1 ✝Nao Hae God i talem long mi se, "Man blong wol ya. Yu kakae buk ya, nao bambae yu go talemaot tok blong mi long ol laen blong Isrel* ya."

2 Nao mi openem maot blong mi, mo hem i givim buk ya long mi blong mi kakae. 3 Hem i talem se, "Yu kakae buk ya we mi givim long yu naoia, yu fulap gud long hem." Nao mi kakae buk ya, mo mi harem i swit we i swit olsem hani.*

4 Nao Hae God i talem long mi se, "Olgeta samting we mi talem long yu, yu yu mas go talemaot long ol laen blong Isrel. 5 Bambae mi no save sanem yu yu go long ol man blong narafala kantri we lanwis blong olgeta i strong tumas long yu, bambae mi sanem yu yu go long ol laen blong Isrel nomo. 6 Sipos mi sanem yu yu go long ol kantri we oli gat plante man, mo ol lanwis blong olgeta oli strong tumas we yu yu no save nating, bambae olgeta oli save lesin long yu. 7 Be ol laen blong Isrel bambae oli no glad nating blong lesin long yu, from we oli no wantem nating blong lesin long mi. Olgeta evriwan oli stronghed, mo oli no save lesin nating. 8 Be naoia bambae mi mekem yu yu strong moa blong oli no save winim yu. 9 Yu no fraet long ol stronghed ya. Yu no ting se yu no save winim olgeta. Bambae mi mekem yu yu strong we yu strong moa winim olgeta."

10 Nao Hae God i gohed i talem long mi se, "Yu lesin gud long mi. Olgeta samting ya we bambae mi talem long yu, yu mas holemgud long tingting blong yu. 11 Naoia yu yu stap long Babilonia, mo ol man ples blong yu oli stap wok slef* wetem yu long ples ya. Bambae yu girap, yu go talemaot ol samting ya long olgeta we mi bambae mi talem, nating we oli lesin long yu no oli no lesin."

12 Nao Spirit* long 2.2. blong Hae God i leftemap mi mi go antap, mo mi harem wan man i tok long baksaed blong mi, we voes blong hem i olsem noes blong bigfala etkwek. Hem i talem se, "Hae God i hae we i hae, mo hem i stap long heven. Yumi presem nem blong hem." 13 Nao mi harem ol fo samting ya oli stap mekem noes long ol wing blong olgeta, mo mi harem noes blong ol wil blong olgeta tu i bigwan olsem noes blong etkwek. 14 Nao Spirit blong Hae God i leftemap mi i karem mi mi go, mo mi harem nogud, mi kros we mi kros. Be Spirit blong hem i kam long mi we i strong we i strong.

15 Nao mi kamtru bakegen long Kebara Reva, long taon ya Telabib we ol laen blong Isrel oli stap wok slef long hem. Mi stap wetem olgeta long ples ya seven dei, from we mi stap harem nogud tumas long ol samting ya we mi mi luk.

16 Nao biaen long seven dei ya, Hae God i talem long mi se, 17 "Man blong wol ya. Mi mi mekem yu yu kam wan wajman blong lukaot long ol laen* blong Isrel.* Bambae yu tekem strong tok ya blong mi we mi talem long yu, yu go talem long olgeta blong wonem olgeta. 18 Sipos mi talemaot se wan man nogud bambae i ded, be yu yu no go tok long hem, blong hem i jenisim fasin blong hem blong i sevem laef blong hem, man ya bambae i ded from ol sin ya blong hem, be ded blong hem bambae i fol blong yu. 19 Be sipos yu tok long wan man nogud, blong hem i stretem laef blong hem, be hem i no lego ol rabis fasin blong hem, hem bambae i ded from ol sin ya blong hem, be yu yu sevem laef blong yu.

20 "Mo bakegen, sipos wan stret man i stat blong mekem ol rabis fasin, nao mi mekem hem i stap long poen we bambae hem i ded from, mo yu no go toktok long hem blong hem i tanem tingting blong hem, bambae hem i ded from ol sin ya blong hem. Man ya, bambae mi no moa save tingbaot ol gudgudfala samting we hem i bin wokem, mo ded blong hem bambae i fol blong yu. 21 Be sipos yu tok long wan stret man, blong hem i no mekem samting nogud, mo hem i harem tok blong yu, bambae hem i stap laef, mo yu tu bambae yu sevem laef blong yu."

22 Nao taem mi stap long ples ya, mi harem we paoa blong Hae God i kam long mi, mo hem i talem long mi se, "Yu girap, yu go long bigfala levelples ya, nao bambae mi toktok long yu long ples ya."

23 Nao mi girap, mi go long bigfala levelples ya, mo mi luk wan bigfala laet i saen we i saen. Laet ya i olsem bigfala laet ya we mi luk long saed blong Kebara Reva, mo i soemaot we Hae God i stap long ples ya, mo mi foldaon we fes blong mi i kasem graon. 24 Hae God i Masta* blong yumi, mo Spirit blong hem i kam long mi i mekem mi mi stanap. Hem i talem long mi se, "Man blong wol ya. Yu gobak long haos blong yu, yu go insaed, yu satem doa, yu stap insaed. 25 Bambae ol man oli fasem yu long rop, mo yu no save go wokbaot long fes blong olgeta. 26 Mi bambae mi mekem tang blong yu i fas, nao bambae yu no save toktok blong wonem ol man ya we oli girap oli stap agens long mi. 27 Be sipos mi toktok long yu bakegen, bambae mi mekem yu yu save toktok bakegen, nao bambae yu save go talemaot ol samting ya we mi stap talem. Sam long olgeta bambae oli lesin long yu, be sam long olgeta bambae oli no save lesin, from we olgeta ya oli man blong girap agens long mi."