1 Nao Hae God i talem long mi se, 2 ✝"Man blong wol ya. Yu yu stap long ples ya long Babilonia, long medel blong ol man ya we oli girap oli stap agens long mi. Oli gat ae, be oli no save luk wan samting, mo oli gat sora, be oli no save harem wan samting, from we olgeta oli stap agensem mi.

3 "From samting ya, yu mas fulumap rere wan basket blong yu olsem man we i go wok slef* long narafala kantri, nao yu karem, yu stat wokbaot i go we i no tudak yet. Bambae yu mekem we olgeta man oli stap lukluk yu olsem we yu aot blong go long narafala ples. Maet olgeta ya oli save luksave we oli man blong agensem mi. 4,5 Taem i delaet yet, yu mekemrere basket blong yu we bambae olgeta oli save luk yu. Taem oli stap lukluk yu, yu brekem wan hol long wol* blong haos blong yu, nao long sapa yu karem basket blong yu, yu gotru long hol ya, yu aot yu go olsem we yu stap ronwe blong go long narafala kantri. Yu mas mekem we olgeta oli save lukluk yu. 6 Nao taem i stap kam tudak, yu tekem basket blong yu long fes blong olgeta, mo yu kavremap fes blong yu blong yu no save lukluk ples, nao yu wokbaot i go. Nao samting ya we yu mekem bambae i wan saen blong wekemap ol laen* blong Isrel.*"

7 Nao mi mekem olsem we Hae God i talem long mi. Long dei ya, mi fulumap rere basket blong mi olsem man we i go wok slef long narafala kantri. Mo long sapa, taem i stat blong kam tudak, mi brekem wan hol long wol blong haos blong mi long han blong mi nomo, nao mi pastru long hem, mi go afsaed. Mo taem olgeta ya oli stap lukluk mi, mi girap, mi karem basket blong mi, nao mi stap wokbaot i go.

8 Nao long nekis dei, long moning, Hae God we i Masta* blong yumi i talem long mi se, 9 "Man blong wol ya. Naoia ol laen blong Isrel ya we oli stap agens long mi oli stap askem long yu se, ‘?Yu stap mekem wanem ya?’ 10 Oraet, bambae yu go talem long olgeta, se samting ya we yu yu mekem, hem i blong man ya we i stap rul naoia long Jerusalem* we i wan pikinini blong king* wetem ol laen blong Isrel we oli stap yet long taon ya. 11 Yu talem long olgeta, se samting ya we yu mekem, hem i wan saen blong samting we bambae i hapen long olgeta ya longwe. Bambae oli gowe long ples blong olgeta, oli go wok slef long narafala kantri. 12 Long wan naet, man ya we i stap rul long olgeta bambae i karem basket blong hem, i ronwe, i pastru long hol we bambae oli brekem long stonwol blong taon ya, mo i kavremap fes blong hem blong i no save lukluk ples, nao i wokbaot i go. 13 ✝Be bambae mi putum trap blong mi, mi kasem hem. Nao bambae mi tekem hem i kam long taon ya Babilon, be bambae i no save luksave* taon ya, mo bambae hem i stap long ples ya gogo i ded. 14 Mo bambae mi ronemaot ol haeman blong hem mo ol advaesa blong hem wetem ol gad blong hem oli go olbaot long evri ples, mo bambae ol man oli go lukaot olgeta blong kilim olgeta oli ded.

15 "Taem mi ronemaot olgeta oli go stap wetem ol man long ol narafala kantri, bambae oli savegud we mi mi Hae God. 16 Be bambae long taem blong faet, mo long taem we oli sot long kakae, mo long taem we rabis sik i stap spolem ol man, bambae mi letem sam long olgeta oli stap laef, be bambae oli no plante. Nao long ol narafala kantri ya, bambae oli save luksave we fasin blong olgeta i nogud we i nogud, mo bambae oli savegud we mi mi Hae God."

17 Hae God i Masta* blong yumi, mo hem i talem long mi se, 18 "Man blong wol ya. Taem yu kakae mo yu dring, be yu mas mekem olsem we yu fraet, mo yu mas seksek we yu seksek. 19 Nao yu talem long olgeta laen* blong Isrel* evriwan, se saen ya we yu yu mekem i blong ol man Jerusalem* wetem olgeta we oli stap yet olbaot long kantri blong yufala. I gat taem i stap kam we sipos olgeta oli kakae mo oli dring, be bambae oli fraet, oli seksek we oli seksek. Bambae ol enemi oli tektekemaot olgeta samting long graon blong olgeta, from we olgeta ya oli stap brekem ol loa blong mi. 20 Ol taon we naoia oli fulap long ol man, bambae ol enemi oli spolem olgeta we oli flatemgud olgeta, mo bambae kantri ya blong yufala i stap nating nomo. Nao bambae yufala i savegud we mi mi Hae God."

21 Hae God i Masta* blong yumi, mo hem i talem long mi se, 22 "Man blong wol ya. Naoia ol laen* blong Isrel* ya oli stap talem tok ya oltaem se, ‘Taem i stap go, be ol samting ya we ol profet oli stap talem, oli no kamtru nating.’ 23 Be yu yu mas talemaot tingting blong mi long tok ya blong olgeta. Bambae mi mekem we tok ya i finis. Bambae oli no moa save taltalem tok ya bakegen long olgeta. Yu talem long olgeta we mi mi talem se, ‘Taem blong ol samting ya we ol profet oli stap talem, hem i stap kamtru nao.’

24 "Long ol laen blong Isrel, bambae i no moa gat man i save luk ol rabis vison, mo bambae i no moa gat man i save talem ol giaman toktok, se mi mi talem tok ya long hem. 25 Mi bambae mi tok long olgeta, mo wanem samting we mi talem i mas kamtru, i no moa gat wan samting i save blokem. Yufala ya we i stap girap agens long mi, long taem ya we yufala i stap laef yet, bambae mi mi mekem ol samting we mi talem long yufala oli kamtru. Mi mi Hae God, mi Masta blong yufala, mo hemia tok blong mi."

26 Nao bakegen, hem i talem se, 27 "Olgeta ya oli stap ting se ol vison* we mi stap soemaot long yu, mo ol samting we yu stap talemaot se bambae oli kamtru, oli no save kamtru naoia, bambae i longtaem yet blong oli kamtru. 28 From samting ya, yu mas talemaot long olgeta we mi mi talem se bambae i no moa gat wan samting i save blokem tok blong mi. Ol samting we mi mi talem se bambae oli kamtru, oli mas kamtru. Mi mi Hae God, mi Masta blong yufala mo hemia tok blong mi."