1 ✝Nao Hae God i toktok long mi long wan vison bakegen, 2 i talem se, "Man blong wol ya. Yu lukluk i go long kantri ya Amon, 3 yu tok agens long ol man blong hem. Yu talem long olgeta we mi mi talem se, ‘Ol man Amon. Mi mi Hae God, mi Masta* blong olgeta man, mo yufala i mas lesin gud long ol samting we mi mi stap talem long yufala. Yufala i glad tumas we yufala i luk haos* blong mi i kam doti, i no moa tabu. Mo yufala i glad we kantri ya Juda* i kam nogud olgeta, mo ol man blong hem oli go wok slef* long narafala kantri.* i kam nogud olgeta, mo ol man Juda oli go wok slef long narafala kantri. 4 Nao from we yufala i stap glad from ol samting ya, bambae mi letem ol man ya blong draeples long is oli kam mekem faet long yufala, oli winim yufala. Mo bambae oli putumap ol haos tapolen blong olgeta long kantri ya blong yufala, nao bambae oli stap long hem. Mo bambae oli kakae ol kakae mo ol frut blong yufala, mo oli dring melek blong ol anamol blong yufala. 5 Bambae mi mekem taon ya Raba i kam wan ples blong putum ol kamel long hem, mo evri taon long kantri ya Amon, bambae mi mekem olgeta oli kam ples blong sipsip, nao bambae yufala i savegud we mi mi Hae God."

6 " ‘Yufala i no wantem nating kantri ya blong ol laen* blong Isrel.* Yufala i stap klapem han blong yufala mo yufala i stap jamjam from we yufala i glad tumas we kantri ya i lus. 7 Nao from we yufala i mekem olsem, bambae mi letem yufala i go long han blong ol man blong ol narafala kantri we bambae oli kam mekem faet long yufala, nao oli stilim olting blong yufala. Bambae mi spolemgud yufala we bambae mi flatemgud yufala, nao bambae yufala i no moa kam plante, blong yufala i save gat kantri blong yufala bakegen. Nao bambae yufala i savegud we mi mi Hae God.’ "

8 ✝Nao Hae God i talem se, "Ol man blong kantri ya Moab oli stap talem se Juda* i no moa gat man i lukaot long hem, hem i olsem ol narafala kantri nomo.* Juda i no moa gat man i lukaot long hem, hem i olsem ol narafala kantri nomo. 9 Be from we oli tok olsem, mi bambae mi letem ol enemi oli kam mekem faet long ol nambawan taon blong olgeta. Ol taon ya Betsesimot, mo Balmeon, mo Kiriataem oli stap long mak blong graon blong kantri ya, blong blokemgud hem, be bambae ol enemi ya oli flatemgud olgeta. 10 Bambae mi letem ol man ya blong draeples long is oli kam faet long olgeta wetem ol man Amon, oli winim olgeta, blong bambae ol man Moab oli no moa gat kantri blong olgeta bakegen. 11 Mi bambae mi panisim olgeta, nao bambae oli savegud we mi mi Hae God."

12 ✝Nao Hae God i talem se, "Ol man blong kantri ya Edom oli faet long ol man Juda* blong givimbak fasin we oli mekem, be oli mekem i nogud moa, nao sin blong olgeta bambae i stap olwe. 13 Naoia mi talem se bambae mi panisim olgeta we bambae mi kilim olgeta man wetem olgeta anamol tu. Bambae mi spolem kantri ya we bambae mi mekem i kam drae nogud olgeta, i stat long taon ya Teman i go kasem taon ya Dedan, mo olgeta man evriwan bambae oli ded long faet.

14 "Ol laen* blong Isrel* oli man blong mi, mo bambae oli mekem wok blong mi. Bambae oli go faet long ol man Edom blong givimbak ol fasin ya we oli mekem, nao olgeta ya bambae oli haremsave paoa blong kros blong mi. Bambae oli save fasin blong mi blong givimbak ol samting ya we oli mekem. Mi mi Hae God, mi Masta* blong yufala, mo hemia tok blong mi."

15 ✝Mo Hae God i talem se, "Ol man blong kantri ya Filistia oli kam mekem faet long ol man Juda* we oli enemi blong olgeta. Oli stap agens long ol man ya, i stat longtaem finis, i kam kasem tede. Olgeta oli mekem faet ya blong givimbak fasin ya we ol man Juda ya oli bin mekem long olgeta, mo oli spolemgud olgeta, from we oli no laekem olgeta nating. 16 Nao from samting ya, mi talemaot se bambae mi mekem faet long olgeta ya we bambae mi flatemgud olgeta evriwan. Olgeta evriwan we oli stap olbaot long levelples ya long Filistia klosap long solwota, bambae mi kilim olgeta evriwan oli ded. 17 Bambae mi panisim olgeta we mi meksave olgeta blong givimbak ol fasin ya we oli bin mekem. Nao bambae oli haremsave paoa blong kros blong mi, mo bambae oli savegud we mi mi Hae God."