1 Nao Hae God i toktok long mi bakegen long vison ya, 2 i talem se, "Man blong wol ya. Ol samting we mi bambae mi talem long yu, mi wantem blong yu yu talemaot long king blong taon ya Taea. Mi talem se, ‘King blong Taea. Mi mi Hae God, mi Masta* blong olgeta man, be yu yu praod we yu praod tumas. Yu stap talem se, "Mi mi wan god, mi stap sidaon long jea blong mi, mo solwota i stap raon long mi." Be nating we yu ting se yu yu waes olsem wan god, be yu yu no wan god, yu man blong wol ya nomo. 3 ?Yu yu ting se yu waes moa yu winim Daniel* long 14.14.? ?Yu ting se yu save olgeta samting we i haed? 4 Long waes ya blong yu mo long save blong yu, yu stap kasem plante gudgudfala samting, mo yu gat silva mo gol we yu stap hivimap long haos blong yu. 5 Yu yu waes blong mekem bisnes wetem ol narafala man, mo waes ya i mekem yu yu gohed yu win gud. Mo ol gudgudfala samting ya we i mekem yu yu rijman, i mekem yu yu praod tumas.

6 " ‘From we yu yu ting se yu yu waes gud olsem wan god, 7 bambae mi tekem ol enemi we oli no gat sore long man oli kam mekem faet long yu. Bambae oli spolemgud ol gudgudfala samting ya we yu yu wokem long waes blong yu mo long save blong yu. 8 Bambae oli kilim yu yu ded long ples blong yu we i stap long medel solwota, nao oli sakem yu yu godaon long Hom* blong ol Dedman. 9 ?Sipos yu stanap long fes blong ol man blong kilim yu, bambae yu stap talem yet se, ‘Mi mi wan god’? Taem yu stap long han blong olgeta, bambae yu no save talem tok ya nating. Yu yu man blong wol ya nomo. 10 Ol man blong narafala kantri we oli no save mi nating, bambae oli kilim yu yu ded olsem wan dog nomo.* bambae oli kilim yu yu ded. Mi mi Hae God, mi Masta blong yu, mo hemia tok blong mi."

11 Nao long vison ya Hae God i toktok long mi bakegen, 12 i talem se, "Man blong wol ya. Yu krae long king blong Taea, mo yu mekem wan sing blong krae long hem. Yu talem long hem we mi mi talem se, ‘King blong Taea. Mi mi Hae God, mi Masta* blong olgeta man, mo bifo yu yu wan eksampol blong laef we i stret gud olgeta. Yu yu wan man we yu waes gud, mo yu naes we yu naes olgeta. 13 Yu yu stap long Iden, we i gudfala ples blong mi, nao yu stap flasem yu long ol flas ston. Ol ston ya, rubi* mo daeman* mo topas,* mo malakaet* mo kanilian* mo jaspa,* mo safaea* mo emeral* mo ganet,* yu yu flasem yu long olgeta evriwan. Mo yu stap joenem ol ston ya bakegen long gol blong flasem yu moa. Long dei ya we mi mi mekem yu, mi mekem ol samting ya tu oli blong yu. 14 Long taem ya, mi putum wan enjel i stap gad long yu, we olgeta man oli fraet gud long hem.* Yu yu stap long tabu hil* ya blong mi, yu stap wokbaot long medel blong ol ston ya we oli saen we i saen, olsem we faea i stap kamaot long olgeta.* 15 I stat long taem we mi mi mekem yu, fasin blong yu i stret gud, be biaen, yu stat blong mekem ol rabis fasin. 16 Yu yu stap bisi tumas blong mekem bisnes wetem ol narafala man, mo fasin ya i mekem yu yu stap faet, mo yu stap mekem sin. From samting ya, mi ronemaot yu yu gowe long tabu hil ya blong mi. Nao enjel ya we i stap gad long yu i ronemaot yu yu gowe long medel blong ol flas ston ya.* ronemaot yu yu gowe long medel blong ol flas ston ya. 17 Yu yu stap flas tumas from we yu naes we yu naes, mo hae nem blong yu i mekem yu yu folem fasin blong man we i no gat hed. Nao from samting ya, mi sakem yu yu godaon long graon, mi livim yu yu stap, blong ol narafala king oli save luk yu, nao samting ya i save wonem olgeta. 18 Taem yu stap mekem bisnes wetem ol narafala kantri, yu stap mekem ol fasin we i no stret nating, nao fasin ya i mekem ol ples ya blong yu blong mekem wosip oli no moa tabu long fes blong mi. From samting ya, mi mi laetem faea long taon blong yu, nao faea ya i bonemdaon we i bon evriwan. Olgeta we oli stap lukluk yu, oli luk we faea i bonem taon blong yu gogo i kam asis nomo. 19 Yu yu finis nao, yu yu lus olgeta, mo olgeta man long olgeta ples we oli save yu, oli fraet we i fraet tumas, se bambae oli kasem sem trabol ya we yu yu kasem.’ "

20 ✝Nao Hae God i toktok long mi long wan vison, 21 i talem se, "Man blong wol ya. Yu lukluk i go long taon ya Saedon, yu tok agens long hem. 22 Yu talem long hem we mi mi talem se, ‘!Saedon! !Mi mi enemi blong yu! Mi mi Hae God, mi Masta* blong olgeta man, mo bambae olgeta man oli presem nem blong mi from ol samting we bambae mi mekem long yu. Taem mi mi panisim ol man blong yu, bambae mi soemaot we mi mi tabu, nao bambae ol man ya oli savegud we mi mi Hae God. 23 Bambae mi sanem rabis sik i kam long yu, mo bambae mi mekem we blad i fulap long ol rod blong yu. Bambae ol enemi blong yu oli kam hivap raon long yu, oli mekem faet long yu, mo bambae oli kilim plante man oli ded. Nao bambae ol man blong yu oli savegud we mi mi Hae God.’ "

24 Mo Hae God i talem bakegen se, "Olgeta kantri klosap long Isrel we ol man blong olgeta oli stap ting rabis long hem, mo oli stap spolem hem, bambae i no gat wan long olgeta i save kam olsem ropnil blong stikim hem bakegen. Nao ol kantri ya bambae oli savegud we mi mi Hae God, mi Masta* blong olgeta."

25 Mo hem i talem se, "Ol laen* blong Isrel* ya we mi ronemaot olgeta oli go stap long ol narafala kantri, bambae mi tekem olgeta oli kambak, nao bambae ol narafala kantri ya oli savegud we mi mi tabu. Bambae mi tekem olgeta oli kam stap long graon ya blong olgeta we mi bin givim long Jekob* ya bifo, we i man blong wok blong mi, 26 mo bambae oli save stap gud long hem. Long ples ya, bambae oli save wokem ol haos blong olgeta bakegen, mo oli save wokem ol plantesen blong grep* blong olgeta tu. Be ol narafala kantri ya we oli stap klosap long hem we oli stap ting rabis long hem, bambae mi panisim olgeta, nao ol laen blong Isrel ya bambae oli save stap gud, oli sef. Nao bambae oli savegud we mi mi Hae God, mi Masta blong olgeta."