Yîsə̂ Aərə 8

Aya Ndalimi nə djɔ̂ mindû amanə bishi tapɔ nə

1 Alɔ ə̂në Aya Ndalimi nə djɔ̂ ama mindû amanə bishi tapɔ nə, ətshe sə̂ kʉ kokoko mâ lafɔ je ʉrrr mata lə tshegrû ə̈nü alɔ bale. 2 Mə wû atrawaya nə̂ Ndjapä nə mindû amanə bishi nə ə̂në əndje ka alɔnɔ̂ gâ ətshi Ndjapä nə kɔ, â əndje kô aängɔ̈ mindû amanə bishi kə əndje.

3 Ə̈bə̈ ata trawaya nə̂ Ndjapä nə nâ ə kâ gâ ətshî gblaka nə, ə zâ ə̈bə̈ gbarə kə sho yombo lə nə ə̂në əndje mbrə̂ də lɔrə kɔ gâ lə kəna ye. Əndje kô yombo nə kə ətshə ngbatshe ndə kə pa tshə ngbo də aəpʉ kə yu Ndjapä nə̂ azü nə̂ Ndjapä nɔ̂ ə to də əkrɔ kə Ndjapä nə pa gblaka lɔrə nə, ətshi mbata ngerə nə. 4 Ngâwo yombo nə ngbô də aəpʉ kə yu Ndjapä nə̂ azü nə̂ Ndjapä nə ə âfɔ lə kəna trawaya nə̂ Ndjapä nə ə dâ o na ye gâ ətshi Ndjapä nə. 5 Mandânə, trawaya nə̂ Ndjapä nə zâ gbarə kə sho yombo nə lə nə kɔ ə kô əwo tshepa gblaka nə gâ lə nə trɔ̂ ə zâ wli gâ pâ ashɔ. Bale, yavrɨ vɔ̂tə̂ kə sɔ nə, atshema vɔ̂tə̂ kə kɨ nə, yavrɨ nə srô â ashɔ vɔ̂tə̂ kə meme nə.

Aangbʉlî aängɔ̈ vəna kɨ̂

6 Bale, atrawaya nə̂ Ndjapä nə mindû amanə bishi ə̂në əndje kô aängɔ̈ nə mindû amanə bishi nə gâ lə kəna əndje nə kɔ, əndje gâmba tə̂ əndje ndə kə pa əndje u aängɔ̈ nə.

7 Angbʉlî trawaya nə̂ Ndjapä nə û ängɔ̈ nə. Vɔdjɔndjɔ də əwo ə ngbô də ə̈ndjï gâ tə̂ nə ə yɔ̂ gâ tʉ gâ pâ ashɔ. Ə̈bə̈ mbage tshepashɔ bale lə vəta nə, ə̂në əndje â kru tshelə nə vəta kɔ, əwo jû nɔ̂ gâ ye, â mbage aayɔ ndje rə jû nɔ̂ gâ ye â təyu güsü nɔ̂ ndje jû gâ ye.

8 Bishi trawaya nə̂ Ndjapä nə û ängɔ̈ nə. Marä tə̂ ə̈bə̈ ərə mata ə̈bə̈ âgbɔ̂ kaga ə̂në əwo sə kə ju nə kɔ, ə âfɔ ə tê gâ lə ə̂ngû əngbrʉ. Ə̈bə̈ mbage ə̂ngû əngbrʉ nə bale lə vəta nə, ə̂në əndje â kru tshelə nə vəta kɔ, dô tə̂ ye tə ə̈ndjï, 9 mbage aagia ndje rə, ə̂në əndje sə lə ə̂ngû əngbrʉ nə kɔ, ə̂në əndje sə də əwu sorô kɔ, əndje tshû gâ ye, â mbage abato ndje rə, tshelə nə ngɔ̂ gâ ye.

10 Vəta trawaya nə̂ Ndjapä nə û ängɔ̈ nə. Ə̈bə̈ əgerə ambrepe âfɔ mâ lafɔ ə tê gâ tʉ, ə sə̂ kə ju ərə mata ə̈bə̈ âgbɔ̂ əwo. Ə tê gâ pâ mbage aə̂ngû də akumungû bale lə vəta nə, ə̂në əndje â kru tshelə nə vəta kɔ. 11 Əɨrɨ ambrepe səkɔ kə də̂ «Əshu ayɔ». Â mbage aə̂ngû sə̂ bale kɔ dô tə̂ əndje tə əshu ə̂ngû â azü ngbatshe tshû mbrə aə̂ngû nə ə̂në ə dô tə̂ əndje tə əshu nə kɔ.

12 Vəna trawaya nə̂ Ndjapä nə û ängɔ̈ nə. Ə̈bə̈ mbage alɔ bale lə vəta nə, ə̂në əndje â kru tshelə nə vəta kɔ, də mbage yipʉ bale lə vəta nə, ə̂në əndje â kru tshelə nə vəta kɔ, gâ ndə mbage aambrepe bale lə vəta nə, ə̂në əndje â kru tshelə əndje vəta kɔ də̂ əndje da tshelə nə, ndə kə pa mbage nə səkɔ dô tə̂ ye tə əbu nə, ndə kə pa ə̈bə̈ mbage ə̈kü alɔ bale lə vəta nə, ə̂në əndje â kru tshelə nə vəta kɔ, ə̂yî nə ro gâ ye â tsheləbu ndje kʉ rə.

13 Mə sə̂ kə lishi â mə djî ə̈bə̈ dɔkpalia ə̂në tshə sə̂ kə rɨ mâ ngâ lafɔ kɔ, tshə pâ tə âgbɔ̂ ə pa: «Ərə əyo! Ərə əyo! Ərə əyo gâ pâ azü tshepashɔ, mbrə ə̂dû əkɨ aängɔ̈ nə ə̂në atrawaya nə̂ Ndjapä nə vəta ə u je kɔ!»