂ aayɔ ne, ʉrrr ä za tapɔ trɔ matshi alayïkosəra nə̂ Ndjapä nə̂ əzə̂ gâ ye kane.» 4 Bale, mə djî kə ngba azü nə ə̂në əndje zâ tapɔ nə gâ tə̂ matshi nə kɔ, əndje sə sake ngbangbo bale də zazü bishi amanə vəna (144 000) lə amarä azü əgɔ Isərayalə nɔ̂:

5 lə marä Juda, azü sake morofo amanə bishi (12 000) də̂ əndje zâ tapɔ nə gâ tə̂ matshi əndje nə kɔ;

lə marä Ruba, azü sake morofo amanə bishi (12 000);

lə marä Gadə, azü sake morofo amanə bishi (12 000);

6 lə marä Azarə, azü sake morofo amanə bishi (12 000);

lə marä Nefətali, azü sake morofo amanə bishi (12 000);

lə marä Manase, azü sake morofo amanə bishi (12 000);

7 lə marä Shemeyɔ, azü sake morofo amanə bishi (12 000);

lə marä Levi, azü sake morofo amanə bishi (12 000);

lə marä Isakarə, azü sake morofo amanə bishi (12 000);

8 lə marä Zabulɔ, azü sake morofo amanə bishi (12 000);

lə marä Jozafu, azü sake morofo amanə bishi (12 000);

lə marä Bejama, azü sake morofo amanə bishi (12 000) də̂ əndje zâ tapɔ nə gâ tə̂ matshi əndje nə kɔ.

9 Mandânə, mə wû ə̈bə̈ əgerə ə̂kpû azü ə̂në ə̈bə̈ əzü bale lï lï ndə kə pa tshə dɨ əndje ne kɔ, azü nə sə̂ lə ashɔ aəgɔ nɔ̂, lə amarä nɔ̂, lə aəgɔ nɔ̂ də aama aəgɔ nɔ̂. Əndje kâ gâ ətshi mbata ngerə nə ndje ətshi Aya Ndalimi nə, əndje yî aə̂mbî aə̈ngrʉ̈ aləba ə kô ayana ayɔ ngbima gâ lə kəna əndje. 10 Əndje sə̂ kə ta râwâ tə âgbɔ̂ ə pa:

«Äwä kə she azü lə kuzu

sə tə ərə nə̂ Ndjapä nə̂ əzə̂,

ə̂në tshə sə gâ tʉ gâ pâ mbata ngerə nə kɔ,

ndje tə ərə nə̂ Aya Ndalimi nə!»

11 Bale, atrawaya nə̂ Ndjapä nə nɔ̂ kâ dji mbata ngerə nə, dji aâgbɔ̂ azü nə də asorô nə vəna nə kɔ. Əndje tê gâ tʉ ə zâ kumu əndje su ashɔ gâ ətshi mbata ngerə nə ə vrɔ̂ Ndjapä nə 12 ə pa:

«Asərəmə!

Kə tɔlɔ ətshe, kə mbe ətshe, kə wusə̂ ərə,

kə za mərshe, kə lʉ ətshe,

əpʉ ngerə də awlra

sə̈ mbrə Ndjapä nə̂ əzə̂ də ə̂ngû də ə̂ngû piii! Asərəmə!»

13 Bale, ə̈bə̈ âgbɔ̂ əzü nə bale yû əmə ə pa: «Əndje ə̂në əndje yî aə̂mbî aə̈ngrʉ̈ aləba nə kɔ, aəde kə sə̂? Əndje tô mâta â nâ kɔ?» 14 Mə pâ kə ətshə ə pa: «Âgbɔ̂ əzü nə̂ əmə, əbə kə wusə̂ nə.» Â tshə pâ kə əmə ə pa: «Əndje ə̂në azü mbrə̂ ərə əyo tə̂ əndje tə bandanə kɔ kə sə̂. Əndje yûtu aə̈ngrʉ̈ aləba nə̂ əndje nə lə ə̈ndjï Aya Ndalimi nə gâ ye â aləba nə dô tə̂ əndje tə ə̂mbî nə gâ ye.

15 Âdârə ə̂në əndje sə ətshi mbata ngerə nə̂ Ndjapä nə kɔ kə sə̂.

Əndje sə kə vrɔ ətshə, sɔ də tsheləbu sɔ də alɔ lə Anda nə̂ ye.

Ətshə nə ə̂në tshə sə gâ tʉ gâ pâ mbata ngerə nə kɔ,

tshə sə kə bata əndje tshekudu ye.

16 Əgo sə sə kə mi əndje kwatəndje ne, əgo ə̂ngû sə sə kə mi əndje kwatəndje ne;

alɔ sə sə kə tɔ əndje kwatəndje ne wala ə̈bə̈ kə wo ətshe ə wo wo tə̂ əndje kwatəndje ne.

17 Mbrə ə̂në Aya Ndalimi nə ə̂në tshə sə ə̂grû tə̂ mbata ngerə nə kɔ

ə bata əndje də rəgo je

ə na də əndje gâ tə̂ kumu ə̂ngû sorô je,

â Ndjapä ə tru ngɔla nɔ̂ lə ala əndje je.»