Sinais do fim dos tempos

14 Dara zuuttambaase asik zaala sinanak Ha’oosi taatoni misirachchuni kaamaas daa zuuttambaase asiista maktona. Es kabaasiktu koi’baas yoona.

Kiristoosni Hepsa Wolle Yoo

29 «Es shanani wonaasikito aatnanneen orfo geregere awaas talmona; assaas dey chaarefbaason kalana; baakuraasikito dey samastan kere woottona; samaastaki hugnaasikito shorkona. 30 Estan Asuni Naani beso samaasta bestona. Es kabaasik han daasta fe daraas zuuttere waassone. Asuni Naa dey akama hugnaknawa akama ulfinakna shaaruusikitota yeefeen biyone. 31 Akama markatani kaama odsuni Ha’oosi wosiyaasikitonon wosuna. Baasso dey samaasi diltan hamma dilbaasta kar’a fa acheech fashaassi hamere barik kortere feese baassotin zuutusone» yi.

42 Ese nitto Daamiis aro sa’atita yoonamato aane aruweti sinna boor’a guzira oodti. 43 Sinuntano isa wuza arutiwa; keeni abaas waalaasi aaffa sa’atiista wiis yoonamato ari sinfaanane guzire keebaas dey yiishtonoynamato kalana kabawa. 44 Esiisimato Asuni Naa dey nitto arunoyti sa’atiista yoonir sinna boor’a hoorera oodtiwa.»

20 Ta nittok ajajena baron zuutire oodosonek assuti. Ta han daasi ko’a kar’ananneen wonna wonna nittoneen anetu fawungwa» yi.

Daamiis Wolle Yoona Wonaas Aane Artefa

32 «Sinuntano es wonaasi chowanon wedey es sa’atiisi chowanon Abaasteno samaki Ha’oosi wosiyaas wedey Naas aane arife.

Koi’ni Wonaas

1 Koi’ni wono rakkisuni wona yoonamato aruwa. 2 Asuni meya teetbesiison keeshter, Waagni danak joorer, ge’eser, beganter, me’eser, aba intoosik ajajamonor, galatbesi foonto, kortobesi foonto, 3 Keeshtanbesi foonto, feeshun usonor, asuni suna mangsiser, teetbesiison ha’sunor, keena budu, ma’ar sina wuzason oomteser, 4 Mormeser, teetbesi oodnor, beegantok tuumme feeser, Ha’ooson shunaastan ashbesiison girsu shunar sinone. 5 Ha’ooson shiiphediferne feer sinnetu bestesefe; sinuntano Ha’oosi shiiphoni hugnanon mormesefe. Es effetena asuni meyaastan wokwa.

17 « ‹Ha’oos koi’ni wonaasikitosi;

Ayyananaason asu zuuttambaase asiista kessunawa;

arqaasnawa mashka naanggotnitiise raaji maksone;

na’oni meya dey raa’i biyone;

kur’uni meya dey miito miitosone.

18 Esiisimato dey es wonaasikitosi;

arqa wostinynyataasatanawa;

mashka wostinynyanaastana;

Ayyananaason kessunawa;

baasso dey Raaji maksone.

19 Den samak diinqi wuzasikitonon;

han daastak dey biistera artonoy wuza besunawa;

hanna, geya, geeni ki’na dey bestona.

20 Akama dey diinqi sina Daamiisa wona yoonoyfeen;

zeemma Awaas talmona;

assaas dey hannane faar sinana.

21 Daamiisa sunanon teegefe bar zuuttere fui’tona› yiwa.

15 Daamiiskin ephphataani kaamaasimato nittok makefeniis esiisongwa. Daamiis yoona kabaneen hayew sinne fooni inno kiti baassotin aafawa zeemaniwuza. 16 Ajajini kaamak; Ha’oosi wosini gaanynyani kaamak; dey Ha’oni markata odtona; Daamiis dey teetbaasik es baassok geeptere saman kerona. Kiristoosnin amanere kiti baasso zeemme kabsone. 17 Esseen orfo kaak fe inno Daamiisneen ane sirusta uphok baassoneen ane shaaruusta den oottoni, koi’ba foontonon dey Daamiisneen ane fooni. 18 Es bari boor’a han kaamaasik nittotna nittotna wol chimoti.

6 Es bari boor’a guzuniwa, Teetniison ha’suk innok fayiis hoorona uuk foonistano oom asuni meenimato afay’toni wuza aafawa. 7 Afay’tesefe baasso waalintu afay’tesefe. Zayesefe baasso dey waalintu zayesefe. 8 Sinuntano inno chaarefaassi fe asu sinni boor’a teetniison ha’suk innok fayiis hoorona uuk fooni; amantoosonnawa keeshtanaasonna Xirurinimato zagira mayani; faruni abdiison teetaastaki bittani guftaasimato zagira guufoni. 9 Ha’oos innotin teegenaas bari gi’aasik tishunik sinnoynaron Daamni Yesus Kiristoosniki kamo inno faru dananikwa.

Chimme Ooda

34 Tusire dey Yesus ekka yi: «Nibnitiis ushak, zayyak, han daastaki fooson safarok hopunoynamato arutiwa. Es baron shakaatine es wonaas dey diinqo eshminimatotu nittotin ephanawa. 35 Es wonaas han daasta fe asu zuuttambaase asin ephana. 36 Es bari boor’a yooni mangu wuzaassin aatatiknawa Asuni Naani sina dey yerok chimatikna wonna wonna chimma shiiphotiwa.»

8 Inno meyane! Daamiiskik isa wonaas isa kuma wogga; isa kuma woggaas dey isa wona sinnamato es baron daagotiitawa. 9 Isa isa asuni meyak yoo woknirne feer sinnetu bestefe; sinuntano Daamiis abdini kaambaason zaguk aafa wokana wuza. Oonu tishunoynamatonawa asu zuuttambaase harmusonek sholefaattu nitto boor’a fakire fewa.

10 Sinuntano Daamiisa wona diinqone wiisnimatotu yoona. Es wono han samaasikito akama kaamaktu tishusona. Testo zuuttambaase geyak kiichchera tishuna. Han daasewa barista faase wuzaasikitone zuuttera kiichchona. 11 Ese es wuzaasikito zuuttambaase esiisimato tishunir sinnanneen eekin nittok korto foosewa Ha’ooson shiiphet foone aakkak sholsu beynirinso? 12 Ese Ha’oosi wonni yoonon kaltanak oodet feernawa tai’nin dey yoonak wostet feerna sintiwa. Es wono samaas geyak kiichchera tishuna; testoos dey geyaasi kiichuk faalana. 13 Sinuntano inno bar imna abdiisik ooko foos kaputtona gaddo samaasewa gaddo daase asintu oodet faani.

51 Ese isa aacho wuza nittok makonawa; inno zuuttamniise aafawa kitun wuza; sinuntano zuuttamniise sooltoni. 52 Sooltoniis dey koi’ni tuturuus fugtefana kabaasik aafni walgaat yipgifeesne faaron isargakwa. Tuturuus fugtona; kiti asuni meya dey kitunor hayew sinne kitun kabsone; inno dey sooltoni.

Gaddo Samaasewa Gaddo Daase

1 Esseen orfo gaddo samaasewa gaddo daase asin biin; tesuni daasewa tesuni samaase aati; baariis dey hanneen ekalo aafa foona wuza. 2 Korto katamaas; gaddo Yerusalem teegobaasik ge’istera fa mariyanimato hoorera samaki Ha’ooskin kerefeen biin. 3 Dey ekka yifa tega kaama zigimooskin kesfeen oden: «Ese! Ha’oos foona dimaas asuni meeni ganesiwa; bar dey baassoneen ane foonir; baasso dey bari dara sinone; Ha’oos teetbaasik baassoneen ane foona; Ha’obesi dey sinana. 4 Harafaason zuutira aafbesiissin ku’ana; sinati sitiriis aatna boor’a kitu wedey suumo wedey waasa wedey shana hanneen ekalo aafa foona wuza.»