1 Nao long namba twelef yia blong yumi we yumi stap wok slef* long Babilonia, long namba twelef manis,* long fas dei blong hem, Hae God i toktok long mi long wan vison bakegen, 2 i talem se, "Man blong wol ya. Yu sing long wan singsing blong ded i go long king blong Ijip. Nao long sing ya, yu talem long hem we mi mi talem se, ‘King. Mi mi Hae God, mi Masta* blong olgeta man. Yu yu stap ting se yu yu olsem wan laeon long medel blong ol man blong ol naranarafala kantri, be nogat. Yu yu olsem wan algita nomo we i stap long reva, i stap saksakem wota i go olbaot, i stap purumpurumbut long sofmad long reva ya, i mekem i doti we i doti tumas. 3 Taem ol man blong ol narafala kantri oli kam hivap wanples, bambae mi sakem net blong mi, mi kasem yu long hem, nao mi letem olgeta ya oli pulum yu yu kamso. 4 Nao bambae mi sakemaot yu yu go stap long wan open ples, mo bambae mi tekem olgeta pijin mo olgeta anamol long wol oli kam kakae dedbodi blong yu gogo oli fulap we oli fulap gud. 5 Bambae mi sakem ol haf blong bodi blong yu i go olbaot long ol hil, mo long ol levelples long medel blong ol hil. 6 Mo bambae mi kafsaedem blad blong yu i go kavremap ol bigbigfala hil, mo i go fulumap ol krik. 7 ✝Taem mi kam blong spolem yu, bambae mi kavremap skae, mo mi blokem ol sta blong oli no moa saen. San bambae i haed long ol klaod, mo mun bambae i no moa saen. 8 Bambae mi kilim olgeta laet long skae, nao bambae tudak i kavremap wol ya we yu yu stap long hem. Mi mi Hae God, mi Masta blong yu, mo hemia tok blong mi.

9 "Taem mi spolemgud yu, nius blong yu bambae i go olbaot, i go kasem ol kantri we neva yu harem nem blong olgeta samtaem, nao bambae ol man blong ol kantri ya oli harem nogud, oli trabol tumas from. 10 Ol samting we bambae mi mekem long yu, bambae i mekem olgeta kantri oli sek, nao oli fraet, oli harem nogud tumas. Taem mi mi mekem faet long yu, bambae olgeta king oli fraet, oli seksek. Long dei ya we bambae yu yu foldaon long hem, olgeta ya evriwan bambae oli fraet se bambae olgeta tu oli ded.

11 "Bambae mi letem king blong Babilonia i kam mekem faet long yu. 12 Ol soldia blong hem oli no gat sore long man, mo bambae oli kam kilim olgeta man blong yu oli ded long faet. Olgeta man blong yu, mo olgeta samting we yu yu stap harem gud long hem, bambae ol enemi ya oli spolem olgeta evriwan. 13 Bambae mi kilim ol buluk blong yu long ol ples we oli go stap dring wota long hem, nao bambae i no moa gat man, no buluk blong mekem ol wota ya oli doti bakegen. 14 Bambae mi mekem ol wota blong yu oli kam klin bakegen, mo bambae mi letem ol reva blong yu oli stap ron gud. 15 Long taem ya, bambae mi mekem kantri blong yu i kam nogud we bambae i no gat wan samting i stap long hem. Bambae mi kilim olgeta man blong yu oli ded, mo bambae yufala evriwan i savegud we mi mi Hae God.’

16 "Hemia wan sing blong ded we ol woman blong ol narafala kantri bambae oli singsing long hem blong krae long Ijip, mo long olgeta man blong hem. Mi mi Hae God, mi Masta blong yufala, mo hemia tok blong mi."

17 Nao long namba twelef yia blong yumi we yumi stap wok slef* long Babilonia, long fas manis,* long namba fiftin dei blong hem, Hae God i toktok long mi bakegen long wan vison, 18 i talem se, "Man blong wol ya. Ol man Ijip oli plante we plante, mo yu mas harem nogud, yu mas krae from olgeta. Yu mas sanem olgeta oli go joen wetem ol man blong ol narafala kantri we oli strong tumas, nao bambae oli godaon long Hom* blong ol Dedman, blong oli go stap wetem olgeta we oli stap finis long ples ya. 19 Yu talem long olgeta se,

‘?Olsem wanem?

?Yufala i ting se yufala i naes moa

winim ol narafala man?

Bambae yufala i godaon

long Hom blong ol Dedman,

yufala i go stap ledaon wetem ol man

we oli no man blong mi.* Mo go kasem en blong japta ya, tok ya se "oli no man blong mi", i min se "oli no sakomsaes".’

20 "Man blong wol ya. Ol man Ijip bambae oli ded, oli go stap wetem ol man blong faet blong bifo we oli ded long faet. Naoia ol enemi oli stap rere finis blong kilim olgeta evriwan i ded. 21 Nao long Hom blong ol Dedman, ol larikenman blong faet, mo olgeta we oli bin faet long saed blong ol man Ijip, bambae oli glad tumas blong luk we olgeta ya oli kam stap wetem olgeta. Bambae oli singsingaot bigwan, oli talem se, ‘Olgeta ya we oli no man blong God, oli ded long faet, nao oli kamdaon long ples ya finis, oli stap ledaon wetem yumi.’

22,23 "Naoia kantri ya Asiria i lus finis, i no moa stap. Long Hom blong ol Dedman, i gat beregraon blong king blong hem, mo ol beregraon blong ol soldia blong hem oli stap raon long hem. Ol soldia ya evriwan oli ded long faet, mo ol beregraon blong olgeta oli stap daon long Hom blong ol Dedman we i daon olgeta. Be bifo, taem we olgeta ya oli laef yet, oli stap mekem ol man oli fraet we i fraet.

24,25 "Mo naoia, kantri ya Elam tu i lus finis, i no moa stap. Long Hom blong ol Dedman, i gat beregraon blong king blong hem, mo ol beregraon blong ol soldia blong hem oli stap raon long hem. Olgeta ya evriwan oli no man blong mi, mo oli ded long faet, nao oli godaon long Hom blong ol Dedman. Bifo, taem we olgeta ya oli laef yet, oli stap mekem ol man oli fraet we i fraet, be naoia oli ded finis, oli stap ledaon, oli harem nogud, oli sem, mo oli stap wetem ol narafala man we oli ded long faet.

26 "Mo naoia, tufala kantri ya Mesek mo Tubal, tufala tu i lus finis, tufala i no moa stap. Long Hom blong ol Dedman, i gat beregraon blong tufala king blong tufala, mo ol beregraon blong ol soldia blong tufala oli stap raon long tufala. Olgeta ya evriwan oli no man blong mi, mo oli ded long faet. Be bifo, taem we oli laef yet, oli stap mekem olgeta man oli fraet tumas. 27 Taem we ol man oli berem olgeta ya, oli no folem stret fasin blong olgeta blong berem man, blong ona long olgeta, olsem we ol man oli stap ona long ol larikenman blong faet blong bifo. Ol larikenman ya blong bifo, oli godaon long Hom blong ol Dedman wetem ol samting blong faet blong olgeta. Taem ol man oli berem olgeta, oli putumgud naef blong faet blong olgeta aninit long hed blong olgeta, mo oli putumgud sil* blong olgeta antap long bodi blong olgeta.* Be bifo, taem we ol larikenman ya oli stap laef yet, oli strong tumas, nao oli stap mekem ol man oli fraet we i fraet.

28 "Long sem fasin ya, bambae ol man Ijip oli lus, oli ledaon long Hom blong ol Dedman, wetem ol narafala man we oli no man blong mi, mo oli ded long faet.

29 "Mo naoia, kantri ya Edom tu i lus finis, i no moa stap. Long Hom blong ol Dedman, i gat beregraon blong ol king mo ol haeman blong hem. Olgeta ya oli soldia we oli strong tumas, be naoia oli stap ledaon long Hom blong ol Dedman, we oli no man blong mi, mo oli ded long faet.

30 "Mo naoia, ol ples long not tu, wetem taon ya Saedon oli lus finis, oli no moa stap. Long Hom blong ol Dedman i gat beregraon blong ol haeman blong olgeta i stap. Taem we olgeta oli laef yet, oli stap mekem ol man oli fraet tumas from we oli gat paoa. Be naoia oli sem gud, oli godaon long Hom blong ol Dedman, oli stap wetem ol man we oli ded long faet. Olgeta evriwan oli no man blong mi, mo oli stap sem wetem olgeta we oli go stap long Hom blong ol Dedman.

31 "Taem king blong Ijip wetem ol soldia blong hem oli luk olgeta ya we oli ded long faet, bambae oli harem gud.

32 Naoia mi stap mekem king blong Ijip i mekem ol man oli fraet we i fraet tumas, be hem wetem ol soldia blong hem we oli plante tumas, bambae oli ded long faet. Mo bambae oli stap ledaon long Hom blong ol Dedman, wetem olgeta ya we oli no man blong mi, mo we oli ded long faet. Mi mi Hae God, mi Masta* blong yufala, mo hemia tok blong mi."