8 Yufala i mas stap klosap long God, nao hem bambae i kam stap klosap long yufala. Yufala i man nogud, yufala i mas wasem han blong yufala. Yufala we i gat tu fes yufala i mas mekem tingting blong yufala i klin.

1,2 ✝Bakegen, profet i talemaot long ol man blong hem we Hae God i talem se,

"!Ol laen* blong Isrel*!

?From wanem yufala i stap lusum

ol mane blong yufala

long ol kakae ya

we yufala i no save harem gud long hem?

?Weswe yufala i stap lusum ol mane blong yufala,

we yufala i stap hadwok tumas from,

be yufala i stap hanggri yet?

!Yufala evriwan i kam lesin long mi,

yufala i mekem olsem we mi mi talem!

!Yufala evriwan we i tosta,

yufala i kam!

!I gat wota i stap!

!Yufala we i no gat mane,

yufala i kam!

!Yufala i kam tekem kakae,

yufala i kakae!

!Yufala i kam dring waen mo melek,

we i no blong pem, i fri nomo!

Sipos yufala i mekem olsem,

bambae yufala i harem gud,

olsem we yufala i kakae ol kakae

we i nambawan olgeta.

3 ✝"!Ol man blong mi!

!Yufala i kam long mi!

!Yufala i lesin long mi!

!Sipos yufala i kam long mi,

bambae yufala i gat laef!

Sipos yufala i kam,

bambae mi mi mekem wan promes* wetem yufala,

we bambae i save stap olwe,

mo bambae mi givim

ol gudgudfala samting long yufala,

olsem we mi mekem long King Deved bifo.

4 Mi mi putumap hem i kam king,

mo i kam lida mo komanda

blong ol man blong ol narafala kantri,

mo mi yusum hem blong soemaot long olgeta

we mi mi gat paoa.

5 Sipos yufala i kam long mi,

bambae yufala i save singaot

ol man blong ol narafala kantri,

we fastaem, oli no save yufala,

mo yufala tu i no save olgeta,

mo bambae olgeta oli resis

blong kam joen long yufala.

Mi nao bambae mi mekem

ol samting ya oli kamtru,

from we mi mi Hae God,

mi God blong yufala,

mo mi tabu we mi tabu,

fasin blong mi i stret olgeta.

Mo bambae mi mekem olsem

blong leftemap nem blong yufala,

blong mekem ol man oli ona long yufala."

6 Bakegen, profet i talem se,

"Naoia Hae God i stap klosap long yumi,

mo yufala i save faenem hem.

!Yufala i mas lukaot hem,

mo yufala i mas prea long hem!

24 Long taem ya, nating we oli no singaot long mi yet, be mi mi harem olgeta finis, mo nating we oli stap prea long mi yet, be mi mi mekem finis, olsem we oli talem.

3 ‘Jeremaea. Sipos yu singaot i kam long mi, bambae mi harem yu, mo bambae mi talemaot ol gudgudfala samting long yu, we ol man oli no save faenemaot, mo we yu yu no save olgeta nating.

11 Mi nomo mi save ol plan we mi mekem finis from yufala. Mi mi wantem we bambae yufala i stap gud olwe, trabol bambae i no kasem yufala, mo bambae yufala i stap gogo, yufala i kasem ol samting ya we tingting blong yufala i stap long hem.

1 God,

mi mi wantem tumas

blong yu yu kam long laef blong mi,

olsem wan anamol we i tosta tumas

i wantem dring long springwota.

2 God,

yu yu laef

we yu no save ded.

Mi mi wantem yu tumas,

olsem we mi tosta,

mi wantem tumas blong dring wota.

?Wetaem bambae mi save kam stanap

long fes blong yu,

blong mekem wosip long yu?

1 God.

Yu yu God blong mi.

Mi mi wantem tumas

blong yu yu stap oltaem

long laef blong mi.

Taem yu yu no stap,

mi mi harem we laef blong mi

i olsem graon we i no moa gat wota nating long hem,

i drae we i drae,

i no moa gud blong wan samting,

nao from samting ya,

mi mi wantem yu tumas.

2 Plis yu letem mi mi luk yu

long tabu ples blong yu.

Yu letem mi mi luk

bigfala paoa blong yu,

mo bigfala laet ya

we i soemaot we yu yu stap.

3 Oltaem yu yu lavem mi,

mo fasin ya, mi mi wantem moa,

i winim we mi wantem stap laef.

From samting ya,

bambae mi presem yu.

4 Bambae mi stap talem tangkiu long yu

oltaem long laef blong mi.

Bambae mi leftemap han blong mi,

mi mekem prea long yu.

5 Bambae mi kam fulap

long ol gudgudfala samting blong yu

olsem we mi harem gud long lafet.

Nao bambae mi sing

long ol singsing blong glad,

blong mi presem yu.

6 Oltaem, taem we mi ledaon long bed,

mi stap tingbaot yu.

I stat long sapa gogo kasem long moning

mi mi stap tingting long yu,

7 from we oltaem yu yu stap givhan long mi.

Mi mi stap faenem sefples long yu

olsem we pikinini blong faol i faenem sefples

aninit long wing blong mama blong hem,

nao mi mi glad,

mi stap singsing from.

8 Mi mi no save lego yu,

mo raethan blong yu i stap holem mi

mi stap gud.

9 Olgeta ya we oli stap traem blong kilim mi,

bambae oli godaon long Hom* blong ol Dedman.

10 Bambae ol man oli kilim olgeta long faet,

mo ol wael dog bambae oli kakae ol bodi blong olgeta.

11 God.

Mi mi king,

mo bambae mi glad tumas

from we yu bambae yu stap mekem mi mi win.

Olgeta we oli stap mekem promes long nem blong yu,

bambae oli presem yu,

be ol man blong giaman,

bambae yu satem maot blong olgeta.

22 Yu yu leftemap nem blong mi finis, mo mi mi tekem olgeta ya oli kam joen long hae nem blong mi, blong oli save stap wan nomo, olsem we yumitufala i wan nomo. 23 Laef blong mi i joen gud long laef blong olgeta, mo laef blong yu i joen gud long laef blong mi. Mo long sem fasin, mi mi prea blong olgeta oli save kam wan nomo long evri samting, blong ol man blong wol ya oli save luksave we yu yu sanem mi mi kam, mo we yu lavem olgeta ya, stret olsem we yu lavem mi.

17 Hae God i God blong yufala,

mo hem i stap wetem yufala.

Paoa blong hem

i stap mekem yufala i win.

Hem bambae i glad long yufala.

Fasin blong hem

we oltaem hem i stap lavem man,

bambae i mekem yufala i gat niufala laef.*

Hem bambae i glad tumas long yufala

we bambae i stap singsing from.

9 Be sipos yumi talemaot ol sin blong yumi long God, yumi save bilif long hem, from we fasin blong hem i stret oltaem. Hem bambae i fogivim yumi from ol sin blong yumi, mo i tekemaot ol fasin blong yumi we i no stret, i mekem yumi klin.