8 Mana kwa uluso we Imulungu mwemwe mkombolighwa kubitila ukutoghola. Mbuli hino ng’ailawa bae kuna mwemwe, ila nzawadi ye Imulungu. 9 Apfo imunu wowose yaleke kwighoda, kwaapfila ng’ailawa mne sang’ano tsenu bae.

4 Lekeni Imulungu kana libatsi ng’ani. Tsakatunoghela kwa unoghelo mkulu, 5 hata ka tsatukala ka tufa mnzambi, katutenda tuwe waghima hamwe na Kiristu. Kwa uluso we Imulungu mwemwe mkombolighwa.

23 kwaapfila chila imunu katenda nzambi na kuhungukighwa ne utunitso we Imulungu. 24 Lekeni kwa uluso wa hela we Imulungu, iwanu wose watsotendighwa wanogha hambele he Imulungu kubitila Yesu Kiristu iyowaghombola.

15 Lekeni ghweko lye Imulungu ng’alighala bae na totso lya Adamu. Mana hata ka iwanu wengi tsawafa kwa totso lya imunu yumwe, Imulungu katsakongetsa uluso wake na ghweko ilikwenela kwa iwanu wengi, kulawa kwa imunu yumwe, iyo Yesu Kiristu.

21 Ka nzambi pfaitawale mne lifwa, pfipfila uluso we Imulungu utsotawala kubitila ukunogha kwe Imulungu, na kughala ughima wa ghamatsuwa ghose kubitila Yesu Kiristu Imtwatsa wetu.

14 Nzambi ng’aitsowatawala keli bae, kwaapfila mwemwe ng’amlongosighwa na ghamalaghitso, ila mwolongosighwa na uluso.

15 Lelo tulonge choni? Angu tutende ghehile kwaapfila ng’atulongotsighwa na ghamalaghitso bae, ila twolongotsighwa na uluso? Si pfipfo bae!

9 iyatukombole na iyatukemile tuwe iwanu wake, si kwa ichinu chochose chatutendile, ila kwa pfila pfabamile yeye, na kwa uluso wake. Katutendela uluso kubitila Kiristu Yesu kulawa isi ng’ana ilumbighwe,

11 Mana uluso we Imulungu iughala ukombotsi kwe iwanu wose ughubulighwa. 12 Uluso awo wotulangulitsa kughaleka ghehile na dong’o tse iisi, tukale kwa kwilongotsa iwenyegho, tukale pfinoghile na kukala ka pfayobama Imulungu mne iisi ino ya sambi,

13 Apfo, mwiyandae ghendo na mkale meso, mwilongotse wenyegho. Mwike lolelo lyenu mne uluso wamtsakwing’ighwa hayatsoghubulighwa Yesu Kiristu.

10 Lekeni mng’amalitsa kudununzika kwa chipindi chidodo, Imulungu yane uluso wose, iyawakemile mwingile mne utunitso wake wa ghamatsuwa ghose mne ukwilunga na Kiristu, yeye imwenyegho katsomtendani muwe waghima keli, katsomwing’ani ingupfu, katsowatenda mwime ghoya na kumwing’eni ghumsingi ighunoghile.

8 IMNDEWA kana libatsi na uluso,

ng’osumka kona maya baye,

na kamema uluso wa lilaghano lyake.

6 Ona ghendo, uluso wako na libatsi lyako pfitsonikoleletsa,

mna ghamatsuwa ghose gha ugima wangu,

na nene nitsokala mna ing’anda ya IMNDEWA kwa matsuwa ghose.

17 Uluso wa IMNDEWA, Imlungu wetu uwe na twetwe,

na utsimitse ghoya tsisang’ano tsa ghamoko ghetu,

ona, tsisang’ano tsa ghamoko ghetu utsimitse ghoya.

1 Kulawa hasi ihaghendese,

nene nokulilila ghweghwe, ghwe MNDEWA.

2 Ghwe IMNDEWA, tegheletsa litsi lyangu,

uwambe ghamaghutwi ghako ghahulikitse,

ghahukitse chililo changu ichighela libatsi.

24 IMNDEWA yawamotetse na kuwalolesa,

25 IMNDEWA yawalole kwa uluso na yawatendele ighanoghile,

26 IMNDEWA yawalanguse wende wake na yawatende mkale tseghamba.

21 Uluso we Imtwatsa wetu Yesu ukale namwe mwose iwanu we Imulungu. Amina.

25 Uluso we Imtwatsa Yesu Kiristu ukale namwe mwose.

16 Lelo tuchighendele chighoda che undewa che Imulungu yane uluso bila kupfuka, tubokele libatsi na uluso mne chipindi cho ukutwapfila.

24 Lekeni siwona bae ughima wangu ka chinu chikulu, ila chanibama kumalitsa isang’ano yangaile Imtwatsa Yesu, isang’ano ye ukupeta Imbuli Inoghile ya uluso we Imulungu.

16 Kwaapfila Imulungu tsakaikunda isi yose mbaka kamlapfa Imwanaghe nyalimwe, ili chila munu iyomtoghola yaleke kwagha ila yawe na ugima wa ghamatsuwa ghose.

14 "Kwa apfila, mng’awaleghusila iwanu ghamatotso ghawo, na Aba wenu iyali kulanga pfipfila katsowaleghusilani mwemwe ghamatotso ghenu.

13 Imunu iyopfisa tsinzambi tsake ng’atsomota baye, lekeni ayula iyotsiungama na kutsileka, ayo katsobokela libatsi.

1 Mfalume Hezekia tsakatuma wanu waghende Isiraeli yose na Yuda, kuya kawandikila baluwa wanu wa Manase na wa Efuremu, kawakema watse kuna ing’anda ya IMNDEWA ako Yerusalemu kudeng’elela ichihungo cha Pasaka kwa IMNDEWA, Imulungu wa Isiraeli. 2 Mfalume na iwakulu na iwanu wose wa ghumji ghwa Yerusalemu tsawalamla kudeng’elela chihungo cha Pasaka mna ghumwetsi wa kabili. 3 Ng’awadahile baye kudeng’elela mna ghumwetsi ghwake ka pfawang’ali wotendagha kwaapfila iwatambika iwetendile wela tsawachidogho na iwanu tsang’ana wetingane baye ako Yerusalemu. 4 Apfo chinu achino tsachimnoghelesa mfalume na mtingano ghwose ghwa iwanu. 5 Apfo walamla kutowa lukemo mna isi yose ya Isiraeli, kulawa Beeri Sheba mbaka Dani, iwanu wobamighwa watse Yerusalemu kudeng’elela ichihungo cha Pasaka ya IMNDEWA, Imulungu wa Isiraeli. Ipasaka ikalile na wanu wengi ka awo tsang’ana ideng’elelighwe baye, ka apfila pfayandikighwe. 6 Kwa kulaghitsighwa na mfalume na iwakulu, iwanu iwatumighwe waghenda mna Isiraeli na Yuda yose aku waghala baluwa iyandikighwe apfino;

"Mwemwe wanu wa Isiraeli, imhonile kulawa mna ghamoko gha mfalume wa Ashuru, muye kwa IMNDEWA, Imulungu wa Abrahamu na Isaka na Isiraeli, naye katsakuya kuna mwemwe. 7 Mleke kuwa ka iwahenga wenu na ndughu tsenu, awala iwawile si wakutogholeka baye kwa IMNDEWA, Imulungu wa iwahenga wawo iyawahighile sideke ka pfamkona. 8 Lelo sambi mleke kuwa wasughu ka iwahenga wenu. Lekeni mwilapfe ghendo kwa IMNDEWA. Mtse kuna ing’anda yake iyaitendile ienzeluke matsuwa ghose, mumtumikile IMNDEWA, Imulungu wenu, nayo imaya yake ng’ulu itsakuka imlekeni. 9 Mng’amuyila IMNDEWA, iwanu awala iwawaghoghile ndughu tsenu na iwana wenu watsowonela libatsi na watsowalekelela woye mna isi aino. Kwaapfila IMNDEWA, Imulungu wenu kamluso na kana libatsi. Apfo mng’amuyila, yeye katsowabokela." 10 Apfo iwanu awo wanga kulawa mji ghumwe mbaka mji ghungi mna isi yose ya Efuraimu na Manase, kuya wapfika mbaka Zabuloni. Lekeni wanu wengi wawaseka na kuwabetsa. 11 Hata apfo wanu chidogho kulawa ghamakabila gha Asheri, Manase na Zabuloni watoghola kughenda Yerusalemu. 12 Ngupfu ya Imulungu ing’ali isang’ana mna isi ya Yuda ya kuweng’a ghumoyo ghumwe ghwa kutenda aghala mfalume na iwakulu wake ghawawalaghiste, ka apfila pfayalaghitse Imulungu.

13 Wanu wengi ng’ani wetingana ako Yerusalemu mna ghumwetsi ghwa kabili kudeng’elela chihungo cha ipfighate ipfilihela hamila. 14 Wabomola tsimatsabau ako Yerusalemu, tsimatsabahu tsa ukudusulila upfumba, kuya watsasa hana ulwanda lwa Kidironi. 15 Tsuwa lya kumi na nne lya ghumwetsi agho wachinja iwana wa ng’olo wa Pasaka. Watambika, na Walawi tsawona chinyala, kwa apfila tsang’awetendile wele baye, kuya wetenda wela na waghala nambiko tsa ukulakatsighwa mna ing’anda ya IMNDEWA. 16 Kuya watenda sang’ano tsawo mna ing’anda ya Imulungu ka pfawobamighwa na ghamalaghitso gha Musa munu wa Imulungu. Walawi tsawaweng’a iwatambika idamu ya nambiko, nawo iwatambika waimitsa mna imatsabahu. 17 Iwanu wengi iwetingane aho tsang’awelile baye, apfo Walawi wawachinjila wang’olo wa Pasaka iwanu awo, kuya wawalapfa wang’olo awo kwa IMNDEWA. 18 Iwanu wengi iwatsile kulawa Efraimu, Manase, Isakari na Zabuloni tsang’awelile baye, lekeni waja pfipfo ichihungo cha Pasaka, ing’apfibamighwa baye. Apfo Hezekia kawalombela, kalonga, "Imulungu yunoghile, mleghusile inzambi chila munu, 19 iyoghulapfa ghumoyo ghwake ghwose kukubama ghweghwe IMNDEWA, Imulungu wa iwahenga wake, hata ka ng’elile baye ka pfaghobama ghamalaghitso gha hanu haenzeluke." 20 IMNDEWA Imulungu katoghola chayalombile Hezekia, kawahonetsa iwanu. 21 Waisiraeli wose iwetingane Yerusalemu tsawadeng’elela ichihungo cha pfighate ipfilihela hamila kwa matsuwa saba, aku wodeng’elela sideke. Walawi na iwatambika wang’ali womwimbila Imulungu chila tsuwa kwa ngupfu tsawo tsose. 22 Mfalume Hezekia kawatoghola na kuwaghuma ghumoyo watambika kwaapfila tsawatenda kwa ukumanya ghoya sang’ano ya ukumtambikila IMNDEWA. Waja kwa matsuwa saba mna ichihungo acho, walapfa nambiko tsa ukukala tseghamba, na ukumtunya IMNDEWA, Imulungu wa iwahenga wawo.

23 Iwanu wose walamla kudeng’elela ichihungo acho kwa matsuwa saba ghangi, apfo waghendela kudeng’elela ichihungo acho kwa ghamatsuwa ghangi saba kwa ndeng’elo ng’ulu. 24 Mfalume Hezekia wa Yuda kaweng’a ghumtingano ghwa iwanu ng’ombe wamale elufu imwe, na mene na wang’olo elufu saba. Pipfipfila iwakulu walapfa ng’ombe wamale elufu imwe na ng’olo elufu kumi. Iwatambika wengi tsawetenda wenyegho wele. 25 Ghumtingano ghose ghwa iwanu wa Yuda ghudeng’elela ghendo, tsawadengelela hamwe na Watambika na Walawi, iwenyekaye wa Yerusalemu hamwe na iwagheni iwalawile kunze, iwang’ali wokala Yerusalemu, na iwanu wose iwakalile Yuda. 26 Kukala na ndeng’elelo ng’ulu ako Yerusalem, kwaapfila kulawa hayatawale Selemani mwana wa Daudi, mfalume wa Isiraeli chinu ka acho tsang’ana chilawile baye. 27 Kuya iwatambika na Walawi wawalombela iwanu tsibalaka kwa Imulungu, naye Imulungu kahulika, kwaapfila ghawalombile ghampfikila ako kulanga, hanu hake haenzeluke hayokala yeye.