1 Nao long namba naen yia blong yumi we yumi stap wok slef* long Babilonia, long namba ten manis,* long namba ten dei blong hem, Hae God we i Masta* blong yumi i toktok long mi long wan vison bakegen, 2 ✝i talem se, "Man blong wol ya. Yu makemdaon namba blong dei ya tede, from we tede, king blong Babilonia wetem ol soldia blong hem oli kasem Jerusalem,* oli stap hivap raon long hem blong mekem faet long hem. 3 Mo mi wantem blong yu go talem wan parabol long ol man ya we oli stap girap agens long mi. Mi mi talem se,

‘Yufala i go putum wan sospen long faea,

mo yufala i fulumap wota long hem.

4,5 Nao yufala i go tekem mit blong sipsip we i beswan.

Yufala i tekemaot ol nambawan pis blong hem

We hemia ol mit blong solda mo leg,

wetem ol bun we oli beswan,

yufala i putum

olgeta i go insaed long sospen ya

blong kukum olgeta.

Mo yufala i pusum plante faeawud

i go aninit long sospen ya

blong mekem i boel gud.’ "

6 Nao hem i talem se, "Sore tumas long ol man blong taon ya we oli man blong kilim man i ded. Olgeta evriwan bambae oli ded. Olgeta oli olsem sospen we oli wokem long bras, we i rosta we neva oli klinim. Ol pis mit we i stap long hem, ol man oli stap tektekemaot wanwan gogo i finis, i no gat wan i stap. 7 Ol man oli stap kilim man i ded insaed long taon ya, we blad blong olgeta i no ron i go long graon we bambae asis i save kavremap blong man i no luk, i ron i go long ston nomo. 8 Mo mi livim blad ya i stap long klia ples nomo, blong mi stap luk oltaem blong mekem mi mi kros, nao mi save panisim olgeta from.

9 "Sore tumas long ol man blong taon ya we oli man blong kilim man i ded. Olgeta evriwan bambae oli ded. Mi nao bambae mi mekem faea. 10 Yufala i go tekem ol faeawud bakegen i kam, mo yufala i blu long faea ya blong mekem i laet gud. Yufala i kukum mit ya, we yufala i boelem gogo supsup blong hem i drae olgeta, mo ol bun ya oli bon nogud olgeta.* mo ol bun ya, yufala i bonem olgeta. 11 Nao bambae mi tekem sospen ya we i emti finis, mi putum long sakol faea we i laet gud, blong mekem i hot gogo i red we i red. Bambae mi mekem olsem blong faea i bonemaot ol rosta mo ol doti blong hem, blong mekem i kam klin gud bakegen. 12 Mi traehad, be no, ol rosta ya, faea i no save bonem evriwan blong i lus olgeta.

13 "Jerusalem. Rabis fasin ya blong yu i mekem yu yu doti long fes blong mi. Mi traem blong mekem yu yu klin, be yu no wantem, nao yu stap doti sem mak nomo. Bambae yu no save kam klin bakegen gogo yu harem fulpaoa blong kros blong mi. 14 Naoia i taem blong mi mi mekem tok ya i kamtru. Bambae mi no moa save gat sore long yu, mo mi no save jenisim tingting blong mi. Bambae mi mas lukluk long sin blong yu, mo mi mas panisim yu from ol rabis fasin ya we yu yu mekem. Mi mi Hae God, mi Masta blong yu, mo hemia tok blong mi."

15 Nao Hae God i toktok long mi bakegen, 16 i talem se, "Man blong wol ya. Woman ya blong yu, yu yu lavem hem tumas, be bambae mi kam tekemaot hem wantaem nomo. Be bambae yu no mas krae, mo yu no mas mekem singsing blong sore, mo yu no mas letem wota blong ae blong yu i ron. 17 Sipos yu stap krae smosmol, be yu no mas letem voes blong yu i kamaot, blong man i harem yu. Bambae yu no mas mekem kastom blong yufala blong soemaot we yu harem nogud. Bambae yu no mas tekemaot spesel kaliko ya i gowe long hed blong yu, mo yu no mas tekemaot sandel i gowe long leg blong yu. Bambae yu no mas kavremap fes blong yu, mo yu no mas kakae ol kakae ya we ol man we oli stap harem nogud oli stap kakae."

18 Nao long moning ya, mi stap toktok wetem ol man, mo long naet, woman blong mi i ded. Mo long nekis dei blong hem, mi mekem olsem we Hae God i talem long mi. 19 Nao ol man oli tok long mi se, "?From wanem yu mekem olsem?"

20 Nao mi talem long olgeta se, "No, be Hae God i talem long mi 21 blong mi givim tok ya blong hem long yufala ol laen* blong Isrel.* Hem i talem se yufala i flas tumas from paoa blong haos* ya blong hem. Oltaem yufala i wantem lukluk long hem from we i naes we i naes, mo oltaem yufala i wantem go insaed long hem. Be hem bambae i mekem haos ya i no moa tabu. Mo ol pikinini blong yufala we oli stap yet long Jerusalem,* ol yang boe mo ol yang gel bambae oli ded long faet. 22 Long taem ya, bambae yufala i mekem olsem we mi mi bin mekem. Bambae yufala i no save kavremap fes blong yufala, mo yufala i no save kakae ol kakae ya we ol man we oli stap harem nogud oli stap kakae. 23 Bambae yufala i no save tekemaot ol spesel kaliko i gowe long hed blong yufala, mo yufala i no save tekemaot sandel i gowe long leg blong yufala, mo yufala i no save krae. Bambae yufala i kam slak olgeta from ol sin blong yufala, mo bambae yufala i stap harem nogud, yufala i stap krakrae long yufala bakegen. 24 Nao ol samting ya we mi mi mekem, hem i wan saen long yufala. Ol samting ya i mas kasem yufala. Mo Hae God i talem se taem ol samting ya oli kamtru, bambae yufala i savegud we hem i Hae God, i Masta* blong yufala."

25 Nao Hae God i talem se, "Haos ya blong mi, ol man ya oli glad tumas long hem, mo oli praod tumas from. Oltaem oli wantem lukluk long hem from we i naes we i naes, mo oltaem oli wantem go insaed long hem, be mi bambae mi tekemaot i gowe long olgeta. Mo bambae mi tekemaot ol pikinini boe blong olgeta wetem ol dota blong olgeta tu. 26 Nao long dei ya we bambae mi mekem samting ya, bambae wan man i ronwe long trabol ya i kam talemaot nius blong hem long yu. 27 Longtaem finis yu yu no save toktok, be long sem taem we man ya bambae i kamtru, bambae yu yu save toktok bakegen, nao yu save toktok wetem hem. Mo long fasin ya bambae yu yu wan saen long ol man ya. Mo bambae oli savegud we mi mi Hae God."