1 Nao Hae God i toktok long mi long wan vison, 2 i talem se, "Man blong wol ya. ?Yu ting se rop ya grep* i gud moa i winim wud? ?Yu ting se han blong rop ya i gud moa i winim ol naranarafala wud long bus? 3 Yu no save yusum blong wokem wan samting long hem. Rop ya i no strong. Yu no save wokem huk long hem blong hangem wan samting long hem. 4 ?Sipos faea i kakae tufala en blong hem, mo medel blong hem nomo i stap we faea i mekem i blak finis, yu ting se yu save yusum blong wokem wan gudfala samting long hem? Hem i gud blong bonem nomo. 5 Nating we faea i no bonem yet, be i nogud blong wokem wan samting long hem. Mo taem we faea i bonem finis, i moa nogud olgeta."

6 Hae God i Masta* blong yumi mo hem i talem se, "Olsem we yufala i stap tekem ol rop blong grep long bus blong mekem faeawud long hem, long sem fasin bambae mi tekem ol man ya we oli stap long Jerusalem,* 7 nao bambae mi panisim olgeta. Oli bin ronwe finis long wan faea, be naoia bambae faea i bonem olgeta evriwan i ded. Mo sipos mi panisim olgeta, bambae yufala i savegud we mi mi Hae God. 8 Tingting blong olgeta i no moa stap strong long mi, oli tanem baksaed long mi, mo from samting ya, bambae mi mekem kantri blong olgeta i stap nating nomo. Mi mi Hae God, mi Masta blong yufala, mo hemia tok blong mi."