1 Nao long namba sikis yia we yumi stap wok slef* long ples ya, long namba sikis manis,* long namba faef dei blong hem, ol lida blong ol man Juda* we oli stap wok slef long ples ya, oli stap sidaon wetem mi long haos blong mi. Nao wantaem nomo, paoa blong Hae God we i Masta* blong yumi i kam long mi, mo mi luk wan vison. 2 ✝Nao long vison ya, mi lukluk i go antap, mi luk olsem we i gat wan man i stap we faea i laet raonabaot long hem. I stat long ples blong strap i godaon, bodi blong hem i olsem faea, mo i stat long ples blong strap i go antap, bodi blong hem i stap saen we i saen olsem bras we i saen gud. 3 Nao mi luk olsem we hem i pusum han blong hem, i holem hea blong mi. Nao Spirit* long 2.2. blong hem i leftemap mi mi go antap long medel blong skae mo graon, mo i tekem mi mi go long Jerusalem,* nao mi haremsave se man ya, Hae God ya. Hem i tekem mi mi go insaed long wan doa blong smol yad ya insaed long bigfala yad blong haos* blong hem, we doa ya i stap long saed i go long not. Long ples ya, i gat wan aedol i stanap, we i mekem hem i harem nogud, i kros we i kros, from we ol man blong hem oli girap, oli lego hem, oli go biaen long aedol ya.

4 ✝Nao long ples ya, mi luk wan bigfala laet we i saen we i saen. Laet ya i soemaot we God blong yumi i stap long ples ya. Laet ya i olsem hemia we mi luk bifo, long bigfala levelples ya klosap long Kebara Reva. 5 Nao hem i talem long mi se, "Man blong wol ya. Yu lukluk i go long not." Nao mi lukluk i go, mo mi luk wan aedol i stanap long doa ya we i blong kam long olta. Mo aedol ya tu i mekem hem i harem nogud, i kros.

6 Nao hem i talem bakegen long mi se, "?Yu luk ol samting ya we ol man ya oli stap mekem? Oli stap mekem ol samting ya we i nogud we i nogud, we i mekem mi mi aot long tabu haos ya blong mi, mi go longwe long hem. Mo bambae yu save luk ol samting we oli nogud moa winim hemia."

7 Nao hem i tekem mi mi go long doa blong bigfala yad ya blong haos blong hem, mo mi luk wan hol we i gotru long bigfala stonwol blong yad ya. 8 Nao hem i talem long mi se, "Yu brekem stonwol long ples ya i gotru." Nao mi brekem stonwol ya, mi gotru long hem, mo mi luk wan doa. 9 Nao hem i talem long mi se, "Yu go insaed, yu luk ol samting ya we i nogud we i nogud long fes blong mi we ol man ya oli stap mekem long ples ya." 10 Nao mi go insaed, mi luk we olgeta ya oli droem ol pija olbaot long ol wol blong rum ya. Ol pija ya, i gat ol pija blong ol snek, mo ol anamol we oli doti* long fes blong hem, mo ol pija blong ol narafala samting we ol laen* blong Isrel* oli stap mekem wosip long olgeta. Ol pija ya oli kavremapgud olgeta wol blong rum ya. 11 Mo i gat seventi lida blong ol laen blong Isrel oli stap long rum ya, mo Jahasania, we papa blong hem Safan, hem i wan long olgeta. Olgeta wanwan oli holem sensa* blong bonem insens,* mo smok blong insens ya i stap go antap. 12 Nao Hae God i talem long mi se, "?Yu luk samting ya we ol lida ya blong yufala oli stap mekem long haed? Olgeta ya wanwan oli stap mekem wosip long ol aedol blong olgeta insaed long ol haos blong olgeta we ol man oli no save luk olgeta. Oli stap mekem olsem from we oli stap talem se, ‘Hae God i no luk yumi ya. Hem i lego kantri blong yumi finis ya.’ " 13 Nao bakegen, hem i talem long mi se, "Bambae yu save luk ol samting we oli stap mekem we oli nogud we i nogud moa, winim ol samting ya."

14 Nao hem i tekem mi mi go long doa blong bigfala yad blong haos blong hem long saed i go long not, mo mi luk ol woman we oli stap krae long god ya Tamus* we oli krae we i krae. 15 Nao hem i talem long mi se, "?Yu luk samting ya? Bambae yu luk ol samting we i nogud we i nogud moa winim hemia."

16 Nao hem i tekem mi mi go insaed long smol yad ya bakegen, insaed long bigfala yad ya. Long ples ya i gat samwe long twanti faef man, oli stap stanap klosap long doa blong Rum we i Tabu, long medel blong olta mo vranda blong haos ya. Oli tanem baksaed i go long Rum ya we i Tabu, nao oli lukluk i go long is, oli bodaon, oli stap mekem wosip long san we i stap kam antap. 17 Nao hem i talem long mi se, "?Yu luk samting ya? Ol man Juda* ya oli stap mekem ol samting we i nogud we i nogud, stret long fes blong mi. Mo olgeta oli girap, oli stap mekem olgeta man oli stap faet agensem olgeta bakegen olbaot long kantri ya, we i mekem mi mi kros we mi kros moa. Be yu luk. Oli tanem baksaed long mi, oli stap spolem mi long fasin we i nogud we i nogud olgeta. 18 Nao from samting ya bambae oli luk paoa blong kros blong mi, mo bambae mi no save sevem laef blong olgeta, mo mi no save gat sore long olgeta nating. Bambae oli stap prea we oli singaot bigwan long mi, be mi no save lesin long olgeta nating."