1 «Tä ngrowô kə trawaya nə̂ Ndjapä nə̂ Laglizə mâ Sarədə:

«Əpʉ ə̂në ətshə ə̂në tshə sə də ayirə̂ nə̂ Ndjapä mindû amanə bishi də aambrepe mindû amanə bishi kɔ ə pa kɔ kə səke: mə wusə̂ aərə ə̂në bə mbrə kɔ; mə wusə̂ nə ngâ ə pa azü sə kə tra əbə ə pa bə sə tə sorô, bale bə tshû gâ ye. 2 Sə̈ də ə̈kü ala zə, ə gbɔ̈gbɔ ə̂dû aərə ə̂në ə sə ndə zə â ə sə kə tshu nə ə tshu kɔ, mbrə ə̂në mə wû aərə ə̂në bə mbrə kɔ, ə lï lï nɔ̂ ətshi Ndjapä nə̂ əmə ne. 3 Rəkɔ, lï tshelə zə gâ pâ əpʉ ə̂në əndje yîsə̂ nə kə əbə, ə̂në bə djî gâ ye kɔ. Bäta äwä nə ə tshï äwä angbrɔ kə mbrə tə̂ zə tʉ gbrä. Kədə ala zə kə sə sə tə ə̈kü nə ne, mə sə kə yi kumu əmə mata əyïangba â bə sə sə kə wusə̂ alɔ kə yi kumu əmə nə bale ne. 4 Bale, bə sə də alabə̈ azü bale bale, lə Sarədə, ə̂në əndje tshê tshê aləba nə̂ əndje ne; a də əndje ə na ana də aə̂mbî aləba je, mbrə ə̂në əndje lï də nə. 5 Rəkɔ, əzü ə̂në tshə sɔ lagbanga, tshə yi aə̂mbî aləba je. Mə sə sə kə gba tshelə əɨrɨ ye lə fraka sorô alɔ bale ne, mə sə kə yerɔ ətshə kpro də əɨrɨ ye ətshi Abä əmə də ətshi atrawaya nə̂ ye.

6 «Əzü ə̂në tshə sə də ətu, tshə djï əpʉ ə̂në Yîrə̂ ə pa kə Alaglizə kɔ!»

7 «Tä ngrowô kə trawaya nə̂ Ndjapä nə̂ Laglizə mâ Filadeləfi:

Ətshə ə̂në tshə sə kpî kɔ,

ətshə ə̂në tshə pa djatra əpʉ kɔ,

ətshə ə̂në tshə sə də krele nə̂ Davidə lə kəna ye kɔ,

ə̂në tshə krɔ äwä ərə, əzü bale sə sə kə tshu gâ tə̂ nə ne kɔ,

ə̂në tshə tshu äwä ərə gâ tə̂ nə, əzü bale sə sə kə krɔ nə ne kɔ.*

Əpʉ ə̂në tshə pa kɔ kə səke:

8 «Mə wusə̂ aərə ə̂në bə sə kə mbrə nə kɔ. Mə zâ ə̈bə̈ tshelə manda tʉ huu ətshi zə, ə̂në ə̈bə̈ əzü bale lï lï ndə kə pa tshə tshu gâ tə̂ nə ne. Mə wusə̂ nə ə pa bə sə də awlra kʉ teashe, â bə bâta əpʉ ama əmə â wə̂ra tə̂ zə wə̂ra tə̂ əmə ne. 9 E djï-a, ərə ə̂në mə sə kə mbrə ga tə̂ azü tshelə aangbɔ nə̂ Sataa kɔ kə səke. Əndje pa alane sə tə Ajuwufu, bale əndje sə sə tə Ajuwufu ne, əndje pa kʉtə̂ əpʉ əterə. Mə sə kə mbrə ndə kə pa əndje na ə gbəte gâ tshekudu zə. Əndje sə kə wusə̂ nə kpro ə pa əmə, mə yîndə zə gâ ye. 10 Mbrə ə̂në bə bâta əpʉ ama əmə â ru ə ru kɔ, əmə də ə̂tə̂ əmə, mə sə kə bata əbə tə̂ alɔ ərə əyo ə̂në ə na gâ pâ ashɔ nɔ̂ ndə kə pa ə tra azü tshepashɔ nə kɔ je. 11 Mə sə kə na katshä katshä səye. Tëgbɔ ərə ə̂në bə sə də nə kɔ nge nge nge, kanika ə̈bə̈ əzü bale za za âkrâ nə̂ zə tə̂ zə ne. 12 Əzü ə̂në tshə sɔ lagbanga, mə sə kə mbrə ətshə tə ə̈bə̈ yêrɔ̂ kowɔ anda lə Anda Ndjapä nə̂ əmə â tshə sə sə kə wutu lə nə alɔ bale ne. Mə sə kə ta əɨrɨ Ndjapä nə̂ əmə də əɨrɨ gala nə̂ Ndjapä nə̂ əmə, tafa Jeruzalamə nə, gâ pâ ye, gala nə ə̂në ə to mâ lafɔ, mâ ndə Ndjapä nə̂ əmə nə â ə jerə kɔ. Mə sə kə ta ndje tafa əɨrɨ əmə gâ pâ ye.

13 «Əzü ə̂në tshə sə də ətu, tshə djï əpʉ ə̂në Yîrə̂ ə pa kə Alaglizə kɔ!»

14 «Tä ngrowô kə trawaya nə̂ Ndjapä nə̂ Laglizə mâ Lawodise:

«Əpʉ ə̂në ətshə ə̂në tshə sə tə Asərəmə, tə awopandəma əpʉ də äwänə də awopa djatra əpʉ, tə âdâ aərə nɔ̂ ə̂në Ndjapä mbrə̂ gâ ye kɔ, pa kɔ kə səke: 15 Mə wusə̂ aərə ə̂në bə sə kə mbrə nə kɔ. Mə wusə̂ nə ngâ ə pa bə sə sə tə əzɨ ka ə sə tə əwo ne. Kədə bə sə̂ kəmə tə əzɨ wala tə əwo! 16 Bale, ə̂në bə wo kʉ mboo â sə sə tə əwo wala tə əzɨ ne kɔ, mə sə kə ndja əbə lə ama gashu. 17 Bə sə kə pa nə ə pa: "Mə sə tə əyïrishi, mə sɔ̂tə̂ aərə ngbatshe gâ ye, mə ma ma əgo ə̈bə̈ ərə bale ne." Kandää, bə wusə̂ nə wu ə pa əbə, bə sə lə əyo, tə əzü ə̂në əyo zə sə kə mbrə azü ə mbrə, tə əyïəyo, tə əyïbula ə sə kpɔnderɔ kɔ ne. 18 Mə sə kə mʉ əpʉ kə əbə ndə kə pa bə yɔ lɔrə ə̂në ə wûtu lə əwo ə sə grugru kɔ lə kəna əmə, kanika bə do tə̂ zə tə əyïrishi nə; yɔ̈ ndje aə̂mbî aləba lə kəna əmə kanika ləba sə tə̂ zə ka azü nɔ̂ wusə̂ gana kpɔnderɔ zə wu ne, ə yɔ̈ ndje ayɔ ala ndə kə pa bə pʉ gâ lə ala zə, kanika ə lishi. 19 Agbɔbəngâ əmə nɔ̂, əmə, mə sə kə nga kə əndje ə sə kə yisə̂ ə̂rɔ̂ äwä kə əndje. Rəkɔ, zä əgo kə mbrə ərə gâ tə̂ lɔsu zə ə tshï äwä angbrɔ kə mbrə tə̂ zə tʉ gbrä! 20 Wü-a, mə ka gâ lə manda ə sə kə nge nə. Kədə ə̈bə̈ əzü kə dji tshema əmə â krɔ manda nə, mə sə kə li gâ ndə ye ə zɨ rəgo də ətshə â tshə sə kə zɨ rəgo də əmə ndje. 21 Əzü ə̂në tshə sɔ lagbanga, mə sə kə za äwä kə ətshə ndə kə pa ä də ətshə sə gâ tʉ gâ pâ mbata ngerə nə̂ əmə, mata ə̂në əmə, mə sɔ̂ lagbanga â ä də Abä sə gâ tʉ gâ pâ mbata ngerə nə̂ ye kɔ.

22 «Əzü ə̂në tshə sə də ətu, tshə djï əpʉ ə̂në Yîrə̂ ə pa kə Alaglizə kɔ!»