1 ✝Nao Hae God i toktok long mi long wan vison bakegen, 2 i talem se, "Man blong wol ya. Yu lukluk i go long kantri ya Edom, long bigfala hil ya Seiri, yu tok agens long kantri ya. 3 Mi mi Hae God, mi Masta* blong olgeta man, mo yu mas talem long olgeta we mi mi talem se,

‘!Ol man blong ol hil blong Edom!

!Mi mi enemi blong yufala!

Bambae mi mekem ples blong yufala

i kam nogud olgeta,

we bambae i no moa gat

wan gudfala samting i stap long hem.

4 Bambae mi mekem

ol taon blong yufala oli kam nogud,

mo kantri blong yufala tu

bambae i kam nogud

we bambae i no moa gat

wan gudfala samting i stap long hem.

Nao bambae yufala i savegud

we mi mi Hae God.

5 "Yufala i stap enemi long ol laen* blong Isrel,* i stat bifo olgeta, i kam kasem tede. Mo long taem ya we oli kasem bigfala trabol we i las panis from sin blong olgeta, yufala i letem ol enemi oli kam kilim olgeta oli ded long faet. 6 Mi mi Hae God, mi Masta blong yufala, mo mi laef, mi stap we mi stap. Mo naoia, mi mi promes* long nem blong mi, se yufala i mas ded from fasin ya blong yufala. Yufala i no save ronwe long hem. Yufala i gat sin from we yufala i kilim man i ded, mo ol enemi bambae oli kilim yufala tu i ded. 7 Kantri blong yufala i ples blong hil, mo bambae mi mekem i kam wan rabis ples, mo olgeta man we oli pas long ples ya, bambae mi kilim olgeta evriwan i ded. 8 Olbaot long ol hil, mo long ol levelples long medel blong ol hil, mo long ol krik, mi bambae mi kavremap ol ples ya long ol dedbodi blong ol man we ol enemi oli kilim olgeta long faet. 9 Bambae mi mekem kantri ya blong yufala i stap nogud olsem, gogo i no save finis, mo bambae i no gat man i save stap long ol taon ya blong yufala bakegen. Nao bambae yufala i savegud we mi mi Hae God.

10 " ‘Nating we mi mi stap lukaot long tufala kantri ya Juda* mo Isrel, be yufala i no tingbaot mi, yufala i talem se, ‘Ol man blong tufala kantri ya oli blong yumi, mo graon blong olgeta bambae yumi holem i blong yumi, nao bambae yumi go stap long hem.’ 11 Yufala i no laekem ol man blong mi nating, yufala i stap kros, mo yufala i stap jalus long olgeta. Mo from samting ya, mi mi promes long nem blong mi, se bambae mi givimbak ol fasin ya long yufala, stret long mak blong ol fasin ya blong yufala. Nao bambae ol man ya blong mi oli savegud we mi mi panisim yufala from ol samting we yufala i mekem long olgeta. 12 Bifo, yufala i stap tok nogud long ol bigbigfala hil blong Isrel, yufala i stap laf long olgeta, mo yufala i talem se, ‘Ol hil ya oli kam nogud finis. Yumi go tekem olgeta yumi holem i blong yumi.’ Be taem mi panisim yufala, bambae yufala i save se mi mi stap harem ol tok ya blong yufala. 13 Taem yufala i stap bigmaot tumas, mo yufala i stap tok nogud agens long mi, be mi mi stap harem yufala.

14,15 " ‘Bifo, taem ol enemi oli flatemgud kantri ya blong mi, oli mekem i kam nogud we i no moa gat wan gudfala samting i stap long hem, be yufala i harem gud, yufala i glad tumas. Mo long sem fasin, taem mi mekem kantri blong yufala i foldaon i kam nogud olgeta, we bambae i no moa gat wan gudfala samting i stap long hem, bambae olgeta ples long wol oli harem gud, oli glad. Bigfala hil ya Seiri, wetem ol narafala ples long Edom bambae oli kam nogud olgeta, nao bambae olgeta man oli savegud we mi mi Hae God.’ "