1-3 Long namba seven yia we yumi stap wok slef* long ples ya, long namba faef manis,* long namba ten dei blong hem, sam lida blong ol laen* blong Isrel* oli kam sidaon long fes blong mi blong faenemaot tingting blong Hae God we i Masta* blong yumi. Nao Hae God i talem long mi se, "Man blong wol ya. Yu talem long ol man ya se, ‘Tok blong mi i olsem. ?Yufala i kam blong faenemaot tingting blong mi? Mi mi Hae God, mi Masta blong yufala, mo mi laef, mi stap we mi stap. Mo mi mi talem stret long yufala, se long nem blong mi, bambae mi no save letem yufala i askem wan samting nating long mi. Hemia nao tok blong mi.’

4 "?Olsem wanem? ?Yu yu rere blong talemaot panis blong olgeta ya? Sipos i olsem, yu gohed yu mekem. Yu tok long olgeta blong mekem olgeta oli tingbaot ol samting we ol bubu blong olgeta bifo oli mekem we oli nogud we i nogud. 5 ✝Yu talem long olgeta we mi mi talem se, ‘Ol laen blong Isrel. Taem mi jusumaot ol olfala blong yufala bifo, mi mekem wan strong promes* long olgeta. Taem oli stap long Ijip, mi soemaot paoa blong mi long olgeta, mo mi talem long olgeta we mi mi Hae God, mi God blong olgeta. 6 Long taem ya, mi mi promes blong tekemaot olgeta i gowe long ples ya, blong lidim olgeta oli kam long wan kantri we mi jusumaot finis blong oli kam stap long hem. Kantri ya i gud we i gud, i winim ol narafala kantri long wol. Graon blong hem i gud tumas, oltaem i stap karem fulap kakae. 7 Mi mi Hae God, be ol aedol ya blong ol man Ijip oli giaman god, mo oli nogud we i nogud long fes blong mi. Be ol bubu ya blong yufala oli laekem olgeta tumas, mo oltaem oli stap mekem wosip long olgeta. Mi talem long olgeta blong oli sakemaot ol aedol ya, blong oli no moa mekem olgeta oli doti long fes blong mi. 8 Be oli agens long mi, oli no wantem lesin long mi. Oli no sakemaot ol aedol ya. Mo long kantri ya, mi mi rere blong letem olgeta oli haremsave fulpaoa blong kros blong mi. 9 Be mi mi no mekem olsem, from we sipos mi mekem olsem, ol narafala man we ol bubu blong yufala oli stap long medel blong olgeta, taem oli harem, bambae oli no save ona long nem blong mi. Be long fes blong olgeta, mi mi talemaot long ol bubu ya blong yufala, se bambae mi tekemaot olgeta oli gowe long Ijip.

10 "Ale, mi tekemaot olgeta long Ijip, mi lidim olgeta i go long draeples. 11 ✝Nao mi givim tok blong mi long olgeta, mo mi tijim olgeta long ol loa blong mi, mo sipos man i obei long olgeta, hem i save stap gud. 12 ✝Nao mi givim ol dei blong spel long ol man ya, blong oli holem blong soemaot we mi mi mekem promes wetem olgeta, mo blong mekem olgeta oli save we mi Hae God, mi mekem olgeta oli tabu. 13 Be long draeples ya tu, oli girap, oli stap agens long mi. Oli brekem ol loa ya blong mi, mo oli tanem baksaed long ol tok ya blong mi. Mo ol dei ya we mi mi makemaot blong oli spel long hem, oli spolemgud olgeta, oli mekem oli no moa tabu. Nao long draeples ya, mi mi rere blong letem olgeta oli haremsave fulpaoa blong kros blong mi, blong mi spolemgud olgeta. 14 Be mi mi no mekem olsem, from we sipos mi mekem olsem, ol narafala man we oli stap luk we mi tekemaot olgeta ya long Ijip i kam, taem oli harem, bambae oli no save ona long nem blong mi. 15 ✝Nao mi mekem wan promes long olgeta long draeples, se bambae mi no save tekem olgeta i kam long kantri ya we mi mi givim long olgeta. Kantri ya i gud we i gud, i winim ol narafala kantri long wol. Graon blong hem i gud tumas, oltaem i stap karem fulap kakae. 16 Be mi mi mekem promes ya from we oli tanem baksaed long ol tok blong mi, mo oli brekem ol loa blong mi, mo oli mekem ol dei ya oli no moa tabu. Oli wantem blong mekem wosip long ol aedol blong olgeta nomo.

17 "Be mi sore tumas long olgeta, nao mi no kilim olgeta evriwan i ded long draeples. 18 Nao mi talem long ol yangfala blong olgeta se, ‘Mi mi Hae God we mi God blong yufala. Yufala i no mas holem ol rul ya we ol olfala blong yufala bifo oli folem. Yufala i no mas folem ol kastom blong olgeta, mo yufala i no mas mekem wosip long ol aedol ya blong olgeta, from we sipos yufala i mekem olsem bambae yufala i kam doti long fes blong mi. 19 Yufala i mas obei long ol loa ya blong mi, mo yufala i mas ona long ol tok ya blong mi. 20 Yufala i mas mekem ol dei ya oli tabu, blong soemaot we mi mi mekem promes wetem yufala, mo blong yufala i save we mi mi Hae God, mi God blong yufala.’

21 "Be ol yangfala ya tu oli girap oli stap agens long mi. Oli brekem ol loa ya blong mi, mo oli no holemgud ol tok ya blong mi. Mo ol dei ya, oli mekem olgeta oli no moa tabu. Nao long draeples ya, mi mi rere blong letem olgeta oli haremsave fulpaoa blong kros blong mi, blong mi kilim olgeta evriwan i ded. 22 Be mi mi no mekem olsem, from we sipos mi mekem olsem, ol narafala man we oli stap luk we mi tekemaot ol bubu ya blong yufala long Ijip i kam, taem oli harem, bambae oli no save ona long nem blong mi. 23 ✝Nao mi mekem wan promes bakegen long olgeta long draeples, se bambae mi ronemaot olgeta oli go stap olbaot long evri ples long wol. 24 Promes ya, mi mi mekem from we oli no holem ol tok ya blong mi, mo oli tanem baksaed long ol loa ya blong mi, mo oli mekem ol dei ya oli no moa tabu. Oli wantem nomo blong mekem wosip long ol aedol blong ol olfala blong olgeta bifo.

25 Nao mi givim ol narafala loa long olgeta we oli nogud, mo mi givim ol narafala tok long olgeta we i no save givhan long olgeta blong oli stap gud. 26 Mo mi letem olgeta oli mekem ol sakrefaes we i mekem olgeta oli kam doti long fes blong mi. Mi mi letem olgeta oli kilim ol fasbon pikinini boe blong olgeta, blong oli mekem sakrefaes long olgeta i go long ol aedol ya. Hemia i blong panisim olgeta, mo blong soemaot long olgeta we mi mi Hae God.

27,28 "Naoia yu mas talem long ol laen blong Isrel we mi mi talem se, ‘Mi mi Hae God, mi Masta blong yufala, mo taem mi tekem ol olfala blong yufala bifo oli kam stap long kantri ya we mi bin promes blong givim long olgeta, oli spolem mi bakegen, oli tanem baksaed long mi, oli lego mi. Taem oli luk ol hil we oli hae, mo ol bigbigfala tri we oli no save lusum lif blong olgeta, oli girap, oli go mekem sakrefaes long ol ples ya. Ol ples ya oli ples blong mekem wosip long aedol, mo oli mekem mi mi kros from ol sakrefaes ya blong olgeta we oli bonem blong mekem wosip long ol aedol ya, mo waen ya we oli givim i go long olgeta. 29 Nao mi askem long olgeta se, ‘?Wanem ol hae ples ya we yufala i stap go long hem?’ Nao i stat long taem ya i kam kasem tede, oli stap talem nem blong ol ples ya se, ‘Ol Hae Ples*’. 30 Naoia mi wantem blong yu talemaot long olgeta ol samting we mi bambae mi talem. Mi talem se, ‘?From wanem yufala i mekem sem sin ya we ol olfala blong yufala bifo oli bin mekem? ?From wanem yufala i stap go biaen long ol aedol ya blong olgeta? 31 Taem yufala i stap givim ol presen long olgeta, mo yufala i stap kilim ol pikinini boe blong yufala blong mekem sakrefaes long olgeta, yufala i stap mekem yufala i doti long fes blong mi, kam kasem tede. Yufala i stap mekem ol samting ya, be yufala i stap kam long mi yet blong faenemaot tingting blong mi. Mi mi Hae God, mi Masta blong yufala, mo mi laef, mi stap we mi stap. Mo naoia mi talem stret long yufala, se long nem blong mi, bambae mi no save letem yufala i askem wan samting nating long mi. 32 Yufala i mekem tingting blong yufala i strong finis blong yufala i kam olsem ol man blong ol narafala kantri. Yufala i wantem mekem wosip long ol tri mo ol ston olsem we olgeta ya oli stap mekem, be samting ya bambae i no save kamtru."

33 Nao Hae God i talem se, "Mi mi Hae God, mi Masta* blong yufala, mo mi laef, mi stap we mi stap. Mi mi kros we mi kros long yufala, mo mi talem stret long yufala, se long nem blong mi, bambae mi rulum yufala, mi meksave yufala long fulpaoa blong mi. 34 Sipos mi tekemaot yufala long olgeta kantri ya we mi mi ronem yufala i go stap long olgeta, mo mi tekem yufala i kam wanples, bambae mi soemaot long yufala we mi mi gat paoa mo we mi kros tumas long yufala. 35 Bambae mi tekem yufala i kam stap long Draeples ya we i blong Olgeta Man*, mo long ples ya nao, bambae mi jajem yufala stret long fes blong yufala. 36 Mo bambae mi jajem yufala, olsem we mi jajem ol olfala blong yufala bifo long draeples ya Sinae. Mi mi Hae God, mi Masta blong yufala, mo hemia tok blong mi.

37 "Nao biaen long ol samting ya, bambae mi holemtaet yufala, blong mekem yufala i obei long promes* ya we mi mekem wetem yufala. 38 Bambae mi tekemaot ol man ya we oli stap long medel blong yufala we oli man blong girap agens long mi, mo oli man blong mekem sin. Bambae mi tekemaot olgeta long ol kantri ya we oli stap long hem naoia, be bambae mi no letem olgeta oli gobak long kantri ya Isrel* bakegen. Nao bambae yufala i savegud we mi mi Hae God.

39 "Mi mi talem long yufala, se sipos yufala i no wantem lesin long mi, i gud yufala i gohed, yufala i mekem wosip long ol aedol ya blong yufala. Be mi mi talem stret long yufala, se biaen long ol samting ya, bambae mi mekem yufala i obei long mi. Bambae yufala i mas livim fasin ya we yufala i stap givim presen i go long ol aedol ya blong yufala, from we fasin ya i stap spolem tabu nem blong mi. 40,41 Fastaem mi mi ronem yufala i go stap long ol narafala kantri. Be bambae mi tekemaot yufala long ol kantri ya, mi tekem yufala i kambak, yufala i stap wanples bakegen. Nao long kantri ya blong yufala, bambae yufala ol laen* blong Isrel evriwan i save mekem wosip long mi long tabu hil* ya blong mi we i hae we i hae. Mo bambae mi glad long yufala, mo mi luk long yufala, blong yufala i mekem ol sakrefaes long mi, mo blong yufala i karem ol gudgudfala samting i kam long mi, wetem ol presen ya we oli tabu we yufala i stap givim i kam long mi. Nao bambae mi glad long yufala, olsem we mi glad long gudfala insens* we yufala i stap bonem i kam long mi. Mo bambae olgeta man long olgeta ples oli save luk we mi mi tabu. 42 Taem mi tekem yufala i kambak long kantri ya we mi bin promes blong givim long ol olfala blong yufala bifo, bambae yufala i savegud we mi mi Hae God. 43 Nao long taem ya, bambae yufala i tingbaot olgeta samting ya we yufala i bin mekem we oli blong sem nomo, mo ol fasin ya we yufala i mekem, we i mekem yufala i doti long fes blong mi. Mo bambae yufala i ting rabis long yufala bakegen from ol samting nogud ya we yufala i bin mekem. 44 Yufala i stap mekem ol rabis fasin, mo ol samting we oli nogud tumas, mo i stret blong mi spolem yufala from ol fasin ya. Be bambae mi no save mekem olsem. Bambae mi mekem i gud long yufala blong leftemap hae nem blong mi. Nao long taem ya, bambae yufala i savegud we mi mi Hae God, mi Masta blong yufala, mo hemia tok blong mi."

45 Hae God i Masta* blong yumi, mo hem i talem long mi se, 46 "Man blong wol ya. Yu lukluk i go long saot. Yu tok agens long bigfala bus ya long saot, yu talemaot tok blong mi, 47 blong hem i harem. Mi mi talem se, ‘!Yu luk! Mi mi rere blong putum faea long yu, mo faea ya bambae i bonem yu we bambae i flatemgud ol tri blong yu. Ol tri we i laef wetem ol tri we oli drae finis, faea ya bambae i flatemgud olgeta evriwan, mo i no gat man we bambae i save kilim faea ya. Bambae i bonem bigfala bus ya, i stat long narasaed long saot i kam kasem narasaed long not, mo olgeta man bambae oli harem nogud long hot blong faea ya. 48 Mo olgeta man evriwan bambae oli luksave we mi mi laetem faea ya, mo i no gat man bambae i save kilim."

49 Nao mi talem se, "Hae God. Yu yu Masta blong mi. Mi mi harem se mi no save talemaot tok ya. Oltaem ol man oli stap tokbaot mi se, ‘!Man ya i man blong talem parabol nomo!’ "