1 Hae God i Masta* blong yumi, mo hem i toktok long mi bakegen long wan vison, 2 i talem se, "Man blong wol ya. ?Yu yu rere blong jajem taon ya Jerusalem* we i fulap long ol man blong kilim man? Ol samting ya we ol man ya oli stap mekem, oli nogud we i nogud long fes blong mi, mo yu yu mas soemaot ol samting ya long olgeta. 3 Yu mas talem long ol man blong taon ya we mi mi talem se, ‘Yufala i kilim plante man i ded, mo yufala i mekem yufala i doti long fes blong mi, from we yufala i stap mekem wosip long ol aedol we yufala i wokem. 4 From ol samting ya, yufala i kam nogud olgeta long fes blong mi, mo naoia taem blong yufala i kam klosap, dei blong yufala blong kasem panis i kamtru finis. From samting ya nao, mi letem ol man blong ol narafala kantri oli stap jikim yufala, mo oli stap laf nogud long yufala. 5 Ol kantri klosap long yufala mo ol kantri longwe, oli stap jikim yufala, from we yufala i stap brekem ol loa blong mi, yufala i no folem nating. 6 Ol lida blong yufala oli stap yusum paoa blong olgeta blong kilim man i ded. 7 ✝I no gat man nating long taon ya we i stap ona long papa mo mama blong hem. Yufala i stap giagiaman long ol man blong ol narafala kantri blong stil long olgeta, mo yufala i stap stil long ol widowoman, mo long ol pikinini we papa blong olgeta i ded. 8 ✝Yufala i no save ona long ol samting we oli tabu, oli blong mi, mo yufala i no save holem ol dei we mi mi makemaot blong yufala i spel long hem. 9 Sam long yufala oli stap tokbaot ol narafala man, oli stap talem ol giaman toktok, blong bambae oli save kilim olgeta oli ded. Mo sam oli stap kakae mit we oli yusum blong mekem sakrefaes long ol aedol. Mo sam oli wantem woman tumas, nao oli stap mekem sin oltaem. 10 ✝Mo sam oli stap slip wetem ol mama blong olgeta, mo sam oli stap fosem ol woman we oli gat sik blong woman, blong oli go slip wetem olgeta. 11 Mo sam oli stap stilim ol woman blong ol narafala man, mo sam oli stap switim ol woman blong ol pikinini blong olgeta, mo ol sista blong olgeta, nao oli stap giagiaman long olgeta blong slip wetem olgeta. 12 ✝Mo sam long yufala oli stap kilim man i ded blong winim mane. Mo sam oli stap winim intres* long ol lon we oli givim long ol narafala laen* blong Isrel,* nao oli kam rijman from we oli stil long olgeta. Olgeta ya oli fogetem mi finis. Mi mi Hae God, mi Masta blong yufala, mo hemia tok blong mi.

13 "Bambae mi agensem yufala, mi panisim yufala, from we mi kros we mi kros long fasin nogud ya blong yufala, we yufala i stap stil long ol man, mo yufala i stap kilim ol man oli ded. 14 Bambae mi mi panisim yufala, mo long taem ya, bambae yufala i no gat paoa blong faet agens long mi. Mi mi talem stret long yufala, se mi bambae mi panisim yufala olsem we mi mi talem. 15 Bambae mi ronemaot yufala i go stap wanwan olbaot wetem ol man long ol narafala kantri. Mo bambae mi waepemaot ol fasin nogud blong yufala evriwan. 16 Nao bambae ol man long ol narafala kantri oli no save ona long yufala, mo bambae yufala i savegud we mi mi Hae God."

17 Mo long vison ya, Hae God we i Masta* blong yumi, hem i toktok long mi bakegen, 18-20 i talem se, "Man blong wol ya. Ol laen* blong Isrel* ya oli nogud nating long fes blong mi. Sipos man i wantem gudfala silva, hem i mas tekem ston we i gat silva mo kopa mo aean mo led mo tin i stap insaed long hem, nao i mas bonem long faea blong mekem ol narafala samting ya oli ronaot, nao gudfala silva nomo i stap. Mo ol man ya oli olsem ol samting ya nomo, mo mi no save yusum olgeta blong mekem wan samting. Mi mi kros tumas long olgeta, mo bambae mi tekem olgeta evriwan i kam wanples long Jerusalem,* nao kros ya blong mi bambae i kasem olgeta we bambae i bonem olgeta, oli ronaot olsem we faea i bonem ston i mekem ol samting ya i ronaot. 21 Yes, mi mi kros we mi kros tumas long olgeta, mo bambae mi tekem olgeta evriwan i kam wanples long Jerusalem, mi meksave olgeta. Kros ya blong mi bambae i olsem faea we i hot we i hot, nao i bonem olgeta i mekem olgeta oli ronaot. 22 Bambae mi bonem olgeta long Jerusalem olsem we faea i bonem silva, nao bambae oli haremsave paoa blong kros blong mi."

23 Mo long vison ya, Hae God we i Masta* blong yumi, hem i toktok long mi bakegen, 24 i talem se, "Man blong wol ya. Yu talem long ol laen* blong Isrel,* se kantri blong olgeta i no moa klin nating long fes blong mi, i fulap long ol rabis fasin nomo, nao from samting ya, mi mi kros, mo bambae mi panisim olgeta. 25 Ol pikinini blong king blong olgeta oli olsem ol laeon, we taem oli stap kakae mit blong anamol we oli kilim, oli stap singsingaot. Oli stap kilim ol man, mo oli tekem ol mane blong olgeta wetem ol narafala samting blong olgeta tu. Nao from we oli kilim plante man oli ded, oli mekem plante woman oli stap we oli wido. 26 ✝Ol pris* blong olgeta oli brekem loa blong mi, mo oli no ona nating long ol samting we oli tabu we oli blong mi. Ol samting we i tabu mo ol samting we i no tabu oli miksimap nomo, oli no seraot olgeta. Oli no tijim ol man blong oli luksave ol samting we oli klin, mo ol samting we oli no klin. Mo oli no holem ol dei ya we mi makemaot olgeta blong oli spel long hem. Nao from samting ya, olgeta oli no ona long mi nating. 27 Ol haeman blong olgeta oli olsem ol wael dog we oli kilim anamol i ded, nao oli stap brebrekem blong kakae. Oli stap kilim man i ded blong oli kam rijman. 28 Ol profet blong olgeta oli stap haedem ol sin ya olsem we man i waetwas long wol blong haos blong blokem doti. Oli stap luk ol rabis vison mo oli stap talemaot ol giaman toktok, se ol samting we oli talem bambae oli kamtru. Oli stap talem se oli talemaot tok blong mi, be mi mi no toktok long olgeta. 29 Ol rijman oli stap giagiaman long ol man, blong oli stil long olgeta. Oli stap mekem i strong tumas long ol puaman mo olgeta we oli no gat paoa, mo oli stap stil long ol man blong ol narafala kantri we oli stap wetem olgeta. 30 Taem mi mi kros tumas, mo mi rere blong spolemgud kantri ya, mi traem lukaot wan long olgeta we i save wokem stonwol. Mi wantem blong hem i save stanap long ples we stonwol i brobrok long hem, blong blokem kantri ya, blong mi no spolem, be mi no save faenem wan man nating. 31 Nao from samting ya, mi mi kros tumas long olgeta, nao kros ya blong mi bambae i olsem faea we i bonem olgeta, i spolemgud olgeta from ol samting ya we oli stap mekem. Mi mi Hae God, mi Masta blong yufala, mo hemia tok blong mi."